មេធាវី និងក្រឡាបញ្ជីនៃតុលាការខេត្តរតនគិរី បាននិយាយកាលពីថ្ងៃសុក្រសប្ដាហ៍មុនថា សវនាការជំនុំជម្រះក្ដីជាលើកដំបូងប្រឆាំងនឹងអតីតអ្នកកាសែត ២រូបរបស់សារព័ត៌មាន ខេមបូឌា ដេលី ត្រូវបានកំណត់ធ្វើឡើងនៅថ្ងៃទី២៥ ខែធ្នូនេះ ពោលគឺជាង ២ឆ្នាំក្រោយពីអ្នកទាំងពីរត្រូវបានចោទប្រកាន់ពីបទញុះញង់ជុំវិញការធ្វើសេចក្ដីរាយការណ៍នៅក្នុងខេត្តនេះ នៅមុនការបោះឆ្នោតឃុំ-សង្កាត់ ឆ្នាំ២០១៧។
ក្រុមអ្នកការពារអ្នកកាសែត និងក្រុមសិទ្ធិមនុស្ស បានហៅករណីនេះថា ជាសេចក្ដីសម្រេច «បង្កាច់បង្ខូច» និង «មិនសមហេតុផល» ដែលគំរាមកំហែងដល់អ្នកសារព័ត៌មាន ជំរុញឱ្យអ្នកសារព័ត៌មានព្រួយបារម្ភ និងកម្រិតលើសេរីភាពសារព័ត៌មាននៅក្នុងប្រទេសនេះ។
អ្នកសារព័ត៌មានម្នាក់ក្នុងចំណោម ២នាក់ដែលរងការចោទប្រកាន់នោះ បាននិយាយថា ករណីនេះ«គ្មានមូលដ្ឋានទាំងស្រុង» ដែលកើតចេញពីបណ្ដឹងតាមផ្លូវតុលាការមួយធ្វើឡើងដោយបុគ្គលិកម្នាក់ និងមនុស្ស ២នាក់ទៀត ដែលពួកគេបានសម្ភាស ហើយក្រោយមកក្លាយជាមេឃុំ។
ក្រឡាបញ្ជីសាលាដំបូងខេត្តរតនគិរី លោក អ៊ឹម សារ៉ាត់ បានប្រាប់វីអូឌីកាលពីថ្ងៃសុក្រថា សវនាការជំនុំជម្រះអតីតអ្នកយកព័ត៌មានរបស់សារព័ត៌មាន ខេមបូឌា ដេលី នៅក្រោមការចោទប្រកាន់ពីបទ «ញុះញង់ឱ្យប្រព្រឹត្តបទល្មើសជាអាថ៌»នោះ ត្រូវបានកំណត់ធ្វើឡើងនៅថ្ងៃបុណ្យណូអែល។
លោក សារ៉ាត់ បាននិយាយបន្តថា តុលាការនឹងចេញដីកានៅក្នុងរយៈពេល ១សប្ដាហ៍ ដើម្បីកោះហៅ លោក អូន ភាព អតីតអ្នកយកព័ត៌មានរបស់កាសែត ខេមបូឌា ដេលី និងលោក Zsombor Peter អតីតការីនិពន្ធរបស់កាសែត ខេមបូឌា ដេលី ផងដែរ។
លោក អូន ភាព អាយុ ៥៥ឆ្នាំ និងលោក Peter អាយុ ៤១ឆ្នាំ ដែលសុទ្ធតែជាអ្នកកាសែតឈ្នះពានរង្វាន់ ហើយកំពុងរស់នៅក្រៅប្រទេសកម្ពុជានោះ ប្រឈមមុខនឹងជាប់ពន្ធនាគាររហូតដល់ ២ឆ្នាំ។
កាសែត ខេមបូឌា ដេលី ដែលជាសារព័ត៌មានឯករាជ្យនោះ ត្រូវបានបិទទ្វារនៅឆ្នាំ២០១៧កន្លងមក ក្រោមសម្ពាធពីរដ្ឋាភិបាល ចំពេលមានការបង្ក្រាបយ៉ាងទូលំទូលាយពីអាជ្ញាធរទៅលើគណបក្សប្រឆាំង ប្រព័ន្ធផ្សព្វផ្សាយឯករាជ្យ និងសង្គមស៊ីវិល។
