ក្រុមមេសហជីពអំពាវនាវទៅសមត្ថកិច្ចឱ្យបើកការស៊ើបអង្កេតជាថ្មី ស្វែងរកឃាតករ និងអ្នកបញ្ជាពីក្រោយខ្នងឃាតករសម្លាប់លោក ជា វិជ្ជា យកមកដាក់ទោស ដើម្បីលុបបំបាត់វប្បធម៌និទណ្ឌភាព និងពង្រឹងយុត្តិធម៌នៅកម្ពុជា។
ការអំពាវនាវរបស់ក្រុមមេសហជីពនេះធ្វើឡើងចំគោរពខួប ១៦ឆ្នាំ នៃការបាញ់សម្លាប់លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា។
អនុប្រធានសហជីពសេរីកម្មករ លោក ម៉ាន់ សេងហាក់ បានថ្លែងក្នុងពិធីគោរពវិញ្ញាណក្ខន្ធនៅថ្ងៃនេះថា សំណុំរឿងឃាតកម្មលើលោក ជា វិជ្ជា គិតមកដល់ពេលនេះ មានរយៈពេល ១៦ឆ្នាំហើយ ដែលសមត្ថកិច្ចនៅតែមិនទាន់ស្វែងរកចាប់ខ្លួនឃាតករពិតមកផ្តន្ទាទោសតាមច្បាប់បាននៅឡើយទេ។
មេដឹកនាំសហជីពរូបនេះ ថ្លែងថា កាលពីឆ្នាំ២០១៤ សលាដំបូងរាធានីភ្នំពេញ បានចេញលិខិតមួយស្នើឱ្យអគ្គស្នងការនគរបាលជាតិ ស្រាវជ្រាវ និងស៊ើបអង្កេតរងមុខសញ្ញាជនល្មើស និងប្រមូលភស្តុតាងបញ្ជូនទៅតុលាការវិញ ប៉ុន្តែ រហូតមកដល់ពេលនេះ នៅតែរកមិនឃើញមុខសញ្ញាឃាតករដដែល។
លោក សេងហាក់ បន្ថែមថា នៅឆ្នាំ២០១៧ រដ្ឋាភិបាលបានបង្កើតគណៈកម្មការជាតិត្រួតពិនិត្យការអនុវត្តអនុសញ្ញាអន្តរជាតិខាងការងារមួយទៀត ដែលកម្ពុជាបានផ្តល់សច្ចាប័ន ប៉ុន្តែ រយៈពេល ២ឆ្នាំហើយ គណៈកម្មការនេះ មិនបានហៅសាច់ញាតិរបស់លោក ជា វិជ្ជា ឱ្យចូលរួមផ្តល់ភស្តុតាងនោះឡើយ ហើយក៏មិនបានផ្តល់ព័ត៌មានផ្សេងៗពាក់ព័ន្ធករណីឃាតកម្មករលើអតីតមេដឹកនាំសហជីព លោក ជា វិជ្ជា ឡើយ។
លោក ម៉ាន់ សេងហាក់ ថ្លែងថា៖ «សូមអំពាវនាវ និងសំណូមពរដល់សមត្ថកិច្ចនគរបាលយុត្តិធម៌ ជាពិសេសស្ថាប័នរាជរដ្ឋាភិបាល ត្រូវចាត់ការស៊ើបអង្កេតតាមនីតិវិធី ស្វែងរកមុខឃាតករពិតប្រាកដ និងអ្នកបញ្ជាពីក្រោយខ្នងឃាតករដែលបានសម្លាប់លោក ជា វិជា្ជ យកមកផ្តន្ទាទោសតាមច្បាប់ជាធរមាន»។
ប្រធានសហភាពសហជីពកម្ពុជា លោក រ៉ុង ឈុន ដែលចូលរួមដាក់កម្រងផ្កាគោរពវិញ្ញាណក្ខន្ធលោក ជា វិជ្ជា បានលើកឡើងថា អតីតមេសហជីព លោក ជា វិជ្ជា បានលះបង់ច្រើនណាស់ ដើម្បីការពារផលប្រយោជន៍កម្មករ ទាំងការទាមទារឱ្យមានប្រាក់ឈ្នួលសមរម្យ លក្ខខណ្ឌការងារល្អប្រសើរ កម្មករមានសិទ្ធសេរីភាពល្អ និងទាមទារឱ្យកម្ពុជាមានប្រជាធិបតេយ្យពិតប្រាកដ។
