សហព័ន្ធស្រូវអង្ករកម្ពុជា បានឱ្យដឹងថា រយៈពេល២ខែ ឆ្នាំ២០២០ កម្ពុជានាំចេញអង្ករទៅទីផ្សារអន្តរជាតិ មានការកើនឡើងជាង ២២% បើធៀបនឹងរយៈពេលដូចគ្នាកាលពីឆ្នាំមុន។
នៅក្នុងហ្វេសប៊ុកសហព័ន្ធស្រូវអង្ករកម្ពុជា កាលពីម្សិលមិញថា ក្នុងរយៈពេល២ខែដើមឆ្នាំ២០២០ កម្ពុជាបាននាំអង្ករទៅលក់ក្រៅប្រទេសចំនួន១៣៦ ៤៩៩តោន រួមមាន ទៅកាន់ប្រទេសចិនចំនួន ៣៧% សហគមន៍អឺរ៉ុប រួមទាំងអង់គ្លេស ៣០% ប្រទេសក្នុងសហគមន៍អាស៊ាន ១៨% និងបណ្តាគោលដៅផ្សេងៗមានជាង ១៤%។ តួលេខនេះ មានការកើនឡើងជាង ២២% បើធៀបនឹងរយៈពេល២ខែ ដើមឆ្នាំ២០១៩កន្លងទៅ។
ហ្វេសប៊ុកដដែលបញ្ជាក់ថា ដើមចមដែលនាំឱ្យអង្ករកើនឡើងនេះ ដោយសារទីផ្សារសហគមន៍អឺរ៉ុបអត្រាពន្ធនាំចូលបានធ្លាក់ចុះពី ១៧៥អឺរ៉ូ មក ១៥០អឺរ៉ូ កេរ្តិ៍ឈ្មោះអង្ករកម្ពុជាបានកំពុងកើនឡើង និងទំនាក់ទំនងល្អរបស់លោកនាយករដ្ឋមន្ត្រី ហ៊ុន សែន ជាមួយថ្នាក់ដឹកនាំប្រទេសចិនជាដើម។
អគ្គលេខាធិការ នៃលេខាធិការដ្ឋានសហព័ន្ធស្រូវអង្ករកម្ពុជា លោក លន់ យ៉េង មានប្រសាសន៍បន្ថែមថា អង្ករដែលកម្ពុជានាំទៅក្រៅប្រទេសនោះ រួមមាន អង្ករផ្ការំដួល អង្ករសែនក្រអូប ដែលជាអង្ករប្រភេទលេខ១ជាដើម។ លោករំពឹងថា នៅឆ្នាំនេះ កម្ពុជានឹងនាំចេញអង្ករទៅក្រៅប្រទេស មានការកើនពី ១៥%ឡើងទៅ។
នាយិកាមជ្ឈមណ្ឌលសិក្សា និងអភិវឌ្ឍន៍កសិកម្ម កម្ពុជា (អង្គការ CEDAC) លោកស្រី តុង ចាន់ធៀង បានសាទរនឹងសហព័ន្ធស្រូវអង្ករកម្ពុជា ដែលនាំទៅកាន់ទីផ្សារអន្តរជាតិមានការកើនឡើង។ ប៉ុន្តែ លោកស្រី បង្ហាញការព្រួយបារម្ភថា បើរដ្ឋាភិបាលមិនយកចិត្តទុកដាក់កំណត់តម្លៃឱ្យប្រជាកសិករឱ្យទទួលបានសមរម្យទេ នឹងធ្វើឱ្យពួកគេអាចបោះបង់ការដាំស្រូវ ខណៈកន្លងទៅប្រជាកសិករមួយចំនួនបានត្អូញត្អែរពីតម្លៃស្រូវធ្លាក់ចុះផងដែរ។
