ថ្នាក់ដឹកនាំសមាគមខ្មែរក្រោមមួយចំនួនបានលើកឡើងថា កិច្ចព្រមព្រៀងផ្ទេរអ្នកទោស រវាងកម្ពុជា-វៀតណាម អាចជាការធ្វើឡើងតាមការចង់បានរបស់វៀតណាម ហើយពួកគេបារម្ភថា កិច្ចព្រមព្រៀងនេះនឹងអាចប៉ះពាល់ដល់ពលរដ្ឋខ្មែរក្រោមថែមទៀតផង។ ក្តីបារម្ភនេះកើតឡើងក្រោយពេលក្រសួងយុត្តិធម៌បានបញ្ជូនកិច្ចព្រមព្រៀងចំនួន២ទៅរដ្ឋសភាកាលពីថ្ងៃម្សិលមិញ ដោយកិច្ចព្រមព្រៀងមួយក្នុងចំណោម២នោះ គឺជាកិច្ចព្រមព្រៀងផ្ទេរអ្នកទោសរវាងប្រទេសទាំងពីរ។
អគ្គលេខាធិការសមាគមខ្មែរកម្ពុជាក្រោមដើម្បីសិទ្ធិមនុស្ស និងការអភិវឌ្ឍ លោក សឺន ជុំជួន យល់ឃើញថាប្រសិនបើកិច្ចព្រមព្រៀងនេះលេចចេញជាផ្លូវការ ពលរដ្ឋខ្មែរក្រោមដែលមានសញ្ជាតិវៀតណាមនឹងត្រូវបញ្ជូនទៅឃុំខ្លួនបន្តនៅប្រទេសកុម្មុយនិស្តនេះ ហើយនឹងមានការគាបសង្កត់សិទ្ធិសេរីភាពពួកគាត់ធ្ងន់ធ្ងរជាក់ជាមិនខាន។
លោកមានប្រសាសន៍ថា៖ «វាប្រឈម ជាពិសេសសម្រាប់បងប្អូនខ្មែរក្រោមយើង ប្រឈមនៅពេលដែលបញ្ជូនទៅវៀតណាមវិញ គឺត្រូវស្ថិតនៅក្នុងការរឹតបន្តឹងយ៉ាងខ្លាំង ហើយពួកគាត់អាចប្រឈមទៅនឹងការវិនិច្ឆ័យទោសយ៉ាងធ្ងន់ធ្ងរ»។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា កិច្ចព្រមព្រៀងស្តីពីការផ្ទេរទណ្ឌិត ឬអ្នកទោសប្រទេសទាំងពីរ និងកិច្ចព្រមព្រៀងស្តីពីការជួយគ្នាទៅវិញទៅមកលើផ្នែកច្បាប់ក្នុងវិស័យព្រហ្មទណ្ឌផងដែរ បានបញ្ជូនទៅរដ្ឋសភារួចហើយកាលពីថ្ងៃម្សិលមិញ ក្រោយដំណើរការបង្កើតកិច្ចព្រមព្រៀងទាំងនេះអស់រយៈពេលប្រមាណ៣ឆ្នាំ។
លោកថា កិច្ចព្រមព្រៀងនេះ ជាការស្នើឡើងរួមគ្នារវាងរាជរដ្ឋាភិបាលកម្ពុជា និងរដ្ឋាភិបាលវៀតណាម ហើយកិច្ចព្រមព្រៀងនេះ ដើម្បីការពារផលប្រយោជន៍ប្រជាជននៃប្រទេសទាំងពីរ ក្នុងករណីប្រព្រឹត្តបទល្មើស ហើយត្រូវបានកាត់ទោសឱ្យជាប់ពន្ធនាគាររួចរាល់។
មន្ត្រីជាន់ខ្ពស់ក្រសួងយុត្តិធម៌រូបនេះ ថាការព្រួយបារម្ភចំពោះកិច្ចព្រមព្រៀងនេះ នឹងអាចធ្វើទុក្ខបុកម្នេញដល់ពលរដ្ឋខ្មែរកម្ពុជានោះ គឺជារឿងយល់ខុស ប្រាសចាកពីគោលដៅនៃកិច្ចព្រមព្រៀងនោះទាំងស្រុង។
លោកមានប្រសាសន៍ថា៖ «ការព្រួយបារម្ភវាអត់ត្រូវទេ ព្រោះគាត់មិនបានយល់ពីខ្លឹមសារនៃកិច្ចព្រមព្រៀងហ្នឹង។ វា [កិច្ចព្រមព្រៀង] អត់មានទាក់ទងទៅនឹងអ្វីដែលពួកគាត់ព្រួយបារម្ភហ្នឹងផង។ បានន័យថា ការផ្ទេរទណ្ឌិត គឺយើងជាជនល្មើសបានប្រព្រឹត្តបទល្មើស បានន័យថា ត្រូវបានគេផ្តន្ទាទោស និងអនុវត្តទោស។ អីចឹង កិច្ចព្រមព្រៀងនេះ គឺឱ្យប្រទេសសាម៉ី ផ្ទេរពលរដ្ឋគេដែលជាទណ្ឌិត យកមកអនុវត្តទោសនៅប្រទេសដើម ឬប្រទេសកំណើត។ អីចឹង វាអត់មានទាក់ទងការធ្វើទុក្ខបុកម្នេញទៅដល់ខ្មែរកម្ពុជាក្រោមអីនោះទេ។ វាអត់ទាក់ទងសោះតែម្តង »។