លោក រ៉ុង ឈុន បានឱ្យដឹងថា កាលឆ្នាំ១៩៩៩ លោក ជា វិជ្ជា បានក្លាយជាមេសហជីព គឺមានការគាំទ្រយ៉ាងច្រើនពីក្រុមកម្មករ ហើយលោកបានដឹកនាំកម្មករតវ៉ាទាមទាប្រាក់ឈ្នួលសមរម្យ និងលក្ខខណ្ឌការងារ រហូតមានការគំរាមសម្លាប់ជាបន្តបន្ទាប់ និងត្រូវបានឃាតករបាញ់សម្លាប់នៅឆ្នាំ២០០៤តែម្តង។
លោក រ៉ុង ឈុន ថ្លែងថា៖ «បើគាត់បាត់បង់ជីវិត ពលរដ្ឋទាំងអស់ត្រូវតស៊ូ ធ្វើម៉េចឱ្យប្រទេសកម្ពុជាយើងទទួលបាននូវលទ្ធិប្រជាធិបតេយ្យពិតប្រាកដ។ ពាក្យបណ្តាំមួយទៀត គាត់ថា យើងកុំខ្លាច យើងត្រូវតែតស៊ូដើម្បីលក្ខខណ្ឌការងាររបស់យើង។ បើយើងនៅតែខ្លាច យើងនៅតែភ័យ យើងនៅបន្តរងការជិះជាន់យើងជាប់រហូត»។
ប្រធានសហភាពការងារកម្ពុជា លោក អាត់ ធន់ ដែលចូលគោរពវិញ្ញាណក្ខន្ធលោក ជា វិជ្ជា ដែរ បានរំលឹកទៅរដ្ឋាភិបាលឱ្យពន្លឿនរកឃាតករពិត ដើម្បីផ្តល់យុត្តិធម៌ជូនលោក ជា វិជ្ជា។
មេដឹកនាំសហជីពរូបនេះ បានទាមទារទៅរដ្ឋាភិបាល ត្រូវធានាកុំឱ្យមានករណីប្រើអំពើហិង្សា ការសម្លាប់ ឬការធ្វើទុក្ខបុកម្នេញលើថ្នាក់ដឹកនាំសហជីពតទៅទៀត ខណៈថ្នាក់ដឹកនាំសហជីពជាច្រើន កំពុងរងបណ្តឹងពីនិយោជក ហើយខ្លះទៀតរងអំពើហិង្សា។
លោក អាត់ ធន់ ថ្លែងថា៖ «ក្នុងនាមសហជីព យើងស្អប់បំផុតអំពើលាមក អំពើថោកទាបទាំងឡាយណាដែលប៉ុនប៉ងសម្លាប់ ឬឃាតកម្មសម្លាប់ ឬអំពើហិង្សាផ្សេងៗមកលើថ្នាក់ដឹកនាំសហជីព ទោះបីក្នុងរូបភាពណាក៏ដោយ។ […] អីចឹង រដ្ឋាភិបាលត្រូវធានាកុំមានករណីសម្លាប់ ករណីអំពើហិង្សា ករណីរើសអើងយាយី ករណីរើសអើងលើថ្នាក់ដឹកនាំសហជីពតទៅទៀត»។
អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន ប្រាប់ថា សមត្ថកិច្ចកំពុងរង់ចាំបទបញ្ជាពីតុលាការ ដើម្បីដំណើរការស៊ើបអង្កេតករណីឃាតកម្មនេះបន្តទៀត។
លោក ឆាយ គឹមឃឿន ប្រាប់ថា៖ «រឿងនេះ យើងធ្លាប់បានចាប់ជនសង្ស័យប៉ុន្មាននាក់មួយសារ។ ក្រោយមក រកឃើញថា មិនជាប់ពាក់ព័ន្ធ តុលាការក៏បានដោះលែង ហើយយើងក៏កំពុងរង់ចាំចំណាត់ការតុលាការដែរ។ បើតុលាការដាក់បទបញ្ជាក់មកទៀត យើងនឹងធ្វើទៀត»។
វីអូឌីបានព្យាយាមទាក់ទងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ តាមទូរសព្ទ និងបណ្ដាញសង្គមតេឡេក្រាមផងដែរនៅថ្ងៃនេះ ប៉ុន្តែ លោកមិនបានឆ្លើយតបនោះឡើយ។
អតីតមេដឹកនាំសហជីពសេរីកម្មករ នៃព្រះរាជាណាចក្រកម្ពុជា លោក ជា វិជ្ជា ត្រូវបានខ្មាន់កាំភ្លើងបាញ់សម្លាប់កាលពីដើមឆ្នាំ២០០៤ ខណៈដែលលោកកំពុងអានកាសែតនៅខាងលិចរបងវត្តលង្ការ៕