មន្ត្រីជាន់ខ្ពស់ក្រសួងមហាផ្ទៃ លើកឡើងថា ការអនុវត្តភារកិច្ចឃុំខ្លួនពលរដ្ឋនៅក្នុងពន្ធនាគារកន្លងមក គឺធ្វើដោយស្មើភាពគ្នា គ្មានការបែងចែកថា អ្នកមានប្រាក់ត្រូវមានឱកាសច្រើនជាងអ្នកក្រនោះឡើយ។
ការអះអាងនេះ ក្រោយមានការលើកឡើងថា អ្នកមានប្រាក់ ឬមានអំណាចនៅកម្ពុជា នៅពេលជាប់ឃុំ ពួកគេតែងមានឱកាសនៅក្រៅពន្ធនាគារច្រើនជាងអ្នកក្រ ដោយប្តូរមកសម្រាកនៅមន្ទីរពេទ្យជាប់រហូត ក្រោមហេតុផលថា មានជំងឺធ្ងន់ធ្ងរ។
ថ្លែងក្នុងសន្និសីទកាសែតនៅទីស្តីការគណៈរដ្ឋមន្ត្រី នៅថ្ងៃព្រសហ្បតិ៍ម្សិលមិញ អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ជាគោលការណ៍ច្បាប់ មិនបានបែងចែកថា អ្នកមានគឺមានឱកាសមកព្យាបាលជំងឺ ឬសម្រាកនៅមន្ទីរពេទ្យច្រើនជាងអ្នកក្រទេ ពោលគឺការឃុំខ្លួនអ្នកជាប់ឃុំក្នុងពន្ធនាគារទាំងអស់អនុវត្តន៍ដោយស្មើភាពគ្នា។
មន្ត្រីជាន់ខ្ពស់ក្រសួងមហាផ្ទៃរូបនេះ បន្តថា ពន្ធនាគារគ្រាន់តែជាអ្នកមើលការខុសត្រូវអ្នកជាប់ឃុំប៉ុណ្ណោះ ប៉ុន្តែ រាល់ការសម្រេចឱ្យអ្នកជាប់ឃុំមកសម្រាកព្យាបាលនៅមន្ទីរពេទ្យ ខាងតុលាការជាអ្នកសម្រេច។
លោក ខៀវ សុភ័គ មានប្រសាសន៍ថា៖ «តែច្បាប់គេអត់មានថាអីចឹងទេ ច្បាប់។ នៅក្នុងពន្ធនាគារ នៅពេលយើងមានជំងឺធ្ងន់ធ្ងរ មានការបញ្ជាក់ពីពេទ្យ អនុរក្សពន្ធនាគារត្រូវតែអនុវត្តន៍។ បញ្ជូនមកពេទ្យរុស្ស៊ី ហើយទៅវិញ ហើយនៅពេលពេទ្យថាទេ មិនទាន់បាន [មិនទាន់សះស្បើយ] អនុរក្សពន្ធនាគារគ្រាន់តែជាអ្នកទទួលបន្ទុកអ្នកហ្នុងតើ!»