ដោយឡែក ប្រធានសមាគមខ្មែរកម្ពុជាក្រោម លោក ថាច់ សេដ្ឋា មើលឃើញថា មូលហេតុដែលជំរុញកិច្ចព្រមព្រៀងនេះចេញរូបរាងនៅពេលនេះ ត្បិតរដ្ឋាភិបាលបច្ចុប្បន្នដឹកនាំដោយឯកបក្ស គ្មានសំឡេងជំទាស់អ្វីទាំងអស់ ដោយថា ជាការធ្វើឡើងតាមការចង់បានរបស់វៀតណាម។ លោកព្រួយបារម្ភចំពោះកិច្ចព្រមព្រៀងទាំងនេះ ត្បិតកន្លងមក ការអនុវត្តច្បាប់របស់អាជ្ញាធរកម្ពុជាមិនបានត្រឹមត្រូវ ហើយតែងធ្វើតាមការស្នើសុំរបស់វៀតណាម ជាហេតុធ្វើឱ្យពលរដ្ឋខ្មែរក្រោមមួយចំនួនរងគ្រោះ។
លោកបន្តថា៖ «អីចឹងដែលយើងមានការបារម្ភ។ ដូច្នេះ ខ្ញុំគ្រាន់តែសំណូមពរទេ ថាបើច្បាប់ហ្នឹងវាឆ្លងដល់ព្រឹទ្ធសភាអនុម័ត សម្រាប់ច្បាប់ស្រុកខ្មែរហើយ ប៉ុន្តែ ត្រូវអនុវត្តស្របតាមរដ្ឋធម្មនុញ្ញកម្ពុជាផង ព្រោះខ្មែរក្រោមហ្នឹងជាខ្មែរទេ មិនត្រូវបានបញ្ជូនទៅវិញ [ប្រទេសវៀតណាម] ដូចជាតិសាសន៍ដទៃទេ»។
អគ្គលេខាធិការ និងជាអ្នកនាំពាក្យរដ្ឋសភា លោក ឡេង ប៉េងឡុង មានប្រសាសន៍ថា ខាងរដ្ឋសភាបានទទួលកិច្ចព្រមព្រៀងទាំងពីរនោះ និងបានបញ្ជូនទៅគណៈកម្មការទី៦ រដ្ឋសភា ដែលជាគណៈកម្មការនីតិកម្ម និងយុត្តិធម៌ ដើម្បីសិក្សាលម្អិត។ លោកថា កិច្ចព្រមព្រៀងបែបនេះ កម្ពុជាចាប់ផ្តើមធ្វើដំបូងគេជាមួយវៀតណាម ហើយគ្រោងនឹងធ្វើជាមួយបណ្តាប្រទេសក្នុងតំបន់អាស៊ាន ក្នុងគោលបំណងដើម្បីប្រយោជន៍ប្រជាជាតិខ្មែរ។
លោកមានប្រសាសន៍ថា៖ «ហើយអីលូវហ្នឹង ទើបតែនឹងធ្វើឡើងជាមួយប្រទេសវៀតណាមទេ។ តាមធម្មតាប្រទេសយើងទាក់ទងគ្នាទាំងអស់ ហើយចៀសមិនរួចពីមានទោសព្រហ្មទណ្ឌ ហើយមានច្បាប់ព្រហ្មទណ្ឌខុសៗគ្នាបន្តិច។ អីចឹង យើងសម្របសម្រួលទាំងច្បាប់ ទាំងនីតិវិធីហ្នឹង ប្រសិនបើធ្វើបាន ដើម្បីការពារសិទ្ធិនិងប្រយោជន៍ប្រជាជនយើង ប្រទេសយើង»។
មុនមានកិច្ចព្រមព្រៀងផ្ទេរអ្នកទោសរវាងប្រទេសទាំងពីរ កម្ពុជា-វៀតណាម ក៏ធ្លាប់បានចុះសន្ធិសញ្ញាមួយកាលពីចុងឆ្នាំ២០១៣ ស្តីពីការផ្តល់បត្យាប័នចាប់បញ្ជូនជនល្មើសឱ្យគ្នាទៅវិញទៅមកតាមការស្នើសុំរបស់ភាគីម្ខាង។
សន្ធិសញ្ញានេះ ធ្វើឡើងក្នុងគោលបំណង សហប្រតិបត្តិការឱ្យមានប្រសិទ្ធភាពក្នុងការបង្ក្រាបបទល្មើសរវាងប្រទេសទាំងពីរ ដោយឈរលើមូលដ្ឋានគោរពអធិបតេយ្យភាព សមភាព និងប្រយោជន៍រួមរវាងប្រទេសទាំងពីរ។ ប៉ុន្តែ សន្ធិសញ្ញានេះ បានបដិសេធការធ្វើបត្យាប័ន ឬការបញ្ជូនខ្លួនសាម៉ីជន ពាក់ព័ន្ធបទល្មើសនយោបាយ បទល្មើសយោធា បទល្មើសដែលមានលក្ខណៈធ្វើទុក្ខបុកម្នេញផ្នែកពូជសាសន៍ ជាតិពិន្ធុ ជំនឿ សាសនា ឬទស្សននយោបាយជាដើម។
យ៉ាងនេះក្តី លោក ជិន ម៉ាលីន ថា ជានីតិវិធី ក្រោយគណៈកម្មការជំនាញសិក្សារួច កិច្ចព្រមព្រៀងទាំងពីរ នឹងត្រូវបញ្ជូនត្រឡប់ទៅគណៈកម្មាធិការអចិន្ត្រៃយ៍វិញ ដើម្បីកំណត់កាលបរិច្ឆេទលើកយកទៅអនុម័តក្នុងកិច្ចប្រជុំពេញអង្គនៃរដ្ឋសភា ព្រមទាំងព្រឹទ្ធសភាផង មុននឹងដាក់ថ្វាយទៅព្រះមហាក្សត្រ ដើម្បីឡាយព្រហស្តលេខាទទួលស្គាល់ជាផ្លូវការ៕
