ក្រុមអ្នកវិទ្យាសាស្រ្តចិនបានព្យាករក្នុងការស្រាវជ្រាវថ្មីមួយថា ការរាតត្បាតនៃមេរោគកូរ៉ូណាថ្មី ឬ កូវីដ១៩ ក្នុងប្រទេសចិន អាចនឹងធ្ងន់ធ្ងរជាងពេលបច្ចុប្បន្ន៣ដង បើរដ្ឋាភិបាលក្រុងប៉េកាំងពន្យារពេលដាក់ចេញវិធានការទប់ស្កាត់ការរីករាលដាល៥ថ្ងៃនោះ។
ការព្យាករនេះ គឺពួកគេធ្វើឡើងដោយផ្អែកលើគោលនយោបាយគ្រប់គ្រងរបស់រដ្ឋាភិបាលចិន ដែលបានចាប់អនុវត្តមុនថ្ងៃទី៩ ខែកុម្ភៈ ក្នុងការប្រយុទ្ធប្រឆាំងមេរោគវាយប្រហារផ្លូវដង្ហើមថ្មី នៅខេត្តហ៊ើប៉ីភាគកណ្តាលប្រទេស។
យោងតាមគណកម្មការសុខាភិបាលចិន គិតត្រឹមថ្ងៃពុធម្សិលមិញ មេរោគកូវីដ១៩បានសម្លាប់មនុស្សនៅចិនជាង៣ពាន់នាក់ និងជាង៨ម៉ឺននាក់ផ្សេងទៀតកំពុងផ្ទុក ក្នុងនោះអ្នកជំងឺជិត៦ពាន់នាក់ស្ថិតក្នុងស្ថានភាពធ្ងន់ធ្ងរ ខណៈពួកគេជាង៥ម៉ឺន២ពាន់នាក់ជាសះស្បើយ។
តាមប្រភពដដែល តួលេខអ្នកស្លាប់ និងឆ្លងថ្មីក្នុង១សប្តាហ៍ចុងក្រោយ បានថមថយជាលំដាប់ ដោយគិតត្រឹម២៤ម៉ោងថ្ងៃម្សិលមិញ ករណីស្លាប់ថ្មីបានថយមកនៅ៣១នាក់ ឯអ្នកឆ្លងថ្មីបានថយមកជាង១៦០នាក់ ខណៈ១សប្តាហ៍មុន អ្នកស្លាប់ថ្មីមានជាង១រយនាក់ ឯអ្នកឆ្លងថ្មីមានរាប់ពាន់នាក់ក្នុង១ថ្ងៃ។
មេរោគកូរ៉ូណាថ្មី ត្រូវបានរកឃើញលើកដំបូងនៅក្រុងវូហាន ខេត្តហ៊ើប៉ី កាលពីចុងឆ្នាំ២០១៩ ហើយបន្ទាប់ពីមើលឃើញការរាតត្បាតក្នុងតំបន់កាន់តែធ្ងន់ធ្ងរ រដ្ឋាភិបាលបានចាត់វិធានការបិទផ្ទប់ចរាចរណ៍ទូទាំងខេត្តដែលមានពលរដ្ឋ៥៨លាននាក់នោះ ចាប់ពីថ្ងៃទី២៣ ខែមករា និងបិទខេត្តក្រុងមួយចំនួនជាបន្តបន្ទាប់ទៀត។
អ្នកវិទ្យាសាស្រ្តផ្លូវដង្ហើម លោក Zhong Nanshan បានប៉ាន់ប្រមាណក្នុងអត្ថបទស្រាវជ្រាវថា បើរដ្ឋាភិបាលចិនពន្យឺតការអនុវត្តវិធានគ្រប់គ្រងការរាតត្បាតរបស់មេរោគត្រឹម៥ថ្ងៃនោះ ការរាលដាលនៅក្នុងតំបន់នឹងធ្ងន់ធ្ងរជាងពេលបច្ចុប្បន្ន៣ដង។