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា ផ្លូវច្បាប់គ្មានការបែងចែកអ្នកមាន ឬអ្នកក្រអ្វីនោះទេ ដោយកំណត់ថា អ្នកជាប់ឃុំអាចទៅសម្រាកនៅមន្ទីរពេទ្យបាននៅពេលសុខភាពពួកគេតម្រូវឱ្យមានការស្នាក់នៅមន្ទីរពេទ្យជាចាំបាច់ ដោយមានការបញ្ជាក់ត្រឹមត្រូវពីខាងមន្ទីរពេទ្យ។
លោកមានប្រសាសន៍ថា៖ «ខ្ញុំមិនបានដឹងថា អ្នកមានអ្នកក្រជាប់ឃុំហ្នឹងខុសគ្នាម៉េចទេ ក៏ប៉ុន្តែ ជានីតិវិធីច្បាប់ អ្នកជាប់ឃុំអាចទៅសម្រាកនៅមន្ទីរពេទ្យបាន កាលណាស្ថានភាពសុខភាពហ្នឹងវាតម្រូវចាំបាច់ត្រូវសម្រាកនៅមន្ទីរពេទ្យ។ ហើយការចាំបាច់ ឬមិនចាំបាច់ហ្នឹង គឺមានការបញ្ជាក់វេជ្ជសាស្ត្រពីខាងមន្ទីរពេទ្យ មិនមែនយើងមើលនឹងភ្នែកខាងក្រៅ ហើយធ្វើការសន្និដ្ឋានថា ចាំបាច់ ឬមិនចាំបាច់បានទេ»។
នាយករងអង្គការការពារសិទ្ធិមនុស្សលីកាដូ (Licadho) លោក អំ សំអាត កត់សម្គាល់ថា ករណីឃុំខ្លួនមួយចំនួនហាក់ធ្វើឡើងគ្មានតម្លាភាព ពោលគឺអ្នកមានប្រាក់ ឬមានអំណាចខ្លះ មានឱកាសបានសម្រាកព្យាបាលនៅមន្ទីរពេទ្យយូរជាងការជាប់ឃុំក្នុងពន្ធនាគារ ផ្ទុយពីអ្នកជាប់ឃុំក្រីក្រ សកម្មជនសិទ្ធិមនុស្ស ឬសកម្មជននយោបាយមួយចំនួន។
លោកមានប្រសាសន៍ថា៖ «យើងកត់សម្គាល់ថា ភាគច្រើនអ្នកមានលុយ ឬឋានៈឧកញ៉ានេះ គាត់អាស្នាក់នៅព្យាបាលមន្ទីរពេទ្យបាន ខ្លះដល់រាប់ឆ្នាំ ដែលខុសអំពីពលរដ្ឋ ឬអ្នកជាប់ឃុំទូទៅដែលគាត់ឈឺធ្ងន់ធ្ងរមែនទែន រហូតដល់ពេទ្យពន្ធនាគារអត់មានលទ្ធភាព ទើបបញ្ជូនមកមន្ទីរពេទ្យ។ យើងឃើញថា អនុញ្ញាតឱ្យស្នាក់នៅមន្ទីរពេទ្យហ្នឹង ជួនកាលរយៈពេលខ្លី ជួនកាលបញ្ជូនមកទទួលការព្យាបាល ហើយបញ្ជូនត្រឡប់ទៅវិញ »។
អតីតសកម្មជនគណបក្សសង្រ្គោះជាតិ លោក យា ថុង ត្រូវបានក្រុមគ្រួសាររបស់លោកអះអាងថា មានជំងឺធ្ងន់ធ្ងរនៅក្នុងពន្ធនាគារ ហើយលោកក៏បានស្នើសុំមកសម្រាកនៅមន្ទីរពេទ្យរហូត ប៉ុន្តែ មិនត្រូវបានអនុញ្ញាតឡើយ ក្រោយមកលោក យា ថុង ក៏ស្លាប់ បន្ទាប់ពីចេញពីពន្ធនាគារបានមួយរយៈ។
ភរិយាលោក យា ថុង គឺអ្នកស្រី ប៉ុល រំដួល ឱ្យវី.អូ.ឌីដឹងកាលពីឆ្នាំមុនថា ប្តីអ្នកស្រីបានស្លាប់ ដោយសារតែមិនទទួលបានព្យាបាលត្រឹមត្រូវ និងទាន់ពេលវេលា បន្ទាប់ពីខាងពន្ធនាគារបដិសេធមិនបញ្ជូនប្តីខ្លួនមកសម្រាកនៅមន្ទីរពេទ្យ។
លោក ខៀវ សុភ័គ ថាបច្ចុប្បន្នអ្នកជាប់ឃុំក្នុងពន្ធនាគារ មានចំនួនជាង ៣ម៉ឺន៧ពាន់នាក់ (៣៧០០៧) ក្នុងនោះស្រីមានចំនួនជាង ២ពាន់នាក់ (២៥៨៤) ហើយលោកថា អ្នកជាប់ឃុំ ២ភាគ៣ មិនទាន់កាត់ទោសនៅឡើយ៕
