ម្ចាស់ពានរង្វាន់វីរជនបរិស្ថាន Goldman Environmental Prize និងសកម្មជនព្រៃឈើ៣រូបទៀត ត្រូវបានសមត្ថកិច្ចបញ្ជូនទៅតុលាការខេត្តក្រចេះនាព្រឹកនេះ បន្ទាប់ពីក្រុមហ៊ុន ស៊ីងបាយអូតិក (Think Biotech) ចោទថា លួចចូលក្នុងទីតាំងក្រុមហ៊ុនដោយមិនមានការអនុញ្ញាត។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក សឹង សែនករុណា ដែលតាមដានករណីនេះ បានប្រាប់វីអូឌីថា លោក អ៊ូច ឡេង និងប្រជាពលរដ្ឋ៣នាក់ទៀតដែលជាសមាជិកបណ្ដាញអ្នកការពារព្រៃឡង់ រួមមានលោក ខេម សុឃី លោក ស្រី ថី និងលោក មេន ម៉ាត់ ត្រូវបានសមត្ថកិច្ចខេត្តក្រចេះ បញ្ជូនទៅតុលាការនៅវេលាម៉ោង៨ព្រឹកនេះ ដើម្បីសួរនាំពាក់ព័ន្ធនឹងសំណុំរឿងក្រុមហ៊ុន ស៊ីងបាយអូតិក (Think Biotech) ចោទថា លួចចូលក្នុងទីតាំងក្រុមហ៊ុនឯកជនដោយមិនមានការអនុញ្ញាត។
លោក សឹង សែនករុណា បន្តថា លោក អ៊ូច ឡេង និងសកម្មជន៣នាក់ទៀត ជាអ្នកស្រាវជ្រាវពីបទល្មើសព្រៃឈើ និងជួយការពារធនធានធម្មជាតិ ដូចនេះ តុលាការគួរតែលើកទឹកចិត្ត ហើយដោះលែងពួកគេឱ្យមានសេរីភាពវិញ ដើម្បីជួយការពារធនធានធម្មជាតិនៅកម្ពុជា។
លោកមានប្រសាស៍ថា៖ «យើងក៏ទទូចទៅស្ថាប័នថ្នាក់ជាតិស្រាវជ្រាវលើករណីនេះ ហើយដោះលែងពួកគាត់ឱ្យមានសេរីភាពវិញ ពីព្រោះលោក អ៊ូច ឡេង និងសកម្មជន៣នាក់ទៀតហ្នឹង គាត់គ្រាន់តែជាអ្នកធ្វើការជួយការពារបរិស្ថាន និងការពារធនធានធម្មជាតិតែប៉ុណ្ណោះ និងលាតត្រដាងអ្វីដែលជាការពិត គឺគាត់មិនមានចេតនាអាក្រក់លើស្ថាប័នណាមួយនោះទេ»។
មន្ត្រីសិទ្ធិមនុស្សរូបនោះ ស្នើទៅសមត្ថកិច្ច អង្គភាពរដ្ឋាភិបាលនៅថ្នាក់ជាតិ ចុះធ្វើការស្រាវជ្រាវបន្ថែមទៀតលើករណីនេះ។ លោកថា លោក អ៊ូច ឡេង និងសកម្មជន៣រូបនោះទៀត បានទទួលព័ត៌មានពីតំណាងសហគមន៍ថា ក្រុមហ៊ុននោះបានកាប់ដើមជ័រច្បោះ និងការកាប់បំផ្លាញព្រៃឈើ បញ្ជូនទៅដាក់ក្នុងក្រុមហ៊ុនជាដើម ទើបពួកគេចុះទៅធ្វើការតាមដានករណីនេះ។
អធិការស្រុកសំបូរ លោក ប៊ុន ឈឿន មានប្រសាសន៍ថា សមត្ថកិច្ចបញ្ជូនលោក អ៊ូច ឡេង និងសកម្មជន៣រូបទៀត ទៅតុលាការ ដោយសារ ក្រុមហ៊ុន ស៊ីងបាយអូតិក (Think Biotech ) ប្តឹងមកសមត្ថកិច្ចថា ពួកគេលួចចូលក្នុងទីតាំងក្រុមហ៊ុនឯកជនដោយមិនមានការអនុញ្ញាត។
អធិការស្រុកសំបូរបញ្ជាក់ថា ក្រោយមក សមត្ថកិច្ចបានសហការជាមួយព្រះរាជអាជ្ញារងខេត្តក្រចេះ លោក ជា សុភ័ក្រ ធ្វើការសួរនាំ រួចបញ្ជូនទៅថ្នាក់លើចាត់វិធានការតាមច្បាប់។
វីអូឌី បានទំនាក់ទំនងទៅព្រះរាជអាជ្ញារង លោក ជា សុភ័ក្រ ដែរ ប៉ុន្តែ លោកថា មិនបានកាន់សំណុំរឿងហ្នឹងទេ ដោយលោកបង្វែរសំនួរឱ្យវីអូឌីស្រាវជ្រាវសួរមន្ត្រីតុលាការផ្សេងទៀត។
អ្នកការពារព្រៃឈើទាំង៤នាក់នោះ ត្រូវបានបុគ្គលិកក្រុមហ៊ុនឯកជនមួយឈ្មោះ ស៊ីងបាយអូតិក (Think Biotech) ចាប់ឃាត់ខ្លួនកាលពីព្រឹកថ្ងៃទី១៣ ខែមីនា នៅចំណុចដំបូកស ភូមិរមួល ឃុំបឹងចា ស្រុកសំបូរ ខេត្តក្រចេះ ។
ទាក់ទងនឹងសំណុំរឿងនេះដែរ អង្គការចំនួន៦ បានធ្វើសេចក្តីថ្លែងការណ៍រួមមួយកាលពីម្សិលមិញ បានអំពាវនាវទៅសមត្ថកិច្ចខេត្តក្រចេះ រក្សាសុវត្ថិភាព និងដោះលែងអ្នកទាំង៤នាក់ ដោយគ្មានលក្ខខណ្ឌ និងស្នើឱ្យធ្វើការស៊ើបអង្កេតចំពោះភាពមិនប្រក្រតីនៃការឃាត់ខ្លួនសកម្មជនការពារបរិស្ថានទាំង៤នាក់នោះផងដែរ៕
