ធនាគារអភិវឌ្ឍន៍អាស៊ី (ADB) បានព្យាករថា ឥទ្ធិពលនៃជំងឺ COVID-19 នឹងអាចនាំឱ្យកម្ពុជាខាតបង់ថវិកាយ៉ាងតិចណាស់ជិត៣៥០លានដុល្លារក្នុងឆ្នាំ២០២០នេះ ហើយទំហំនៃការខូចខាតមកលើសេដ្ឋកិច្ចប្រទេសមួយនេះ អាចមានទំហំកាន់តែធំថែមទៀត។
ធនាគារ ADB បានលើកឡើងបែបនេះនៅក្នុងរបាយការណ៍សង្ខេបរបស់ខ្លួនមានចំណងជើងថា «អ្វីជាផលប៉ះពាល់ផ្នែកសេដ្ឋកិច្ចបណ្ដាលមកពីការរីករាលដាលនៃ COVID-19 នៅអាស៊ី» ចេញកាលពីសប្ដាហ៍មុន ដែលបានព្យាករពីផលប៉ះពាល់មកលើសេដ្ឋកិច្ចរបស់ប្រទេសទាំងអស់ក្នុងតំបន់អាស៊ី បណ្ដាលពី COVID-19។
ABD លើកឡើងថា ការរីករាលដាលនៃ COVID-19 កំពុងប៉ះពាល់ដល់ចិន និងបណ្តាប្រទេសកំពុងអភិវឌ្ឍន៍នៅអាស៊ី រួមមានការធ្លាក់ចុះយ៉ាងខ្លាំងនូវតម្រូវការក្នុងស្រុក ការថយចុះនៃសកម្មភាពទេសចរណ៍ និងការធ្វើពាណិជ្ជកម្ម ព្រមទាំងបង្អាក់ការផ្គត់ផ្គង់វត្ថុធាតុដើម និងផលប៉ះពាល់សុខភាពសាធារណៈ។
ABD លើកឡើងបន្តថា ការរីករាលដាលនៃមេរោគ COVID-19 នឹងធ្វើឱ្យប៉ះពាល់ខ្លាំងដល់ប្រទេសកំពុងអភិវឌ្ឍន៍ ក្នុងនោះរួមទាំងកម្ពុជាផងដែរ។
បើតាមADB ផលិតផលក្នុងស្រុកសរុប (GDP) របស់កម្ពុជា អាចនឹងខាតបង់ប្រមាណជាង ១.៤០ភាគរយ ឬស្មើនឹងទឹកប្រាក់ប្រមាណជាង ៣៤៥.៧លានដុល្លារ ក្នុងករណីមានផលប៉ះពាល់កម្រិតតិចបំផុត។
របាយការណ៍ដដែលនេះ ប៉ាន់ប្រមាណទៀតថា សេដ្ឋកិច្ចកម្ពុជា អាចនឹងខាតបង់កំណើនប្រមាណជិត ២ភាគរយ ឬស្មើនឹងជាង ៤៧៣លានដុល្លារ ក្នុងករណីមានផលប៉ះពាល់កម្រិតមធ្យម ហើយកំណើនសេដ្ឋកិច្ចកម្ពុជា អាចនឹងបាត់បង់ក្នុងរង្វង់ជិត ៣.៥ភាគរយ ក្នុងករណីផលប៉ះពាល់មានកម្រិតខ្ពស់។
ធនាគារអភិវឌ្ឍន៍អាស៊ី ADB បានកត់សម្គាល់ក្នុងសេចក្តីសង្ខេបរបស់ខ្លួនថា៖ «របាយការណ៍នេះ គឺធ្វើឡើងក្នុងបំណងឱ្យអ្នករៀបចំគោលនយោបាយនៃបណ្ដាប្រទេសនីមួយៗរៀបចំយុទ្ធសាស្ត្រនានាក្នុងការបង្ការហានិភ័យ និងឆ្លើយតបឱ្យទាន់ពេលវេលា»។
មន្ត្រីជាន់ខ្ពស់រដ្ឋាភិបាលកម្ពុជា បានទទួលស្គាល់ពីផលប៉ះពាល់មកលើវិស័យឧស្សាហកម្មកាត់ដេររបស់កម្ពុជា ដែលបណ្ដាលមកពីការផ្ទុះឡើង និងការរីករាលដាលនៃមេរោគកូរ៉ូណាថ្មី ដែលវាយប្រហារទៅលើសង្វាក់នៃការផ្គត់ផ្គង់វត្ថុធាតុដើមពីប្រទេសចិន។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានប្រាប់ថា រោងចក្រកាត់ដេរសម្លៀកបំពាក់ និងស្បែកជើងសរុប ៣៣ហើយ បានស្នើសុំព្យួរកិច្ចសន្យាការងាររយៈពេល ២សប្ដាហ៍ គិតត្រឹមសប្ដាហ៍ទីមួយនៃខែមីនានេះ (ថ្ងៃទី០៤ ខែមីនា)។