លោក សេក សុភ័ណ្ឌ មេធាវីការពារក្ដីឱ្យអ្នកសារព័ត៌មានទាំងពីរ បាននិយាយថា លោកទទួលបានដំណឹងនៅដើមសប្ដាហ៍នេះ អំពីការកំណត់ថ្ងៃសវនាការនៅថ្ងៃទី២៥ ខែធ្នូ នៅឯសាលាដំបូងខេត្តរតនគិរី ប៉ុន្តែ លោកមិនទាន់ទទួលបានដីការបស់តុលាការបញ្ជាក់អំពីសវនាការនេះនៅឡើយទេ។
លោក សុភ័ណ្ឌ ប្រាប់ថា៖ «ប្រសិនបើខ្ញុំទទួលបានដីកា ខ្ញុំនឹងចូលរួម។ តុលាការថា ពួកគេនឹងចេញដីកាកោះអញ្ជើញ»។
លោក សុភ័ណ្ឌ បាននិយាយថា កូនក្ដីរបស់លោក គឺជាមនុស្សស្លូតត្រង់គ្មានកំហុស ហើយលោកបានស្នើទៅតុលាការខេត្តរតនគិរី ឱ្យទម្លាក់ចោលការចោទប្រកាន់មួយនេះ ដោយសារគ្មានភស្តុតាង។
លោក សុភ័ណ្ឌ ប្រាប់វីអូឌីថា៖ «មិនមានការញុះញង់ មិនមានផលជះ គ្មានអ្នករងគ្រោះ គ្មានអ្វីទេ។ គ្មានបទល្មើសក្នុងហ្នឹងទេ»។
កាលពីថ្ងៃសុក្រកន្លងមក លោក Peter បានហៅករណីនេះថា «គ្មានមូលដ្ឋានទាំងស្រុង» ហើយលោកថា បណ្ដឹងប្រឆាំងរូបលោក និងលោក អូន ភាព គួរត្រូវបានបោះចោល នៅពេលគ្មានពន្លឺនៃភស្តុតាង ឬភាពគួរឱ្យជឿជាក់បាន។
លោក Peter បាននិយាយតាមអ៊ីម៉ែលថា៖ «យើងជាអ្នកសារព័ត៌មានសាកសួរទៅអ្នកបោះឆ្នោតឱ្យចែករំលែកនូវការយល់ឃើញរបស់ពួកគេអំពីការបោះឆ្នោតដែលប្រុងមកដល់។ មិនមានអ្វីល្មើសទេ»។
ការចោទប្រកាន់នេះ បានកើតឡើងតាំងពីខែឧសភា ឆ្នាំ២០១៧ នៅពេលលោក Peter និងលោក ភាព ធ្វើដំណើរទៅឃុំប៉ាតេ ខេត្តរតនគិរី ជាឃុំតែមួយគត់នៅក្នុងខេត្តមួយនេះ ដែលគណបក្សប្រជាជនកម្ពុជា ពុំបានឈ្នះការបោះឆ្នោតឃុំ-សង្កាត់ កាលពីឆ្នាំ២០១២នោះឡើយ។
លោក Peter បាននិយាយថា ពួកលោកបានចំណាយពេលជិត ១ថ្ងៃ មុនការបោះឆ្នោតឃុំ-សង្កាត់ ខែមិថុនា ឆ្នាំ២០១៧ ដើម្បីព្យាយាមស្វែងរកចម្លើយឆ្លើយតបទៅនឹងសំណួរសួរថា ហេតុអ្វីបានជាមានតែឃុំប៉ាតេមួយប៉ុណ្ណោះក្នុងចំណោមឃុំ-សង្កាត់ចំនួន ៥០នៅក្នុងខេត្តនេះ បានជ្រើសរើសមេឃុំមកពីគណបក្សប្រឆាំង [សម រង្ស៊ី] ឬ [សិទ្ធិមនុស្ស] កាលពី ៥ឆ្នាំមុន និងសំណួរសួរថា តើប្រជាជនក្នុងមូលដ្ឋានយល់ដូចម្ដេចអំពីគណបក្សធំៗនៅមុនថ្ងៃបោះឆ្នោតមកដល់។
