ភរិយាលោកនាយករដ្ឋមន្រ្តីកាណាដា Justin Trudeau លោកស្រី Sophie Grégoire ត្រូវបានពិនិត្យឃើញមានផ្ទុកមេរោគកូវីដ១៩ នៅថ្ងៃម្សិលមិញ បន្ទាប់ពីលោកស្រីលេចអាការផ្តាសាយ និងក្តៅខ្លួន។
តាមសេចក្តីរាយការណ៍របស់កាសែត Bloomberg នៅថ្ងៃនេះ បានឱ្យដឹងថា ដំណឹងនេះចេញពីខុទ្ធកាល័យនាយករដ្ឋមន្រ្តី Trudeau នៅយប់ថ្ងៃម្សិលមិញ។
ប្រភពដដែលឱ្យដឹងបន្ថែមថា បច្ចុប្បន្ន លោកស្រីមានអាការល្អធម្មតា គ្រាន់តែក្តៅខ្លួន និងផ្តាសាយតិចតួច ហើយកំពុងនៅដាច់ដោយឡែកនៅគេហដ្ឋាន និងគោរពតាមរាល់ការណែនាំរបស់គ្រូពេទ្យ។
ដោយឡែក ស្វាមីរបស់លោកស្រី ដែលជានាយករដ្ឋមន្រ្តីប្រទេសកាណាដា លោក Justin Trudeau មានសុខភាពល្អធម្មតា និងមិនមានការលេចចេញរោគសញ្ញាអ្វីឡើយ ប៉ុន្តែ លោកត្រូវរស់នៅផ្តាច់ខ្លួនពីអ្នកដទៃរយៈពេល១៤ថ្ងៃសិន ដើម្បីឱ្យប្រាកដថា លោកមិនបានឆ្លងមេរោគពីភរិយា។
យ៉ាងណា ប្រមុខរដ្ឋាភិបាលកាណាដារូបនេះ នៅតែបន្តចាត់ចែងកិច្ចការងារទាក់ទងជាមួយមេដឹកនាំប្រទេសដទៃ និងចូលរួមកិច្ចប្រជុំផ្សេងៗតាមប្រព័ន្ធអ៊ីនធឺណីតពីគេហដ្ឋាន ហើយតាមដានសុខភាពលោកដោយខ្លួនលោកផ្ទាល់។
ទន្ទឹមនឹងនេះ មេដឹកនាំបក្សប្រឆាំង NDP លោក Jagmeet Singh ក៏កំពុងបំពេញការងារប្រចាំថ្ងៃពីគេហដ្ឋានផងដែរ ក្រោយពីលោកមានអារម្មណ៍មិនស្រួល។
លោក Jagmeet បានបង្ហោះសារលើទំព័រ Twitter នៅថ្ងៃនេះថា លោកបានទូរសព្ទសួរគ្រូពេទ្យម្នាក់។ ទាំងគ្រូពេទ្យ និងរូបគាត់ផ្ទាល់ មិនជឿថា នោះគឺជារោគសញ្ញាកូវីដ-១៩នោះទេ ប៉ុន្តែ គ្រូពេទ្យណែនាំឱ្យលោកត្រូវជៀសខ្លួនពីសាធារណជនមួយរយៈសិន រហូតមានអារម្មណ៍ល្អវិញ។
ក្រសួងសុខាភិបាលកាណាដា បានក្រើនរំឭកដល់ពលរដ្ឋខ្លួនដែលត្រឡប់ពីប្រទេសរងការឆ្លងរាតត្បាតពីមេរោគកូរ៉ូណាថ្មីខ្លាំង ដូចជា ចិន អ៊ីតាលី និងអ៊ីរ៉ង់ ត្រូវនៅដោយឡែករយៈពេល១៤ថ្ងៃសិន មុននឹងចេញជួបអ្នកដទៃ។ សេចក្តីណែនាំនេះ ធ្វើឡើងបន្ទាប់ពីមានករណីឆ្លងរាលដាលក្នុងប្រទេសបានកើនឡើងជាបន្តបន្ទាប់។
បើតាមតួលេខចុងក្រោយពី World O Meters កាណាដារកឃើញករណីឆ្លងថ្មី៣២ករណីនៅថ្ងៃម្សិលមិញ ធ្វើឱ្យតួលេខសរុបកើនដល់១៤២នាក់ ក្នុងនោះករណីស្លាប់មានម្នាក់ ខណៈមេរោគនេះកំពុងរាតត្បាតខ្លាំងនៅតំបន់អឺរ៉ុប ប្រទេសអ៊ឺរ៉ង់ និងកូរ៉េខាងត្បូង ខណៈចិន ការរាតត្បាតធ្លាក់ចុះស្ទើរស្មើសូន្យ។
នៅប្រទេសអង់គ្លេស កាលពីថ្ងៃពុធ រដ្ឋមន្រ្តីសុខាភិបាលប្រទេសនេះ គឺលោកស្រី Nadine Dorries បានឆ្លងមេរោគកូវីដ-១៩ និងកំពុងស្នាក់នៅដោយឡែកក្នុងគេហដ្ឋានរបស់លោកស្រី ខណៈមន្រ្តីក្នុងក្រសួងដែលបានប៉ះផ្ទាល់ជាមួយលោកស្រី កំពុងឋិតក្រោមការតាមដាន។
នៅអាមេរិក លោកប្រធានាធិបតី Donald Trump ត្រូវបានសង្ស័យថា លោកអាចនឹងឆ្លងមេរោគកូរ៉ូណាថ្មី បន្ទាប់ពីលោកត្រូវបានឃើញឈរថតជាមួយមន្រ្តីទំនាក់ទំនងប្រេស៊ីលម្នាក់ដែលក្រោយមករកឃើញមានផ្ទុកមេរោគ ក្នុងជំនួបជាមួយប្រធានាធិបតីប្រេស៊ីល លោក Jair Bolsonaro កាលពីសប្តាហ៍មុន។
យ៉ាងណា បើតាមសេចក្តីរាយការណ៍របស់កាសែត The Guardian មន្ទិលនោះត្រូវបានអ្នកនាំពាក្យសេតវិមានប្រកាសទាត់ចោល ក្រោមហេតុផលថា លោក Trump ស្ទើរតែមិនបានប៉ះផ្ទាល់សោះឡើយជាមួយមន្រ្តីទំនាក់ទំនងនោះ ដូច្នេះ មិនចាំបាច់ពិនិត្យនោះទេ៕
