ក្រសួងសុខាភិបាលកម្ពុជាអះអាងថា លទ្ធផលពិសោធន៍លើកទី១ កាលពីថ្ងៃទី៥ ខែកុម្ភៈ ម្សិលមិញ លើជនជាតិចិនដែលរកឃើញថា ផ្ទុកមេរោគកូរ៉ូណានៅក្នុងខេត្តព្រះសីហនុនោះ គឺរកមិនឃើញមេរោគទៀតទេ។
តាមទំព័រហ្វេកប៊ុករបស់នាយកដ្ឋានប្រយុទ្ធនឹងជំងឺឆ្លង បានបញ្ជាក់ថា លទ្ធផលមន្ទីរពិសោធន៍នៃវិទ្យាស្ថានប៉ាស្ទ័រ លើកទី១ ពិនិត្យលើបុរសជនជាតិអាយុ៦០ឆ្នាំ ឈ្មោះ Jia Jianhua គឺអវិជ្ជមាន បានន័យថា រកមិនឃើញមេរោគ។
ក្រសួង៖ «ជនជាតិចិនដែលឆ្លងមេរោគកូរ៉ូណាវីរុសប្រភេទថ្មី នៅក្រុងព្រះសីហនុ លទ្ធផលមន្ទីរពិសោធន៏បង្ហាញថា អវិជ្ជមានជាលើកទី១ ដោយមន្ទីរពិសោធន៍វិទ្យាស្ថានប៉ាស្ទ័រកម្ពុជា នៅថ្ងៃទី៥ កុម្ភ: ២០២០ តែយើងនៅតែបន្តដាក់គាត់ក្នុងមន្ទីររពេទ្យដដែល បន្តតាមដានសុខភាព»។
ទោះយ៉ាងណា ក្រសួងមិនបានបញ្ជាក់ថា ជនជាតិចិនរូបនេះជាសះស្បើយពីជំងឺ ឬយ៉ាងណាទេ គ្រាន់បញ្ជាក់ថា នៅបន្តរក្សាបុរសរូបនេះនៅដាច់ដោយឡែកពីគេ ដើម្បីបន្តតាមដាន។ ចំពោះការបន្តរក្សាឱ្យនៅដាច់ដោយឡែកនេះ ក៏មិនបានកំណត់ពេលណាត្រូវបញ្ចប់ដែរ។
ក្រសួងសុខាភិបាលកម្ពុជា បានប្រកាសកាលពីថ្ងៃទី២៧ ខែមករា ថា បានរកឃើញមេរោគកូរ៉ូណា លើជនជាតិចិនឈ្មោះ Jia Jianhua នៅក្នុងខេត្តព្រះសីហនុ។ បុរសរូបនេះធ្វើដំណើរមកពីទីក្រុងវូហាន ប្រទេសចិនមកកម្ពុជា ជាមួយក្រុមគ្រួសារ៣នាក់ផ្សេងទៀត។ ក្រសួងសុខាភិបាលបញ្ជាក់ថា ក្រុមគ្រួសារ៣នាក់ផ្សេងទៀតរបស់លោក Jia Jianhua នៅតែបន្តរក្សាទុកឱ្យនៅដាច់ដោយឡែកពីគេ បន្តតាមដាន ទោះរកមិនឃើញមេរោគកូរ៉ូណាក៏ដោយ។