លោក Peter បានប្រាប់វីអូឌីថា ពួកលោកបានរៀបចំពេលវេលាសម្រាប់សម្ភាសជាមុនជាមួយលោក រម៉ាំ យ៉ុត មេឃុំប៉ាតេកូតតាគណបក្ស សម រង្ស៊ី ដែលស្ថិតក្នុងចំណោមបុរស ៣នាក់ ដែលបានដាក់ពាក្យបណ្ដឹងប្រឆាំងនឹងអ្នកយកព័ត៌មាន ហើយក៏បាននិយាយជាមួយប្រជាជនមូលដ្ឋានជាច្រើនរូបទៀតតាមលក្ខណៈចៃដន្យផងដែរ។
លោក សេវ ប៊ន ដែលជាបុរសម្នាក់ក្នុងចំណោមដើមបណ្ដឹង ៣រូប បានទៅសម្ភាសជាមួយលោក យ៉ុត។ អ្នកសារព័ត៌មានទាំង ២រូប មិនមានចេតនាសម្ភាសជាមួយគាត់ទេ ប៉ុន្តែ នៅពេលពួកគេសួរលោក យ៉ុត ថាហេតុអ្វីបានជាឃុំប៉ាតេ គឺជាឃុំតែមួយគត់នៅក្នុងខេត្តរតនគិរីដែលគណបក្សកាន់អំណាចមិនបានឈ្នះកាលពីឆ្នាំ២០១២នោះ លោក ប៊ន បាននិយាយកាត់។ លោក Peter បាននិយាយថា ពួកគេបានសួរលោក ប៊ន ថាហេតុអ្វីបានជាលោកទៅទីនោះ ហើយហេតុអ្វីបានជាលោករំខានកិច្ចសម្ភាសរបស់ពួកគេ។
លោក Peter បានសរសេររៀបរាប់បន្តថា៖ «បន្ទាប់ពីលោក សេវ ប៊ន ទទូចឱ្យយើងបញ្ឈប់កិច្ចសម្ភាសរបស់យើងជាមួយលោក រ៉ម៉ាំ យ៉ុត នោះ លោក យ៉ុត ក៏ឈប់និយាយ លើកទូរស័ព្ទ ហើយក៏ចាកចេញពីសាលាឃុំ។ លោក សេវ ប៊ន ក៏បានចាកចេញទៅដំណាលគ្នាផងដែរ។ បន្ទាប់មក ភាព និងខ្ញុំ ក៏បានចាកចេញពីសាលាឃុំដែរ ហើយបន្តការងាររាយការណ៍ព័ត៌មានរបស់យើងនៅឃុំប៉ាតេ»។
លោក Peter និងលោក ភាព ក៏បានរៀបរាប់លម្អិតអំពីករណីនេះនៅក្នុងអត្ថបទចុះផ្សាយនៅលើកាសែតខេមបូឌា ដេលី កាលពីថ្ងៃទី២៩ ខែឧសភា ឆ្នាំ២០១៧ផងដែរ ដែលនិយាយអំពីលទ្ធផលនៃដំណើរចុះយកព័ត៌មានរបស់ពួកគេ។
អត្ថបទនោះ ចុះផ្សាយថា៖ «លោក ប៊ន បាននិយាយថា លោកគ្មានតួនាទីផ្លូវការទេ ប៉ុន្តែ ចៅហ្វាយខេត្តរតនគិរី លោក ថង សាវុន បានបញ្ជូនរូបលោកឱ្យទៅនាំមេឃុំ»។ លោក ថង សាវុន គឺជាក្មួយប្រុសលោក ប៊ូ ឡាំ សមាជិកសភាគណបក្សប្រជាជនកម្ពុជា និងជាកូនប្រុសលោក ប៊ូ ថង សមាជិកព្រឹទ្ធសភាគណបក្សកាន់អំណាចផងដែរ។
លោក ប៊ន ត្រូវបានដកស្រង់សម្ដីដែលនិយាយថា៖ «គេឱ្យខ្ញុំមកជាមួយគាត់ដើម្បីស្ដាប់ ហើយប្រសិនបើនិយាយពាក់ព័ន្ធនឹងនយោបាយ គេឱ្យខ្ញុំតម្រូវឱ្យបញ្ឈប់កិច្ចសម្ភាស»។
