ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លើកឡើងថា រដ្ឋាភិបាលតែងតែគោរពនូវសិទ្ធិបញ្ចេញមតិរបស់ពលរដ្ឋលើកិច្ចការដឹកនាំរដ្ឋរបស់រដ្ឋាភិបាល តែលោកថា ការផ្សព្វផ្សាយព័ត៌មានមិនពិតពីស្ថានភាពមេរោគកូវីដ១៩ មិនមែនជាសិទ្ធិនៃការបញ្ចេញមតិទេ គឺជាបទល្មើសបង្កភាពវឹកវរដល់សង្គមទៅវិញ។
ថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៩ របស់រដ្ឋបាលខេត្តព្រៃវែង នៅព្រឹកថ្ងៃទី១២ ខែមីនានេះ លោក ស ខេង បានថ្លែងថា រដ្ឋាភិបាលគោរពសិទ្ធិបញ្ចេញមតិរបស់ពលរដ្ឋតាមលទ្ធិប្រជាធិបតេយ្យ តែសុំឱ្យពលរដ្ឋបែងចែកឱ្យច្បាស់រវាងការបញ្ចេញមតិទិតៀន និងការផ្សាយព័ត៌មានមិនពិត។ លោកបន្ថែមថា ការផ្សាយព័ត៌មានមិនពិតនេះហើយដែលលោកចាត់ទុកជាការធ្វើឱ្យប៉ះពាល់ដល់ប្រយោជន៍រួម និងសង្គម ដែលត្រូវមានវិធានការ។
លោកថា៖ «គាត់បញ្ចេញមតិបាន តែសូមកុំភ្លេចថា មតិរបស់យើងបញ្ចេញទៅហ្នឹងល្អ ឬមិនល្អសម្រាប់សង្គម។ បើធ្វើទៅឱ្យវាវឹកវរ ធ្វើឱ្យច្របូលច្របល់ អាហ្នឹងកុំថាសិទ្ធិមកប្រើ មកសំអាងថាហ្នឹងជាសិទ្ធិសេរីភាព វាមិនត្រូវទេ! អាចទិតៀនរដ្ឋាភិបាលថា រដ្ឋាភិបាលមិនបានយកចិត្តទុកដាក់អញ្ចេះមួយអញ្ចេះពីរបាន គឺអត់អីទេ តែបើផ្សាយព័ត៌មានមិនពិត គឺរឿងមួយផ្សេងទៀត»។
ការលើកឡើងរបស់លោក ស ខេង បែបនេះ គឺក្នុងពេលដែលរដ្ឋាភិបាលចាប់ផ្ដើមមានវិធានការជាបន្តបន្ទាប់លើអ្នកចែកចាយព័ត៌មានមិនពិតពីជំងឺកូវីដ-១៩ (COVID-19) នៅលើបណ្ដាញសង្គម។
វិធានការនេះគឺបន្ទាប់ពីលោកនាយករដ្ឋមន្ត្រី ហ៊ុន សែន បានចាត់ទុកអ្នកបំផុសព័ត៌មានមិនពិតពីករណី Covid-19 គឺជាភេរវករកាលពីថ្ងៃទី២ ខែមីនាកន្លងទៅ។
លោក ហ៊ុន សែន៖ «ការបំផុសព័ត៌មានដ៏អាក្រក់ពីជនទុច្ចរិត នៅខាងមុខ ខ្ញុំនឹងចាត់ទុកអ្នកឯងថា ជាពួកភេរវករ ព្រោះការបំផុសព័ត៌មានពីការដួលស្លាប់អាជំងឺ COVID-19 នេះ វាអត់មាននរណាទៅប្រកាច់ងាប់ទេ កុំឆ្ងល់។ វាមិនមែនដើរតុកៗទៅដួលងាប់ដូចដាច់សរសៃឈាមទេ ដើរទៅសួរលើពិភពលោកទៅ»។
រហូតមកដល់ពេលនេះ មានមនុស្សយ៉ាងហោចណាស់៦នាក់ហើយដែលត្រូវចាប់ខ្លួន និងធ្វើកិច្ចសន្យាពាក់ព័ន្ធនឹងការបង្កើតព័ត៌មានពីជំងឺកូវីដ-១៩ (COVID-19)នេះ ក្នុងនោះមាន២នាក់ត្រូវបញ្ជូនទៅតុលាការ។ អ្នកដែលត្រូវចាប់បញ្ជូនខ្លួនទៅតុលាការពាក់ព័ន្ធករណីនេះ មានម្នាក់ឈ្មោះ កូយ សំអាត នៅភ្នំពេញ និងម្នាក់ទៀតឈ្មោះ ភុត ថុនា នៅសៀមរាប។
អនុប្រធានអង្គការលីកាដូ លោក អំ សំអាត យល់ថា រដ្ឋាភិបាលគួរបែងចែកឱ្យច្បាស់ពីសេរីភាពនៃការបញ្ចេញមតិ និងបទល្មើស។ លោកបន្ថែមថា ការគ្រាន់តែបញ្ចេញនូវយោបល់របស់ខ្លួន ក៏ត្រូវរងនូវការចោទប្រកាន់នោះ វានឹងធ្វើឱ្យពលរដ្ឋលែងហ៊ានបញ្ចេញយោបល់ក្នុងសង្គមតទៅទៀត។
