ឥណ្ឌូនេស៊ីប្រកាសបន្ថែមនាវាមុជទឹក និងនាវាផ្ទុកយន្តហោះចំនួន៤គ្រឿងបន្ថែមទៀតទៅកាន់កោះណាធូណា(Natuna) ដើម្បីទប់ទល់សកម្មភាពដែលប្រទេសនេះហៅថា ចិនកំពុងឈ្លានពានដែនអធិបតេយ្យភាពរបស់ខ្លួន។
កោះណាធូណា គឺជាកោះមួយដែលឥណ្ឌូនេស៊ីកាន់កាប់ ហើយអះអាងថា ជារបស់ខ្លួនដោយផ្អែកលើប្រវត្តិសាស្ត្រ ច្បាប់ជាតិ និងច្បាប់អន្តរជាតិ។ ប៉ុន្តែចិនអះអាងថា ជាកម្មសិទ្ធិរបស់ខ្លួន ដោយផ្អែកលើប្រវត្តិសាស្ត្រអ្នកនេសាទជនជាតិចិន តែងតែនេសាទនៅតំបន់នេះ។
មេទ័ពជើងទឹករបស់ឥណ្ឌូនេសីលោក Fajar Tri Rohadi ថ្លែងប្រាប់Channel News Asiaថា ពួកគេបន្ថែមនាវាចម្បាំង៤គ្រឿងបន្ថែមលើនាវាចម្បាំង៤គ្រឿងដែលមានស្រាប់ប្រចាំការនៅទីនោះ។
ការបន្ថែមកម្លាំងទ័ពរបស់ឥណ្ឌូនេស៊ីនេះ ធ្វើឡើងបន្ទាប់ពី ទូកនេសាទរបស់ចិនរាប់សិបគ្រឿង រួមទាំងនាវាឆ្នាំសមុទ្ររបស់ចិនបានចូលទៅតំបន់សេដ្ឋកិច្ចផ្តាច់មុខរបស់ឥណ្ឌូនេស៊ីនៅក្បែរកោះណាធូណា ចំនួន៣០ទីតាំង។ ឥណ្ឌូនេស៊ីបញ្ជាក់ថា ទូកនេសាទ និងកម្លាំងល្បាតចិនចូលទៅជិតកោះណាធូណាតាំងពីខែមុន។
លោក Rohadi បញ្ជាក់ថា លោកសង្ឃឹមថា ទូកនេសាទ និង នាវាល្បាតរបស់ចិន ចាកចេញពីដែនអធិបតេយ្យភាពឥណ្ឌូនេស៊ី បើមិនដូច្នេះទេ លោកមិនមានជម្រើសអ្វីក្រៅពីការប្រើកម្លាំង ដើម្បីអនុវត្តន៍ទៅតាមច្បាប់ប្រទេស ដែលមានការទទួលស្គាល់ជាអន្តរជាតិ។
កាលពីសប្តាហ៍មុនរដ្ឋមន្ត្រីការបរទេសឥណ្ឌូនេស៊ី លោកស្រី Retno Marsudi បានធ្វើកំណត់ទូតមួយផ្ញើទៅស្ថានទូតចិនប្រចាំនៅប្រទេសនេះ ប្រឆាំងសកម្មភាពទូកនេសាទ និងកម្លាំងល្បាតរបស់ចិន។លោកស្រីបញ្ជាក់ថា កោះណាធូណា ជាកម្មសិទ្ធិរបស់ឥណ្ឌូនេស៊ីមានការទទួលស្គាល់ដោយច្បាប់អន្តរជាតិរបស់អង្គការសហប្រជាជាតិគឺច្បាប់សមុទ្រច្បាប់១៩៨២ ។
បច្ចុប្បន្នចិនអះអាងថា ផ្នែកជាច្រើននៅសមុទ្រចិនខាងត្បូងដែលសំបូរទៅដោយប្រេង ឧស្ម័ននិងធនធានធម្មជាតិផ្សេងៗទៀតជាកម្មសិទ្ធិរបស់ខ្លួន។ ចិនក៏កំពុងតែមានជម្លោះដណ្តើមដែនសមុទ្រជាមួយប្រទេសជិតខាងរួមទាំងសមាជិកអាស៊ានផងដែរ។
ចិនបានរៀបចំមូលដ្ឋានទ័ព និងដំឡើងកាំភ្លើងធំនៅលើកោះ និងថ្មប៉ប្រាស់ទឹកដែលកំពុងតែមានជម្លោះមិនទាន់ដោះស្រាយចប់។
កាលពីឆ្នាំ២០១៦ ឥណ្ឌូនេស៊ីក៏ធ្លាប់បានចាប់ខ្លួនអ្នកនេសាទចិន ដែលចូលទៅកាន់តំបន់កោះណាធូណា ហើយបានរៀបចំកម្លាំងមូលដ្ឋានទ័ពនៅទីនោះដែរ។