អត្ថបទនោះ បានចុះផ្សាយបន្តថា បន្ទាប់មកនៅក្នុងថ្ងៃនោះដែរ លោក យ៉ុត លោក ប៊ន និងបុរសទី៣ឈ្មោះ រំចំ យី បានដាក់បណ្ដឹងមួយទៅអភិបាលស្រុក ដែលបានបញ្ជូនបណ្ដឹងនោះទៅគណៈកម្មការបោះឆ្នោតឃុំ ដោយចោទលោក Peter និងលោក ភាព ថាធ្វើដំណើរទៅទីនោះជាមួយ «ចេតនាអាក្រក់» និងបាន«ញុះញង់ប្រជាជន»។
ខេមបូឌា ដេលី បានចុះផ្សាយទៀតថា ពេលក្រោយមក បុរសទាំងបីនាក់នោះ បានដកបណ្ដឹងរបស់ពួកគេពីគណៈកម្មការបោះឆ្នោតឃុំវិញ។ ប៉ុន្តែ នៅថ្ងៃបន្ទាប់ ពួកគេបានដាក់បណ្ដឹងទៅតុលាការខេត្តរតនគិរី ដោយចោទអ្នកកាសែតទាំងពីរនាក់នោះពីបទ «ញុះញង់» និង«គំរាមកំហែង»។
លោក Peter បានប្រាប់វីអូឌីថា អាជ្ញាធរមូលដ្ឋានបានតាមដានលោក និងលោក ភាព ខណៈដែលពួកគេធ្វើសេចក្ដីរាយការណ៍នៅឃុំប៉ាតេ អំពីករណីពីរដាច់ដោយឡែក។ អាជ្ញាធរបានសួរអ្នកកាសែតទាំងពីរថា ពួកគេកំពុងធ្វើអ្វី ហើយបន្ទាប់មកបានចាកចេញទៅវិញ បន្ទាប់ពីអ្នកកាសែតទាំងពីរបានប្រាប់ទៅពួកគេ។ អាជ្ញាធរពុំបានជំទាស់អ្វីនោះឡើយ ហើយអ្នកកាសែតទាំងពីរបន្តការងាររបស់ពួកគេ។
ប៉ុន្តែ កាសែត ខេមបូឌា ដេលី បានរាយការណ៍នាពេលនោះថា អ្នកសារព័ត៌មានទាំងពីររូប ត្រូវបានតុលាការកោះហៅនៅក្នុងខែកក្កដា ក្រោយពីការបោះឆ្នោតឃុំ-សង្កាត់ និងតម្រូវឱ្យចូលបំភ្លឺនៅខែសីហា។
លោកមេធាវី សេក សុភ័ណ្ឌ បាននិយាយកាលពីថ្ងៃសុក្រថា លោកមិនដែលទទួលបានសេចក្ដីជូនដំណឹងជាផ្លូវការថា ដំណើរការស៊ើបអង្កេតរបស់តុលាការបានបិទបញ្ចប់នោះទេ។ លោកបានដឹងអំពីរឿងនេះកាលពីខែតុលាកន្លងមក បន្ទាប់ពីបានទូរសព្ទសាកសួរបន្ថែមទៅក្រឡាបញ្ជី។
លោក សុភ័ណ្ឌ គឺជាអ្នកប្រឹក្សាច្បាប់សម្រាប់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ដែលជាអង្គការអាណាព្យាបាលលើវីអូឌី។ អតីតបុគ្គលិកកាសែត ខេមបូឌា ដេលី ៤រូប ដែលជាសហការីរបស់លោក ភាព និងលោក Peter មានទាំងអ្នកសរសេរ និងការីនិពន្ធនៃអត្ថបទនេះផងដែរ បម្រើការងារនៅវីអូឌីផងដែរ។
«ហ៊ាននិយាយការពិត»