លោកបន្ថែមថា តួលេខករណីស្លាប់ និងឆ្លងថ្មីបានធ្លាក់ចុះចាប់ពីចុងខែកុម្ភៈមក ហើយវានឹងបន្តធ្លាក់ចុះទាបរហូតដល់កម្រិតសូន្យនៅចុងខែមេសា ជាមួយតួលេខឆ្លងពី៩ម៉ឺន ទៅ១២ម៉ឺននាក់។
យ៉ាងណា លោក Zhong ព្រមានថា បើអាជ្ញាធរចិនហ៊ានបន្ធូរវិធានការនៅក្រុងវូហាន នោះការរីករាលដាលក្នុងតំបន់នេះនឹងកើនឡើងវិញនៅពាក់កណ្តាលខែមីនា។
ប្រធានអង្គការសុខភាពពិភពលោក លោក Tedros Adhanom ធ្លាប់លើកឡើងថា លោកមិនបារម្ភចំពោះសមត្ថភាពប្រព័ន្ធសុខាភិបាលចិននោះទេ តែលោកបារម្ភចំពោះប្រទេសដែលមានប្រព័ន្ធសុខាភិបាលខ្សោយ ហើយមិនបានត្រៀមខ្លួនក្នុងការបង្ការ និងទប់ស្កាត់បានល្អ។
លោក Tedros បានថ្លែងក្នុងសន្និសីទកាសែតកាលពីចុងខែកុម្ភៈថា ប្រទេសដែលមិនទាន់រកឃើញករណីឆ្លង ឬឆ្លងថ្មីដូចជា កម្ពុជា ហ្វីលីពីន និងវៀតណាម ជាដើម មិនប្រាកដថា គ្មានករណីឆ្លងកើតឡើងនោះទេ។ លោកថា ការគិតថាប្រទេសខ្លួនមិនកើតមានករណីឆ្លង វាជារឿងដែលខុសឆ្គងដ៏គ្រោះថ្នាក់បំផុត ព្រោះមេរោគឆ្លងនេះគ្មានព្រំដែន ឬបែងចែកជាតិសាសន៍អ្វីឡើយ។
ក្នុងចំណោមប្រទេសសមាជិកអាស៊ានទាំង១០ គឺមានប្រទេសមីយ៉ាន់ម៉ា ប្រ៊ុយណេ និងឡាវ នៅមិនទាន់រកឃើញករណីឆ្លងមេរោគកូវីដ១៩ ខណៈកម្ពុជា វៀតណាម ហ្វីលីពីន បានរកឃើញករណីឆ្លង ប៉ុន្តែ អ្នកជំងឺទាំងនោះត្រូវបានអនុញ្ញាតឱ្យត្រឡប់ទៅផ្ទះវិញហើយ បន្ទាប់ពីឆ្លងកាត់ការព្យាបាលបានជាសះស្បើយ។
ធនាគារពិភពលោកនៅថ្ងៃម្សិលមិញ បានសម្រេចបើកកញ្ចប់ហិរញ្ញប្បទានដំណាក់កាលដំបូងចំនួន១២ពាន់លានដុល្លារ សម្រាប់ជួយប្រទេសកំពុងអភិវឌ្ឍន៍ជាសមាជិក ឱ្យមានលទ្ធភាពចាត់វិធានការជាក់ស្តែងឆ្លើយតប និងកាត់បន្ថយផលប៉ះទង្គិចធ្ងន់ធ្ងរបង្កដោយមេរោគកូវីដ១៩។
នៅក្នុងសេចក្តីប្រកាសព័ត៌មានចេញផ្សាយនៅថ្ងៃពុធរបស់ធនាគារពិភពលោក បានឱ្យដឹងថា កញ្ចប់ហិរញ្ញប្បទាននេះ ក៏នឹងមានអមមកជាមួយនូវការផ្តល់ប្រឹក្សាគោលនយោបាយ និងជំនួយបច្ចេកទេស ដែលផ្អែកលើជំនាញឯកទេសលើសកលលោក និងចំណេះដឹងនៅក្នុងស្រុកតាមប្រទេសនីមួយៗដែរ៕