លោក អំ សំអាត៖ «បើយើងបែងចែកសេរីនៃការបញ្ចេញមតិ និងបទល្មើសមិនដាច់ទេ អាហ្នឹងគឺហានិភ័យនៃសេរីភាពនៃការបញ្ចេញមតិនៅតែមានបន្តទៀត ហើយនៅតែមានការភ័យខ្លាច»។
ក្នុងសេចក្ដីសម្រេចចុះថ្ងៃទី១១ ខែមីនា ក្រសួងព័ត៌មានបានឱ្យដឹងថា ក្រសួងសម្រេចបង្កើតគណៈកម្មការតាមដានការផ្សព្វផ្សាយព័ត៌មានក្លែងក្លាយ ដែលមានសមាសភាពជាង៧០នាក់ក្នុងការតាមដាន និងរាយការណ៍ព័ត៌មានក្លែងក្លាយ និងកំណត់អត្តសញ្ញាណអ្នកផ្សព្វផ្សាយ ដើម្បីសហការជាមួយស្ថាប័នមានសមត្ថកិច្ច ចាត់វិធានការតាមផ្លូវច្បាប់ផងដែរ។
អ្នកនាំពាក្យក្រសួងព័ត៌មាន លោក ផុស សុវណ្ណ ក៏បានលើកឡើងថា ជាទូទៅក្រសួងតែងតែប្រកាន់នូវគោលការណ៍អប់រំជាជាងវិធានការក្ដៅដល់អ្នកសរសេរ ឬបង្ហោះលើអ៊ិនធឺណិត តែលោកថា នៅពេលដែលព័ត៌មានមិនពិតត្រូវបានបង្កើតកាន់តែច្រើន គឺរដ្ឋាភិបាលត្រូវមានវិធានការខ្លះហើយ ដើម្បីការពារកុំឱ្យមានទំនោរនេះកើតឡើងនាថ្ងៃអនាគតទៀត។
លោកថា៖ «កន្លងទៅ សម្តេចនាយករដ្ឋមន្ត្រីធ្លាប់ធ្វើការអំពាវនាវច្រើនជាមួយសារព័ត៌មាន ហើយក៏ចាត់ចំណាត់ថ្នាក់អ្នកដែលបំផុសព័ត៌មាន ឬដំណឹងក្លែងក្លាយស្ទើរតែជាភេរវករ។ បើសិនយើងយោងតែអនុសាសន៍មួយនេះ គឺយើងអាចកៀរគរកម្លាំងមកធ្វើបានហើយ តាំងពីអាវុធហត្ថ ឬក៏ក្រសួងយុត្តិធម៌ចូលរួម»។
នាយិកាប្រតិបត្តិនៃអង្គការក្រុមការងារដើម្បីដោះស្រាយទំនាស់ កញ្ញា ស្រី សុធាវី មានប្រសាសន៍ថា វាជាការត្រឹមត្រូវដែលរដ្ឋមានវិធានការនេះ តែកញ្ញាមិនគាំទ្រចំពោះការចាត់វិធានការផ្លូវច្បាប់នោះទេ ដោយសារវានឹងធ្វើឱ្យប៉ះពាល់ដល់សិទ្ធិបញ្ចេញមតិរបស់ពលរដ្ឋធ្ងន់ធ្ងរ។
កញ្ញា ស្រី សុធាវី៖ «អ្វីដែលរដ្ឋាភិបាលគាត់គួរតែយកចិត្តទុកដាក់គឺ សំដែងនូវអ្វីដែលជាការស្មោះត្រង់ជាមួយប្រជាពលរដ្ឋ ហើយធ្វើការផ្សព្វផ្សាយនូវអ្វីដែលជាការត្រឹមត្រូវសម្រាប់ប្រជាពលរដ្ឋ ឱ្យគាត់យល់ដឹងពីការទប់ស្កាត់ ហើយយល់ដឹងកុំឱ្យមានការភ័យខ្លាចក្នុងដំណើរការហ្នឹង។ ហើយខ្ញុំគិតថា ពេលខ្លះអ្វីដែលពលរដ្ឋគាត់បញ្ចេញមតិ ក៏ចេះតែមានការចោទប្រកាន់ ឬក៏ដាក់បន្ទុកលើគ្នាតាមផ្លូវច្បាប់ ឬមានវិធានការអីមើលទៅវាអត់សមហេតុផល បើយើងនិយាយអំពីសិទ្ធិបញ្ចេញមតិ»។
រហូតមកដល់ពេលនេះ ក្រសួងសុខាភិបាលកម្ពុជាបានរកឃើញអ្នកជំងឺកូវីដ-១៩ (COVID-19) ចំនួន៦នាក់ហើយ ក្នុងនោះមានជនជាតិខ្មែរម្នាក់ដែលនៅខេត្តសៀមរាប បន្ទាប់ពីមានការប្រកាសពីការរកឃើញនេះ ពលរដ្ឋខ្មែរមួយចំនួនបាននាំគ្នាទៅរកទិញស្បៀងអាហារ និងម៉ាស់ស្តុកទុកនៅផ្ទះរៀងខ្លួន ដែលសកម្មភាពនេះត្រូវបានលោកនាយករដ្ឋមន្ត្រីចាត់ទុកថា ជាការភ័យខ្លាចជ្រុលហួសហេតុ និងអំពាវនាវឱ្យពលរដ្ឋមានការស្ងប់ចិត្តទុកចិត្តលើរដ្ឋាភិបាលលោកផងដែរ៕