នៅក្នុងអត្ថបទនិយាយពីប្រវត្តិរបស់លោកដែលចេញផ្សាយកាលពីខែកុម្ភៈកន្លងមក លោក ភាព បានរៀបរាប់ថា លោកជឿជាក់ថា បណ្ដឹងប្រឆាំងនឹងរូបលោក គឺជាចេតនានយោបាយដើម្បីបំបាត់សំឡេងលោកដោយសារតែលោកធ្លាប់រាយការណ៍អំពីបទល្មើសព្រៃឈើនាពេលកម្លងមក ដែលអត្ថបទនោះ លោក និង លោក Peter ទទួលបានពានរង្វាន់។
លោក ភាព និយាយថា៖ «វាមិនមែនដោយសារតែការរាយការណ៍អំពីការបោះឆ្នោតឃុំ-សង្កាត់នោះទេ ប៉ុន្តែ ដោយសារតែការរាយការណ៍អំពីកាប់ឈើខុសច្បាប់។ យើងតែងតែរាយការណ៍អំពីឈ្មោះអាជ្ញាធរខេត្តដែលជាប់ពាក់ព័ន្ធនឹងបទល្មើស។ នេះសបញ្ជាក់ថា ពួកគេមិនដែលបញ្ឈប់បទល្មើលនោះទេ ហើយពួកគេក៏បានផ្តល់ការការពារដល់ក្រុមអ្នកកាប់ឈើ និងឈ្មួញឈើ។ ពួកគេខឹងដោយសារតែមូលហេតុនេះ»។
លោក ភាព ដែលបច្ចុប្បន្នរស់នៅសហរដ្ឋអាមេរិក មិនអាចទាក់ទងសុំការបំភ្លឺបានទេ កាលពីថ្ងៃសុក្រ។
អ្នកកាសែតកាណាដា លោក Peter ដែលបានធ្វើការឱ្យកាសែត ខេមបូឌា ដេលី អស់រយៈពេល ៨ឆ្នាំ បានឱ្យដឹងថា លោកបានចាកចេញពីប្រទេសកម្ពុជានៅខែតុលា ឆ្នាំ២០១៧។ លោកបន្តថា លោកបន្តធ្វើការជាអ្នកកាសែតម្នាក់ដែលសរសេរព័ត៌មានផ្ដោតលើតំបន់អាស៊ីអាគ្នេយ៍។
អតីតកាសែត ខេមបូឌា ដេលី បានចេញផ្សាយកាសែតលេខចុងក្រោយរបស់ខ្លួននៅថ្ងៃទី៤ ខែកញ្ញា ឆ្នាំ២០១៧ បន្ទាប់ពីម្ចាស់កាសែតនេះ រងការព្រមានពីលោកនាយករដ្ឋមន្រ្តី ហ៊ុន សែន ឱ្យបង់ពន្ធ ៦.៣លានដុល្លារ «បើមិនដូច្នេះទេ ត្រូវតែវេចបង្វិចចេញ»។
ទោះយ៉ាងណា ពីរឆ្នាំក្រោយមក លោក ហ៊ុន សែន បានលើកឡើងនៅក្នុងលិខិតមួយចេញនៅថ្ងៃព្រហស្បតិ៍ថា លោកចាត់ទុកសារព័ត៌មាន គឺជាដៃគូរបស់រដ្ឋាភិបាលក្នុងការប្រយុទ្ធប្រឆាំងអំពើពុករលួយ និងកិច្ចខំប្រឹងប្រែងដើម្បីកែទម្រង់ច្បាប់ និងតុលាការ។
លោកនាយករដ្ឋមន្រ្តីដែលកាន់អំណាចដ៏យូររូបនេះ បានសរសេរនៅក្នុងលិខិតនោះថា៖ «រដ្ឋាភិបាលពិតជាត្រូវការប្រព័ន្ធផ្សព្វផ្សាយដែលមានថាមពល និងភាពទទួលខុសត្រូវ ជាមួយភាពស្មោះត្រង់ និងវិជ្ជាជីវៈ។ អ្នករាយការណ៍ព័ត៌មានរបស់យើង ត្រូវតែស្តាប់សំឡេងពីគ្រប់ភាគីពាក់ព័ន្ធទាំងអស់ ហើយហ៊ាននិយាយការពិត និងហ៊ានរិះគន់ក្នុងន័យស្ថាបនា»។