បើតាមមន្ត្រីជាន់ខ្ពស់រដ្ឋាភិបាលរូបនេះ កម្មករនិយោជិតចំនួន ១៧,០៩៦នាក់ នៃចំនួនកម្មករនិយោជិតបម្រើការងារ ៦២,០៨៧នាក់ ដែលបម្រើការងារនៅរោងចក្រទាំង ៣៣នោះ នឹងត្រូវផ្អាកការងារ ដោយសារតែកង្វះខាតវត្ថុធាតុដើមដែលនាំចូលពីប្រទេសចិន ជាទីដែលមេរោគកូរ៉ូណាថ្មីបានផ្ទុះឡើង និងរីករាលដាលទូទាំងពិភពលោកចាប់តាំងពីចុងឆ្នាំមុនមក។
គិតត្រឹមថ្ងៃនេះ កម្ពុជាបានប្រកាសពីការរកឃើញការឆ្លងមេរោគកូរ៉ូណាថ្មីចំនួន ៣ករណី ដែលករណីដំបូងត្រូវបានរកឃើញលើបុរសជនជាតិចិនម្នាក់ដែលធ្វើដំណើរចូលមកខេត្តព្រះសីហនុ កាលពីខែមករាកន្លងមក ករណីទីពីរ ត្រូវបានរកឃើញលើបុរសកម្ពុជានៅខេត្តសៀមរាប និងករណីថ្មីបំផុត ត្រូវបានរកឃើញលើស្ត្រីជាពលរដ្ឋអង់គ្លេសម្នាក់វ័យ ៦៥ឆ្នាំ ដែលបានធ្វើដំណើរកម្សាន្តតាមនាវាលើផ្ទៃទន្លេមេគង្គ ចាកចេញពីប្រទេសវៀតណាមមកដល់ខេត្តកំពង់ចាម។
លោកនាយករដ្ឋមន្ត្រី ហ៊ុន សែន បានថ្លែងជាសាធារណៈកាលពីខែមុនថា ការឆ្លងរីករាលដាលនៃមេរោគកូរ៉ូណាថ្មីនេះ កំពុងតែវាយប្រហារដោយផ្ទាល់ទៅវិស័យទេសចរណ៍កម្ពុជា ដែលទទួលបានភ្ញៀវទេសចរចិនដល់ទៅជាង ៣០ភាគរយនៃភ្ញៀវទេសចរបរទេសសរុបចូលមកលេងកម្ពុជា។
អ្នកនាំពាក្យក្រសួងទេសចរណ៍ លោក តុប សុភក្តិ ថ្លែងប្រាប់វីអូឌីថា ចំនួនទេសចរមកកាន់កម្ពុជា កំពុងស្ថិតក្នុងនិន្នាការធ្លាក់ចុះជាលំដាប់ចាប់តាំងពីផ្ទុះជំងឺនេះនៅដើមខែមករាមក។ លោកថា វិស័យទេសចរណ៍កំពុងរងផលប៉ះពាល់ខ្លាំង ពិសេសតំបន់ដែលពឹងលើភ្ញៀវទេសចរជនជាតិចិនតែម្តង។
លោក តុប សុភក្តិ ប្រាប់ថា៖ «ទេសចរណ៍យើងជួបបញ្ហាខ្លាំង ដូចយ៉ាងនៅសៀមរាបហ្នឹង ភ្ញៀវធ្លាក់ៗមែនទែន។ បើនិយាយពីភ្ញៀវចិនវិញ នៅសៀមរាប ធ្លាក់រហូតដល់ជាង ៩០ភាគរយ ចំណែកភ្ញៀវផ្សេងវិញក៏ធ្លាក់ខ្លាំងណាស់ដែរ។ សណ្ឋាគារ ផ្ទះសំណាក់ និងអ្នករកទទួលទានលើវិស័យនេះ កំពុងលំបាកក្នុងពេលផ្ទុះជំងឺនេះ»។
ទោះជាយ៉ាងណាក្ដី កាលពីថ្ងៃទី១០ ខែមីនា លោកនាយករដ្ឋមន្ត្រី ហ៊ុន សែន បានប្រកាសថា កម្ពុជាត្រៀមថវិកាចន្លោះពី ៨០០លានដុល្លារ ទៅ ២ពាន់លានដុល្លារ ដើម្បីឆ្លើយតបនឹងបញ្ហាប្រឈមផ្នែកសេដ្ឋកិច្ច និងសុខភាពសាធារណៈ។
