មន្ត្រីជាន់ខ្ពស់ក្រសួងសុខាភិបាល បដិសេធព័ត៌មានដែលថា គ្រូពេទ្យរុញដាក់គ្នាពេលដែលពលរដ្ឋចង់ធ្វើតេស្តរកកូវីដ-១៩។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ប្រាប់អ្នកសារព័ត៌មាននៅថ្ងៃនេះថា ក្រសួងបានពិនិត្យរួចហើយ មិនមានករណីគ្រូពេទ្យនៅមន្ទីរពេទ្យមិត្តភាពខ្មែរ-សូវៀត មិនធ្វើតេស្តរកជំងឺកូវីដ-១៩ ឱ្យប្រជាពលរដ្ឋ ហើយបែរជារុញឱ្យទៅធ្វើតេស្តនៅវិទ្យាស្ថានប៉ាស្ទ័រកម្ពុជា ដូចព័ត៌មានមួយចំនួនបានផ្សព្វផ្សាយឡើយ។
លោកស្រីបន្តថា ប្រសិនបើក្រុមគ្រូពេទ្យមិនធ្វើតេស្ត ដោយសារតែអ្នកដែលទៅធ្វើតេស្តនោះ មិនត្រូវតាមនិយមន័យនៃការសង្ស័យថាមានជំងឺកូវីដ-១៩។
លោកថា៖ «ប្រសិនបើគាត់ចូលនិយមន័យនៃការសង្ស័យ ទើបក្រុមគ្រូពេទ្យសម្រេចចិត្តយកវត្ថុសំណាកទៅពិនិត្យ មិនមែនយើងចេះតែទៅទាមទារថា ខ្ញុំត្រូវតែធ្វើតេស្តចាំបាច់នោះទេ។ ខ្ញុំបានពន្យល់រួចហើយថា ការដែលយើងធ្វើតេស្ត ទាល់តែយើងទៅជួបជាមួយក្រុមគ្រូពេទ្យ ហើយក្រុមគ្រូពេទ្យពិនិត្យ ហើយភាពសសង្ស័យវាច្រើន បានគេធ្វើតេស្ត។ ការធ្វើតេស្តនេះ មិនមែនទៅបូមឈាមអីទេ វាត្រូវការការពារ ស្លៀកពាក់ឱ្យបានត្រឹមត្រូវដើម្បីការពារ ពីព្រោះយើងត្រូវគិតពីការចម្លងរោគនៅក្នុងមន្ទីរពេទ្យដែរ»។
ការបដិសេធរបស់ក្រសួងសុខាភិបាលនេះ ធ្វើឡើងបន្ទាប់ពីមានពលរដ្ឋមួយចំនួនចែករំលែកព័ត៌មានតាមបណ្ដាញសង្គមហ្វេសប៊ុក ដោយថា ពេលដែលពួកគេទៅធ្វើតេស្តរកមេរោគកូរ៉ូណានៅមន្ទីរពេទ្យមិត្តភាពខ្មែរ-សូវៀតនោះ ហើយត្រូវបានគ្រូពេទ្យរុញឱ្យទៅធ្វើតេស្តនៅមន្ទីរពិសោធន៍វិទ្យាស្ថានប៉ាស្ទ័រកម្ពុជាវិញ។
គិតត្រឹមព្រឹកថ្ងៃទី១៩ ខែមីនានេះ កម្ពុជារកឃើញអ្នកផ្ទុកកូវីដ-១៩ សរុបចំនួន៣៧ករណី ដែលក្នុងនោះមានជនជាតិចិន១នាក់ អង់គ្លេស៣នាក់ កាណាដា១នាក់ ប៊ែលហ្ស៊ិក១នាក់ បារាំង២នាក់ ម៉ាឡេស៊ី៥នាក់ ខ្មែរ២៤នាក់ ដែលក្នុងនោះ ២១នាក់ជាអ្នកដែលបានចូលរួមពិធីសាសនានៅម៉ាឡេស៊ី៕
