ក្រសួងការបរទេសកម្ពុជាថា ទីភ្នាក់ងារសារព័ត៌មានវៀតណាម VNA បានកែសម្រួលអត្ថបទរបស់ខ្លួនហើយបន្ទាប់ពីនាយករដ្ឋមន្ត្រី ហ៊ុន សែន ប្រតិកម្មចំពោះការចុះផ្សាយភ្ជាប់កម្ពុជាជាមួយស្ថានភាពត្រូវប្រុងប្រយ័ត្នខ្ពស់ដោយមេរោគកូរ៉ូណានោះថា ជាចេតនាអាក្រក់។
អ្នកនាំពាក្យក្រសួងការបរទេស លោក កុយ គួង បានបញ្ជាក់ប្រាប់VODថា អត្ថបទដែលVNA បានសរសេរថារដ្ឋាភិបាលវៀតណាមបានដាក់ប្រជាជនកម្ពុជា ចូលក្នុងបញ្ជីប្រទេសដែលត្រូវមានការពិនិត្យសុខភាពមុនចូលប្រទេសខ្លួននោះ ត្រូវបានទីភ្នាក់ងារសារព័ត៌មាននេះកែសម្រួលរួចហើយបន្ទាប់ពីមានប្រតិកម្មពីកម្ពុជា។
លោកសរសេរយ៉ាងខ្លីប្រាប់VODថា៖ «VNA បានកែសម្រួលព័ត៌មានគេហើយ»។
ក្នុងអត្ថបទចេញផ្សាយថ្ងៃទី៦ ខែមីនា ឆ្នាំ២០២០ Vietnam News ដែលជាបណ្ដាញទីភ្នាក់ងារសារព័ត៌មានវៀតណាម(VNA) បានសរសេរអត្ថបទមួយដែលដាក់ចំណងជើងថា «សេចក្តីបញ្ជាក់ស្ថានភាពសុខភាពអនុវត្តសម្រាប់អ្នកធ្វើដំណើរមកពីអឺរ៉ុប និងកម្ពុជា» ដែលក្នុងអត្ថបទនោះបានសរសេរថា៖
«ក្រសួងសុខាភិបាលបានបញ្ជាដល់អភិបាលខេត្ត និងគណៈកម្មការប្រជាជនក្រុង ក្នុងការរៀបចំឱ្យមានការប្រកាសពីស្ថានភាពសុខភាពទាក់ទងនឹងជំងឺCOVID-19 លើអ្នកធ្វើដំណើរមកពីសហភាពអឺរ៉ុប ឬប្រទេសកម្ពុជា ចាប់ពីពាក់កណ្ដាលយប់ថ្ងៃទី៧ មីនាឆ្នាំ២០២០ ទៅ» ។
កាលពីម្សិលមិញ ក្នុងពិធីប្រកាសដាក់ឱ្យប្រើប្រាស់ផ្លូវដែលជាជំនួយពីប្រទេសចិនមួយខ្សែ នៅខេត្តពោធិសាត់ដោយមានឯកអគ្គរដ្ឋទូតចិនចូលរួមផងនោះ លោកនាយករដ្ឋមន្ត្រី ហ៊ុន សែន បានថ្លែងថា កាលពីថ្ងៃសៅរ៍ និងថ្ងៃអាទិត្យ លោកបានបញ្ជាដល់រដ្ឋមន្ត្រីក្រសួងការបរទេស ឱ្យតវ៉ាទៅវៀតណាមចំពោះការចុះផ្សាយបែបនេះ ដោយថា ជាព័ត៌មានដែលមានចេតនាអាក្រក់។
លោក ហ៊ុន សែន៖ «បើយោងទៅលើអ្វីដែលស្ថានទូតវៀតណាមបញ្ជូនមកក្រសួងការបរទេស គណៈការពារសុខភាពរបស់វៀតណាម គេណែនាំឱ្យមានការពង្រឹងសុវត្ថិភាពនៃការចេញចូលប្រទេសគេ គ្រប់ជាតិទាំងអស់។ ប៉ុន្ដែ បែរជាសារព័ត៌មានVNA របស់វៀតណាម ថារឹតបន្ដឹងចំពោះពលរដ្ឋដែលមកពីអឺរ៉ុប និងកម្ពុជា។ អ៊ីចឹង កម្ពុជាត្រូវចូលក្នុងចំណាត់ថ្នាក់ដែលវៀតណាមដាក់ឱ្យនៅជាមនុស្សចម្លែក អ៊ីចឹង ខ្ញុំអត់ព្រមទេ!»
អ្នកតាមដាននយោបាយកម្ពុជា លោក ឯម សុវណ្ណរ៉ា យល់ថា ការប្រកាសរបស់លោកនាយករដ្ឋមន្ត្រី ហ៊ុន សែន នេះ មានចេតនាក្នុងការបំបាត់ការសង្ស័យ និងការភ័យខ្លាចរបស់ពលរដ្ឋ ហើយការប្រកាសនៅចំពោះមុខទូតចិននេះ គឺលោក ហ៊ុន សែន មានបំណងបញ្ជាក់ថា ក្នុងនាមជាមិត្តដែកថែបជាមួយកម្ពុជា គឺចិនមិនដែលធ្វើរឿងថ្នាំងថ្នាក់ដល់កម្ពុជាឡើយ។
លោក ឯម សុវណ្ណរ៉ា៖ «ចង់បញ្ជាក់ទៅវៀតណាមថា កម្ពុជាមិនមែនជាប្រទេសដែលមានហានិភ័យនោះទេ ហើយកម្ពុជានៅបន្តកិច្ចសហប្រតិបត្តិការ និងពាណិជ្ជកម្មជាមួយវៀតណាមច្រើនណាស់ វាត្រូវអាស្រ័យលើផលប្រយោជន៍គ្នាទៅវិញទៅមក អ៊ីចឹងបានជានាយករដ្ឋមន្ត្រីគាត់ប្រកាស។ តែការប្រកាសនៅមុខចិនហ្នឹងគឺចង់បញ្ជាក់ថា កម្ពុជា-ចិន កន្លងមកគឺជាមិត្តដែកថែប និងល្អូកល្អឺន ហើយវៀតណាមល្អូកល្អឺនដែរ តែបង្កឱ្យមានបញ្ហានៅលើកាសែតរបស់ខ្លួន»។
ក្នុងអត្ថបទដែលធ្វើការកែតម្រូវនៅថ្ងៃទី៧ ខែមីនា វេលាម៉ោង១០ និង៤១នាទី សារព័ត៌មានVietnam News បានកែអត្ថបទទាំងស្រុងរបស់ខ្លួន ដោយបានដាក់ចំណងជើងថា Compulsory e-health declaration for all passengers entering Việt Nam ដែលមានន័យថា ការពិនិត្យសុខភាពអេឡិចត្រូនិចជាកាតព្វកិច្ចសម្រាប់អ្នកដំណើរទាំងអស់ដែលចូលទៅប្រទេសវៀតណាម ដែលសំដៅទៅលើអ្នកដំណើរចូលប្រទេសវៀតណាមទាំងអស់តម្រូវឱ្យធ្វើការពិនិត្យសុខភាពពាក់ព័ន្ធនឹងជំងឺ Covid-19 មុនឈានជើងចូលប្រទេសវៀតណាម។ ការកែតម្រូវនេះនេះក្រោយតែមួយថ្ងៃប៉ុណ្ណោះ ក្រោយពីចេញអត្ថបទមុនដែលធ្វើឱ្យនាយករដ្ឋមន្ត្រី ហ៊ុន សែន ប្រតិកម្ម៕
