គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ច្រានចោលព័ត៌មានដែលប្រព័ន្ធផ្សព្វផ្សាយមួយចំនួនថា ស្ថាប័នខ្លួនអល់អែកអនុវត្តច្បាប់ ក្រោយពីរកឃើញឈើល្មើសច្បាប់រាប់ពាន់ម៉ែត្រគូបនៅតំបន់កន្ទុយនាគ ខេត្តរតនគិរី។
ក្នុងសេចក្តីប្រកាសព័ត៌មានរបស់គណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ នៅថ្ងៃទី៤ ខែមីនានេះថា ក្រុមការងារស្រាវជ្រាវ និងបង្ក្រាបបទល្មើសធនធានធម្មជាតិ បានចុះទៅតំបន់កន្ទុយនាគ ស្ថិតនៅក្នុងឧទ្យានជាតិវីរៈជ័យ ស្រុកតាវែង ខេត្តរតនគិរី នៅថ្ងៃទី២៩ ខែធ្នូ ឆ្នាំ២០១៩ ហើយបានបញ្ចប់នៅថ្ងៃទី១៦ ខែមករា ឆ្នាំ២០២០។
សេចក្តីប្រកាសព័ត៌មានបញ្ជាក់ថា ក្រោយពីចុះស្រាវជ្រាវ សមត្ថកិច្ចបានចាប់យកឈើល្មើសច្បាប់ (មូល និងឡាំងជ្រុង) សរុបចំនួន២០៦៨កំណាត់ (ឆេះ១៨១កំណាត់) ប្រគល់ជូនអាជ្ញាធរថ្នាក់ខេត្តគ្រប់គ្រង ថែរក្សា ការពារ ដើម្បីកសាងសំណុំរឿងបញ្ជូនទៅតាមនីតិវិធី។ ករណីនេះ សមត្ថកិច្ចអះអាងថា បានអនុវត្តតួនាទី ភារកិច្ចទៅតាមច្បាប់ គឺមិនអល់អែកដូចការផ្សព្វផ្សាយមួយចំនួននោះទេ។
ខ្លឹមសារប្រកាសព័ត៌មានបញ្ជាក់ថា៖ «យើងសូមបញ្ជាក់ថា គណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ បង្កើតដោយសេចក្តីសម្រេចរបស់រាជរដ្ឋាភិបាល គឺអនុវត្តតួនាទី ភារកិច្ចទៅតាមច្បាប់ មានបទល្មើសត្រូវតែបង្ក្រាប មិនមានអ្វីអល់អែកនោះទេ»។
អ្នកនាំពាក្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ លោក អេង ហ៊ី បញ្ជាក់បន្ថែមថា សមត្ថកិច្ចបានយកវត្ថុតាងនៃបទល្មើស សម្រាប់ដាក់ឱ្យដេញថ្លៃ ឬពិគ្រោះថ្លៃជាបន្តបន្ទាប់ ដើម្បីប្រមូលថវិកាជូនជាតិ។ លោកបន្តថា ជាក់ស្តែង ឈើចំនួន៧៣៨៥,៩០៧ម៉ែត្រត្រីគុណ នៅក្នុងខេត្តមណ្ឌលគិរី ខេត្តក្រចេះ និងខេត្តត្បូងឃ្មុំ ត្រូវបានដេញថ្លៃរួចរាល់ ហើយក្រសួងកសិកម្មជាអ្នកដេញថ្លៃបាន។ ប៉ុន្តែ លោកមិនបានបញ្ជាក់ពីចំនួនទឹកប្រាក់ប៉ុន្មាននោះទេ ដោយបង្វែរសំនួរឱ្យទៅសួរក្រសួងកសិកម្មវិញ។
វីអូឌី មិនអាចសុំការបំភ្លឺពីអ្នកនាំពាក្យក្រសួងកសិកម្ម លោក ស្រី វុទ្ធី បានទេនៅរសៀលនេះ ដោយលោកថាជាប់រវល់ប្រជុំ។