លោកស្រីផ្តល់ជាអនុសាសន៍ថា រដ្ឋាភិបាលគួរតែគិតគូរឡើងវិញពីតម្លៃទីផ្សារសម្រាប់កសិករក្នុងស្រុកឱ្យបានសមរម្យ ដើម្បីលើកទឹកចិត្តឱ្យពួកគាត់ប្រកបមុខរបរនេះបានថិតថេរ។
លោកស្រីផ្តល់ជាអនុសាសន៍ថា៖ «ដើម្បីឱ្យកសិករនៅរក្សាផលិតស្រូវបន្តទៀត ទាំងឈ្មួញអ្នកទិញ ទាំងរដ្ឋាភិបាលយើង គួរពិចារណាកំណត់តម្លៃស្រូវអប្បបរមាមួយ ត្រឹមថា កសិករគាត់អាចរួចថ្លៃដើម ឬគាត់អាចចំណេញខ្លះៗតិចតួច ដើម្បីឱ្យគាត់មានទុនសំរាប់ធ្វើបន្តទៀតនៅឆ្នាំខាងមុខ»។
ឆ្លើយតបនឹងករណីនេះ អគ្គលេខាធិការ នៃលេខាធិការដ្ឋានសហព័ន្ធស្រូវអង្ករកម្ពុជា លោក លន់ យ៉េង គាំទ្រនឹងការលើកឡើងរបស់ប្រជាពលរដ្ឋមួយចំនួន ដែលថា ស្រូវដែលផលិតបាន លក់បានតម្លៃទាប [ក្រោម១០០០រៀល ក្នុង១គីឡូក្រាម]។
ប៉ុន្តែ លោក យ៉េង បញ្ជាក់ថា តម្លៃស្រូវទាបដោយសារប្រជាពលរដ្ឋមិនយល់ដឹងពីបច្ចេកទេសជ្រើសរើសពូជ បច្ចេកទេសដាំស្រូវ និងការប្រើប្រាស់ថ្នាំជាដើម។ ករណីនេះ លោកលើកទឹកចិត្តឱ្យពលរដ្ឋនៅទូទាំងប្រទេសចូលរួមជាមួយសហគមន៍ស្រូវអង្ករ ដើម្បីទទួលបានផលច្រើន និងតម្លៃខ្ពស់ផងដែរ។
លោកបញ្ជាក់ថា៖ «គាត់ត្រូវចូលរួមជាមួយសហគមន៍ ឥឡូវសហគមន៍មាននៅទូទាំងប្រទេស មាននៅគ្រប់ស្រុក គ្រប់ឃុំ មានជាង១ពាន់សហគមន៍ យើងនឹងព្យាយាមធ្វើការជាមួយសហគមន៍ឱ្យបានច្រើនបំផុត ហើយភ្ជាប់គាត់ទៅក្នុងកិច្ចសន្យាកសិកម្ម ហើយភ្ជាប់គាត់ទៅជាមួយរោងម៉ាស៊ីន ជាមួយអ្នកនាំចេញ សហគមន៍ហ្នឹង គាត់ផលិត…យ៉ាងហោចណាស់គាត់មានទីផ្សារមួយរឹងមាំ ហើយគាត់ផលិតស្រូវដែលអាចឆ្លើយតបទៅនឹងគុណភាព និងប្រភេទស្រូវដែលទីផ្សារគេត្រូវការ ជាទូទៅធ្វើកិច្ចសន្យាកសិកម្ម វាតម្លៃខ្ពស់ជាងតម្លៃធម្មតាបន្តិច»។
អគ្គលេខាធិការ នៃលេខាធិការដ្ឋានសហព័ន្ធស្រូវអង្ករកម្ពុជា លោក លន់ យ៉េង បានឱ្យដឹងថា ក្នុងឆ្នាំ២០១៨ ការនាំអង្ករនៅកាន់ទីផ្សារអន្តរជាតិចំនួន ៦២៦ ២២៥តោន បើធៀបនឹងឆ្នាំ២០១៩ មានចំនួន ៦២០ ១០៦តោន ពោលធ្លាក់ចុះប្រហែលជា១%៕
