មន្ត្រីសាលាខេត្តកំពង់ឆ្នាំងបានបញ្ជាក់ថា ទីតាំងដី៤០ហិកតានៅភូមិដំបូកកកោះ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ដែលរៀបចំសម្រាប់ឱ្យអ្នកកំពុងរស់នៅលើទឹកទៅរស់នៅ ដែលភាគច្រើនជាជនជាតិវៀតណាមនោះ គឺអភិវឌ្ឍន៍បានជាង២០ភាគរយហើយ នឹងសង្ឃឹមថា អាចឱ្យពួកគេចូលទៅរស់នៅបានក្នុងឆ្នាំ២០២០នេះ។
ថ្លែងក្នុងសន្និសីទសារព័ត៌មាននៅទីស្ដីការគណៈរដ្ឋមន្ត្រីនៅព្រឹកថ្ងៃ១៨ ខែមីនានេះ អភិបាលរងខេត្តកំពង់ឆ្នាំងលោក ស្រ៊ន សំឬទ្ធី បានឱ្យដឹងថា រដ្ឋបាលខេត្តកំពង់ឆ្នាំងរហូតមកដល់ពេលនេះ បានចាក់ដីបំពេញបាន២០ហិកតា រួមជាមួយនឹងការសាងសង់ហេដ្ឋារចនាសម្ព័ន្ធដូចជាសាលារៀន មន្ទីរពេទ្យ សួនច្បារ កន្លែងចតឡាន ម៉ូតូ និងផ្សាររួចរាល់ហើយ ដោយសង្ឃឹមថា នឹងអាចបើកអនុញ្ញាតឱ្យអ្នកកំពុងរស់នៅលើទឹកអាចចូលទៅរស់នៅបានក្នុងឆ្នាំ២០២០នេះ។
លោក ស៊្រន សំឬទ្ធី៖ «ដី៤០ហិកតានេះ យើងធ្វើបាន២០ភាគរយហើយ រួចរាល់។ ហើយក្នុងពេលឆាប់ៗជាយន្តការដែលសម្រេចក្នុងឆ្នាំ២០១៩ គឺ [ចូលទៅនៅ] នៅដើមឆ្នាំ២០២០នេះ»។
កាលពីចុងឆ្នាំ២០១៩កន្លងទៅ រដ្ឋបាលខេត្តកំពង់ឆ្នាំងបានសម្រេចឱ្យពលរដ្ឋដែលរស់នៅលើផ្ទះបណ្ដែតទឹកលើដងទន្លេសាប បម្លាស់ទីទៅរស់នៅលើដីគោកចំនួន ៤ ៥៦៣គ្រួសារ ដោយក្នុងនោះមានទាំងខ្មែរ ខ្មែរអ៊ីស្លាម និងវៀតណាម។ ក្នុងចំណោមនេះ ជនជាតិវៀតណាមមានចំនួនច្រើនជាងគេ គឺមាន ២ ៣៨៩គ្រួសារ។
VOD មិនអាចទាក់ទងប្រធានសមាគមវៀតណាមប្រចាំខេត្តកំពង់ឆ្នាំង លោក ប៊ូច វ៉ឹងប៊ែល បាននៅឡើយទេ ដោយទូរសព្ទចូលគ្មានអ្នកទទួល។
មន្ត្រីសម្របសម្រួលសមាគមអាដហុកប្រចាំខេត្តកំពង់ឆ្នាំង លោក សំ ចាន់គា មានប្រសាសន៍ថា ក្រោយការប្រកាសរបស់រដ្ឋាភិបាលចំពោះការផ្លាស់ទីរបស់ជនជាតិវៀតណាមពីទឹកមកដល់ដើមឆ្នាំ២០២០នេះ គឺមានជនជាតិវៀតណាមមួយចំនួនបានចូលទៅរស់នៅទីតាំងដីថ្មី មួយចំនួនឡើងត្រឹមមាត់ច្រាំង ខណៈមួយចំនួនទៀតនៅលើទឹកដដែលនៅឡើយ។
លោកបន្ថែមថា៖ «រដ្ឋាភិបាលធ្វើក្នុងគោលដៅមនុស្សធម៌ គឺត្រឹមត្រូវហើយ ក៏ប៉ុន្ដែ សុំរដ្ឋាភិបាលហ្នឹងពិនិត្យមើលដល់ប្រជាពលរដ្ឋខ្មែរនៅតំបន់ដាច់ស្រយាលមួយចំនួនដែរ គួរតែគិតគូរដល់រឿងហ្នឹង។ បើជ្រុលជាគិតគូរ សូមគិតគូរឱ្យស្មើភាពគ្នាទៅ កុំឱ្យមានការរិះគន់ថា មានលក្ខណៈលំអៀង ឬមិនលំអៀងអីអ៊ីចឹង»។
តំណាងក្រុមប្រឹក្សាឃ្លាំមើលកម្ពុជា លោក រ៉ុង ឈុន ចង់ឱ្យរដ្ឋាភិបាលពិនិត្យមើលឡើងវិញពីភាពស្របច្បាប់របស់ជនអន្តោប្រវេសន៍វៀតណាមដែលត្រូវបានរដ្ឋរកដីឱ្យនៅនេះ ដោយលើកឡើងពីក្ដីបារម្ភថា នៅពេលដែលរដ្ឋាភិបាលកម្ពុជាអនុវត្តច្បាប់ធូររលុង វានឹងធ្វើឱ្យមានហានិភ័យដល់ជាតិនាថ្ងៃខាងមុខ។
លោក រ៉ុង ឈុន៖ «ពេលណាដែលយើងមានភាពធូររលុង ពេលនោះជនជាតិយួន ឬក៏ជនជាតិផ្សេងៗហៀរចូលមក ហើយនៅពេលដែលហៀរចូលកាន់តែច្រើនទៅ ធ្វើឱ្យមានផលប៉ះពាល់ច្រើននៅកម្ពុជា។ ទីមួយ មកដណ្ដើមការងារ ទីពីរ វាបង្កភាពខុសច្បាប់អ្វីដែលគេមិនស្គាល់ពីវប្បធម៌ប្រពៃណី គេមិនគោរពច្បាប់កម្ពុជា អាហ្នឹងជាបញ្ហាធ្វើឱ្យប៉ះពាល់ ហើយកំណើនពលរដ្ឋអន្តោប្រវេសន៍យូរទៅ វាធ្វើឱ្យពលរដ្ឋខ្មែរទៅជាពលរដ្ឋភាគតិចវិញ។ យើងនិយាយនេះមិនមែនរើសអើងលើជនជាតិណាទេ ហើយប្រទេសណាក៏មានជនជាតិអន្តោប្រវេសន៍ដែរ តែប្រទេសមានការអនុវត្តច្បាប់តឹងរ៉ឹង»។
បើតាមលោក រ៉ុង ឈុន ដើម្បីការពារ និងរក្សាសន្តិសុខជាតិបានរឹងមាំ គួរតែពង្រឹងការអនុវត្តច្បាប់អន្តោប្រវេសន៍ឱ្យម៉ឺងម៉ាត់ ជៀសវាងអំពើពុករលួយ ឬការស៊ុមគ្រលុំផ្សេងៗទាក់ទងនឹងការផ្ដល់ភាពស្របច្បាប់ ឬឱ្យជនបរទេសមកនៅលើទឹកដីខ្លួន៕