មន្ត្រីកម្មវិធីពង្រឹងសិទ្ធិអំណាចសហគមន៍នៃសមាគមការពារសិទ្ធិមនុស្សអាដហុក លោក ប៉ែន ប៊ុណ្ណារ៍ មានប្រសាសន៍ថា ការអនុវត្តច្បាប់របស់មន្ត្រីរដ្ឋ និងស្ថាប័នតុលាការនៅមានកម្រិតនៅឡើយ ទើបបណ្តែតបណ្តោយឱ្យបទល្មើសបំផ្លាញព្រៃឈើបន្តកើតមាន។ លោកផ្តល់ជាអនុសាសន៍ថា សមត្ថកិច្ច និងមន្ត្រីតុលាការ ត្រូវពង្រឹងការអនុវត្តច្បាប់ស្របតាមអភិក្រមរបស់រដ្ឋាភិបាល ទើបទទួលបានផលវិជ្ជមាន។
លោកផ្តល់ជាអនុសាសន៍ថា៖ «ស្ថាប័នទាំងពីរ ត្រូវធ្វើយ៉ាងណាឱ្យមានការផ្តន្ទាទោសឱ្យបានជាក់លាក់ណាមួយ តាំងពីឈ្មោះ [បង្ក្រាបបាន] អ្នកទី១ អ្នកទី២ ហើយបានប្រកាសផ្សាយជាសាធារណៈ យើងបានឃើញនៅតាមទំព័រកាសែត មានឈ្មោះ មានមន្ត្រីជាន់ខ្ពស់ ឧកញ៉ាមានច្រើន ក៏ប៉ុន្តែ យើងអត់ទាន់មានឃើញនរណាម្នាក់ត្រូវទទួលទោសតាមអភិក្រមរបស់សម្តេចតេជោ មានន័យថា ផ្តន្ទាទោសហើយបង្កក រឹបអូសទ្រព្យសម្បត្តិ»។
គណៈកម្មការជាតិដើម្បីទប់ស្កាត់ និងបង្រ្កាបបទល្មើសធនធានធម្មជាតិ អះអាងថា ក្នុងឆ្នាំ២០១៩ បានចាប់ និងបញ្ជូនខ្លួនអ្នកប្រព្រឹត្តបទល្មើសព្រៃឈើចំនួន៥៩នាក់ទៅតុលាការ។
ក្នុងសេចក្ដីប្រកាសព័ត៌មានរបស់គណៈកម្មការជាតិដើម្បីទប់ស្កាត់ និងបង្រ្កាបបទល្មើសធនធានធម្មជាតិ ចេញផ្សាយកាលពីថ្ងៃទី២ ខែកុម្ភៈ ឆ្នាំ២០២០ ឱ្យដឹងថា ក្រៅពីឃាត់ខ្លួនអ្នកប្រព្រឹត្តបទល្មើសព្រៃឈើ គណៈកម្មការនេះ ក៏បានចាប់យកឈើចម្រុះជាង៩ពាន់ម៉ែត្រគូប និងរឹបអូសមធ្យោបាយដឹកជញ្ជូនឈើ ៤៩១គ្រឿង។
គណៈកម្មការជាតិ ឱ្យដឹងថា មធ្យោបាយដឹកជញ្ជូន ៤៩១គ្រឿង ក្នុងនោះមាន រថយន្តបាកុង និងមធ្យោបាយកែច្នៃ ២១២គ្រឿង ត្រូវបានយកទៅបំផ្ទុះ ដុត និងកាត់បំផ្លាញចោលផងដែរ។
របាយការណ៍ក្រសួងបរិស្ថានប្រចាំឆ្នាំ២០១៩ បង្ហាញថា កម្ពុជាមានព្រៃឈើ៥០ភាគរយគ្របដណ្តប់ទូទាំងប្រទេស ដែលជាអត្រាមានព្រៃឈើខ្ពស់ជាងគេនៅតំបន់អាស៊ីអាគ្នេយ៍។
ចំណែករបាយការណ៍អង្គការណាសា កាលពីឆ្នាំ២០១៧ បង្ហាញថា កម្ពុជាមានការកាប់បំផ្លាញព្រៃឈើកាន់តែខ្លាំង ចន្លោះឆ្នាំ២០០១ ដល់២០១៤។ របាយការណ៍បញ្ជាក់ថា ការកាប់បំផ្លាញព្រៃឈើធ្វើឡើងក្រោមរូបភាពផ្តល់ដីសម្បទានសេដ្ឋកិច្ច៕