កាសែត ខេមបូឌា ដេលី ដែលមានស្លោករបស់ខ្លួនថា «រាល់ដំណឹងទាំងអស់គ្មានការភ័យខ្លាច ឬលម្អៀង»នោះ ត្រូវបានគេស្គាល់ថា សេចក្តីរាយការណ៍ព័ត៌មានរបស់កាសែតនេះ មានភាពស៊ីជម្រៅទៅលើប្រធានបទពាក់ព័ន្ធនឹងការប្រព្រឹត្តអំពើពុករលួយរបស់រដ្ឋាភិបាល ការរំលោភបំពានសិទ្ធិ និងការបំផ្លិចបំផ្លាញបរិស្ថាន។
ម្ចាស់កាសែតនេះ បានរក្សាវត្តមានរបស់ខ្លួនលើបណ្តាញអនឡាន ដោយការចេញផ្សាយព័ត៌មានប្រចាំថ្ងៃអំពីកម្ពុជា ជាភាសាខ្មែរ និងអង់គ្លេស ដែលព័ត៌មានទាំងនោះ ភាគច្រើនប្រមូលមកពីប្រព័ន្ធផ្សព្វផ្សាយព័ត៌មានដទៃ។
កាសែតនេះ បានបញ្ឈប់ការបោះពុម្ពផ្សាយប្រតិបត្តិលេខចុងក្រោយរបស់ខ្លួន នៅមួយថ្ងៃក្រោយប្រធានគណបក្សប្រឆាំង លោក កឹម សុខា ត្រូវបានចាប់ខ្លួនក្រោមបទចោទ«អំពើក្បត់ជាតិ» ដែលនាំឱ្យមានការរិះគន់យ៉ាងផុសផុល។ លោក សុខា បានបដិសេធការចោទប្រកាន់នេះ។ តុលាការក្រុងភ្នំពេញបានប្រកាសនៅសប្តាហ៍នេះថា លោកនឹងប្រឈមមុខការជំនុំជម្រះទោស ទោះបីកាលបរិច្ឆេទបើកសវនការរបស់លោកមិនទាន់ត្រូវបានប្រកាស។
«ការប៉ុនប៉ងគំរាមកំហែងអ្នកកាសែត»
ក្រុមអង្គការសិទ្ធិមនុស្ស និងអ្នកតស៊ូមតិផ្នែកសារព័ត៌មាន បាននិយាយថា បទចោទប្រកាន់ប្រឆាំងនឹងលោក Peter និង លោក ភាព គឺ«ក្លែងក្លាយ ធ្វើឡើងដោយគ្មានភស្តុតាងច្បាស់លាស់ និងប្រឌិតឡើងទាំងស្រុង»។
ក្រុមអង្គការ និងអ្នកតស៊ូមតិទាំងនោះ បាននិយាយថា ពួកគេគ្រាន់តែធ្វើការងាររបស់ពួកគេជាអ្នកកាសែត។ ពួកគេម្នាក់បានលើកឡើងថា គ្មានអ្វីសង្ស័យឡើយដែលរដ្ឋាភិបាលបានចាត់ទុកពួកគេជាគោលដៅរបស់ខ្លួន ដោយសារតែពួកគេទាំងពីរ រាយការណ៍រឿងរ៉ាវស៊ើបអង្កេតពាក់ព័ន្ធរឿងអាស្រូវ និងអំពើពុករលួយរបស់មូលដ្ឋានទូទៅមួយ។
នាយករងអង្គការឃ្លាំមើលសិទ្ធិមនុស្សប្រចាំតំបន់អាស៊ី លោក Phil Robertson និយាយថា ការស៊ើបអង្កេតរបស់ពួកគេទៅលើកាសែត Daily បានបង្ហាញពីការកាប់ឈើខុសច្បាប់ និងការនាំចេញឈើចេញទៅប្រទេសវៀតណាម រួមទាំងអំពើពុករលួយគ្រប់កម្រិតរបស់រដ្ឋបាលខេត្តរតនគិរី។
