គណៈកម្មាធិការរៀបចំបុណ្យជាតិ និងអន្តរជាតិ បានចេញលិខិតថ្លែងបកស្រាយអំពីករណីរថយន្តដឹកព្រះសពបុត្រីច្បងនៃព្រះមហាវីរក្សត្រ ព្រះរៀមនរោត្តម បុប្ផាទេវី ដោយថា បានធ្វើឡើងស័ក្តិសមបំផុតចំពោះព្រះកិត្តិយសរបស់ព្រះអង្គ។
ព្រះរៀមនរោត្តម បុប្ផាទេវី បានសោយទិវង្គតនៅវេលាម៉ោង១២កន្លះថ្ងៃត្រង់ ថ្ងៃទី១៨ ខែវិច្ឆិកា នៅមន្ទីរពេទ្យមួយក្នុងប្រទេសថៃ ក្នុងជន្មាយុ៧៧ព្រះវស្សា ដោយរោគាពាធ។ សពព្រះរៀម ត្រូវបានដឹកតាមជើងយន្តហោះមកដល់ព្រលានយន្តហោះភ្នំពេញ នៅវេលាម៉ោង៧កន្លះយប់ថ្ងៃបន្ទាប់ ដោយមានរថយន្តប្រភេទ១២កៅអី ពីព្រះបរមរាជវាំងចាំទទួល។
អ្នកប្រើប្រាស់បណ្តាញសង្គម បានរិះគន់ចំពោះការប្រើប្រាស់រថយន្តដឹកព្រះសពព្រះរៀមបុប្ផាទេវីនេះថា មិន ស័ក្តិសមនឹងកិត្តិយសព្រះអង្គម្ចាស់ជាសែរាជវង្ស និងធ្លាប់បានពលីកម្លាំងកាយចិត្តក្នុងការថែរក្សា និងលើកតម្កើងវប្បធម៌ប្រពៃណីខ្មែរ ជាពិសេស របាំព្រះរាជទ្រព្យ។
នៅក្នុងសេចក្តីថ្លែងការណ៍ចុះថ្ងៃទី២០ ខែវិច្ឆិកា ឆ្នាំ២០១៩ គណៈកម្មាធិការរៀបចំបុណ្យជាតិ លើកឡើងថា ការរៀបចំទទួលព្រះសពព្រះរៀមបុប្ផាទេវី បានប្រព្រឹត្តិទៅតាមពិធីសាសនា ដោយប្រើប្រាស់រថយន្តពីព្រះបរមរាជវាំងផ្ទាល់ដែលពុំមានដាក់កៅអីអង្គុយ មានការតុបតែងលម្អជាមួយកម្រាលព្រំ និងវាំងននថ្មីៗ ព្រមទាំងមានសម្តេចព្រះសង្ឃរាជយាងទៅទទួលដល់ព្រលានយន្តហោះ។
សម្ដេចរាជបុត្រីព្រះរៀម នរោត្ដម បុប្ផាទេវី ជាព្រះរៀមម្ដាយទីទៃរបស់ព្រះមហាក្សត្រកម្ពុជាបច្ចុប្បន្ន ព្រះករុណា សម្ដេចព្រះបរមនាថ នរោត្ដម សីហមុនី។
សម្ដេចរាជបុត្រីព្រះរៀម នរោត្ដម បុប្ផាទេវី គឺជាអតីតនាដការីឯកនៃរបាំព្រះរាជទ្រព្យនៅចន្លោះទសវត្សរ៍១៩៥០ និង១៩៦០។ ទ្រង់ត្រូវបានតែងតាំងជារដ្ឋមន្ត្រីក្រសួងវប្បធម៌ និងវិចិត្រសិល្បៈ នៅក្នុងរដ្ឋាភិបាលអាណត្តិទី២ ចន្លោះពីឆ្នាំ១៩៩៩ ដល់ឆ្នាំ២០០៤៕