លោក ហ៊ុន សែន៖ «យើងមានសេណារីយ៉ូទប់ទល់នឹងកូវីដ១៩នេះ។ បើកូរ៉ូណាអូសបន្លាយរយៈពេល ៦ខែ យើងត្រៀម ៨០០លានដុល្លារ ដើម្បីស្រោចស្រង់សេដ្ឋកិច្ច។ យើងក៏បានប៉ាន់ស្មានថា សេដ្ឋកិច្ចធ្លាក់កំណើនប៉ុណ្ណា ផលប៉ះពាល់ធំប៉ុណ្ណា? បើវាកើតដល់ ១ឆ្នាំ យើងត្រូវប៉ះប៉ូវនូវទំហំទឹកប្រាក់ប៉ុណ្ណា? អ៊ីចឹង វាស្ថិតនៅចន្លោះពី ៨០០លានទៅ ២ពាន់លានប៉ុណ្ណឹង បើវាអូសបន្លាយដល់ ១ឆ្នាំ។ ខ្ញុំគិតថា ពិភពលោកនឹងខិតខំដោះស្រាយបញ្ហានេះ»។
ក្នុងសន្និសីទសារព័ត៌មានកាលពីចុងខែកុម្ភៈកន្លងមកនេះ អគ្គលេខាធិការនៃក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន បានថ្លែងថា សេដ្ឋកិច្ចកម្ពុជានៅឆ្នាំនេះ នឹងកើនឡើងក្នុងរង្វង់ ៦ភាគរយ ដែលទាបជាងអត្រាកំណើន ៦.៨ភាគរយ ដែលត្រូវបានព្យាករទុកនៅមុនការផ្ទុះឡើងនៃមេរោគកូរ៉ូណាថ្មីនេះ។
ការថមថយនៃកំណើនសេដ្ឋកិច្ចកម្ពុជាបែបនេះ ត្រូវបានមន្ត្រីសេដ្ឋកិច្ចរូបនេះបញ្ជាក់ថា បណ្ដាលមកពីការផ្ទុះឡើង និងការរីករាលដាលនៃមេរោគកូរ៉ូណាថ្មី និងមួយផ្នែកទៀតបណ្ដាលមកពីការដកហូតមួយផ្នែកនៃប្រព័ន្ធអនុគ្រោះពន្ធ«អ្វីគ្រប់យ៉ាងលើកលែងតែអាវុធ» (EBA) ដែលសហភាពអឺរ៉ុបផ្ដល់មកកម្ពុជា។
អ្នកស្រាវជ្រាវនៃរាជបណ្ឌិតសភាកម្ពុជា លោកបណ្ឌិត គី សេរីវឌ្ឍន៍ លើកឡើងថា បញ្ហាមេរោគកូវីដ១៩នេះ ជាបញ្ហារបស់សកលលោក ដែលទាមទារឱ្យប្រទេសទាំងអស់រួមគ្នាដោះស្រាយ។ លោកថា ជំងឺនេះបង្កឱ្យប៉ះពាល់ជំហានដំបូងដល់សេដ្ឋកិច្ច និងពាណិជ្ជកម្មកម្ពុជា។
លោក គី សេរីវឌ្ឍន៍ ប្រាប់ថា៖ «រដ្ឋាភិបាលកម្ពុជាត្រូវរៀបចំខ្លួនឱ្យបានល្អមែនទែនចំពោះបញ្ហានេះ។ សំខាន់ រដ្ឋាភិបាលត្រូវប្រឈមនឹងការចំណាយខ្ពស់ដើម្បីទប់ទល់នឹងកូវីដនេះ។ កម្ពុជាត្រូវធ្វើពិពិធកម្មសេដ្ឋកិច្ចរបស់ខ្លួនឱ្យទាន់ពេលវេលា ទាន់សភាពការណ៍»។
ទិន្នន័យពីអង្គការសុខភាពពិភពលោក (WHO) បង្ហាញថា គិតមកដល់ថ្ងៃទី១១ ខែមីនា ការរីករាលដាលនៃកូវីដ១៩នេះ កើតឡើងដល់ចំនួនជិត ១២ម៉ឺននាក់ (១១៩,២២០ករណី) ហើយនៅទូទាំងសកលលោក ខណៈអ្នកស្លាប់មាន ៤,២៩៩នាក់ និងករណីអ្នកជំងឺជាសះស្បើយមានចំនួន ៦៦,៥៦៨នាក់។
សេចក្ដីសង្ខេបរបស់ ADB បញ្ជាក់ថា ទំហំនៃផលប៉ះពាល់សេដ្ឋកិច្ច នឹងអាស្រ័យលើរបៀបដែលការផ្ទុះឡើងនៃមេរោគ COVID-19 នៅតាមបណ្ដាប្រទេសនីមួយៗ។ ADB បង្ហាញថា ការផ្ទុះ COVID19 នាំឱ្យប៉ះពាល់សេដ្ឋកិច្ចជាសកលមានទំហំពី ៧៧ពាន់លានដុល្លារ ទៅ ៣៤៧ពាន់លានដុល្លារ ឬស្មើនឹង ០,១ភាគរយ ទៅ ០,៤ភាគរយ នៃទំហំសេដ្ឋកិច្ចពិភពលោកទាំងមូល៕
