សាំងបន្តធ្លាក់ជាបន្តបន្ទាប់ចាប់ពីខែមករា ឆ្នាំ២០២០ ដែលរហូតមកដល់ពេលនេះ មានតម្លៃប្រមាណ៣០៥០រៀលសម្រាប់សាំងធម្មតា និង២៨០០រៀល សម្រាប់ប្រេងម៉ាស៊ូត។
សេចក្តីជូនដំណឹងស្ដីពីការលក់រាយប្រេងឥន្ធនៈតាមស្ថានីយ ក្រសួងពាណិជ្ជកម្មឱ្យដឹងថា តម្លៃលក់នេះគឺចាប់ពីថ្ងៃទី១៦ ដល់៣១មីនា ឆ្នាំ២០២០។
តាមក្រាហ្វិករបស់ក្រសួងពាណិជ្ជកម្ម តម្លៃប្រេងចុះជាបន្តបន្ទាប់តាំងពីខែមករាមក ដែលនៅពេលនោះសម្រាប់សាំងធម្មតាមានតម្លៃប្រមាណ ៣៧៥០រៀល និងប្រេងម៉ាស៊ូតមានតម្លៃ ៣៦៥០រៀល។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានឱ្យVODដឹងថា ការទម្លាក់តម្លៃមកនៅត្រឹមនេះគឺដោយសារថ្លៃប្រេងនៅលើទីផ្សារពិភពលោកកំពុងធ្លាក់ចុះជាបន្តបន្ទាប់ ដែលស្ទើរនឹងដល់ចំណុចទាបបំផុតនៅប៉ុន្មានឆ្នាំចុងក្រោយនេះ ដែលបណ្ដាលមកពីការបង្កើនការផលិតនៅប្រទេសផលិតប្រេង។
យោងតាមសារព័ត៌មាន CNN ការប្រកួតប្រជែងតម្លៃប្រេងរវាងសាឌីអារ៉ាប់ ជាមួយនឹងរុស្ស៊ី គឺជាមូលហេតុនៃប្រេងធ្លាក់ថ្លៃនេះ បន្ទាប់ពីរុស្ស៊ីបដិសេធសំណើរបស់អង្គការប្រេងពិភពលោក OPEC ក្នុងការកាត់បន្ថយការផលិតប្រេង ដោយសារបញ្ហាវីរុសកូរ៉ូណាដែលបណ្ដាលឱ្យតម្រូវការប្រេងធ្លាក់ចុះកាលចុងឆ្នាំមុន៕