លោកនិយាយថា៖ «មន្រ្តីមូលដ្ឋានមានការជំរុញជាក់លាក់មួយក្នុងការព្យាយាមប្រឌិតបទចោទប្រកាន់ក្លែងក្លាយ និងគ្មានភស្តុតាងច្បាស់លាស់»។
លោកនិយាយបន្តថា៖ «ករណីនេះ មានការផ្សំគំនិតរវាងអាជ្ញាធរមូលដ្ឋានដែលមិនចង់ឱ្យអ្នករាយការណ៍ព័ត៌មានស៊ើបអង្កេតជជីកសួរជុំវិញអ្វីដែលបានកើតឡើងនៅជុំវិញមូលដ្ឋានរបស់ពួកគេ និងមន្រ្តីរដ្ឋាភិបាលថ្នាក់ជាតិដែលមិនចូលចិត្តសេចក្តីរាយការណ៍ណាមួយដែលអាចធ្វើឡើងគាំទ្រទៅដល់គណបក្សប្រឆាំង CNRP នៅក្នុងខេត្ត»។
ប្រធានការិយាល័យតំបន់អាស៊ី-ប៉ាស៊ីហ្វិក នៃអង្គការអ្នករាយការណ៍ព័ត៌មានគ្មានព្រំដែន លោក Daniel Bastard លើកឡើងថា៖ «ករណីនេះអាចនឹងប៉ះពាល់ដល់ការអនុវត្តសិទ្ធិត្រួតពិនិត្យដោយខ្លួនឯងកាន់តែធំក្នុងចំណោមក្រុមអ្នកសារព័ត៌មាន ដែលធ្វើឱ្យការរាយការណ៍ព័ត៌មានឯករាជ្យក្នុងប្រទេសកម្ពុជាត្រូវការភាពក្លាហានកាន់តែខ្លាំងឡើងថែមទៀត»។
លោក Bastard បន្ថែមថា៖ «ដំណើរការក្លែងបន្លំនេះ គឺច្បាស់ណាស់ជាវិធីសម្រាប់បក្សពួកលោក ហ៊ុន សែន កត់ចំណាំអ្នកសារព័ត៌មានដែលអាចជាអ្វីដែលពួកគេប្រថុយប្រថាន បើពួកគេហ៊ានរាយការណ៍ដោយឯករាជ្យ»។
នាយកប្រតិបត្តិសម្ព័ន្ធអ្នកកាសែតកម្ពុជា លោក ម៉ៃ ទិត្យថារ៉ា លោកឡើងថា លោក Peter និង អូន ភាព ត្រូវបានគេចាត់ទុកជាមុខសញ្ញា ដោយសារតែពួកគេទាំងពីរនាក់ទៅដល់ទីតាំងមុនពេលបោះឆ្នោតដើម្បី «រាយការណ៍រឿងរ៉ាវពិត ដូច្នេះ ពួកគេនឹងបង្ហាញការពិត»។
លោក ម៉ៃ ទិត្យថារ៉ា និយាយថា៖ «មន្រ្តីរដ្ឋាភិបាលមិនចង់ឃើញដូច្នោះទេ។ សវនាការនេះ ធ្វើឡើងក្នុងគោលបំណងដើម្បីគំរាមកំហែងអ្នកកាសែតដែលកំពុងធ្វើការ។ ពួកគេនឹងខ្លាចក្នុងការធ្វើសេចក្តីរាយការណ៍អំពីរឿងរ៉ាវរសើបៗ»។
លោក ទិត្យថារ៉ា និយាយបន្ថែមថា៖ «ខ្ញុំចង់ឃើញតុលាការធ្វើការតាមវិជ្ជាជីវៈរបស់ពួកគេដើម្បីស្វែងរកយុត្តិធម៌សម្រាប់អ្នកកាសែតទាំងពីររូបនោះ មិនត្រឹមគ្រាន់តែធ្វើសេចក្តីសម្រេចចិត្តដោយគ្មានភស្តុតាងណាមួយនោះទេ»៕
ប្រែសម្រួល៖ សូរ្យ ជ័យឧត្ដម និង ត្រាន់ តិចសេង