អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ប្រាប់វីអូឌីតាមប្រព័ន្ធតេលេក្រាម(Telegram) នៅថ្ងៃនេះថា គិតមកដល់ថ្ងៃទី២០ ខែមីនានេះ មានរោងចក្រជាង៥០ បានដាក់សំណើសុំព្យួរការងារ និងប៉ះពាល់កម្មករជិត៣ម៉ឺននាក់។
វីអូឌីនៅថ្ងៃនេះ បានសាកសួរទៅអ្នកនាំពាក្យក្រសួងការងារ លោក ហេង សួរ ពាក់ព័ន្ធការវិវឌ្ឍនៃការដាក់សំណើសុំព្យួរការងារកម្មកររបស់រោងចក្រនានានោះ លោក ហេង សួរ ប្រាប់វីអូឌីតាមប្រព័ន្ធ Telegram ថា គិតមកដល់ថ្ងៃនេះ ក្រសួងទទួលបានសំណើសុំព្យួរការងារកម្មករចំនួន ៥៤រោងចក្រ និងមានកម្មករ ២៨០០០នាក់។
កាលពីខែកុម្ភៈ លោក ហេង សួរ ប្រកាសថា បញ្ហាឥទ្ធិពលនៃវីរុសកូរ៉ូណា ឬ កូវីដ-១៩ នឹងធ្វើឱ្យរោងចក្រកាត់ដេរប្រមាណ ២០០រោងចក្រ ប្រឈមនឹងកង្វះខាតវត្ថុធាតុដើមសម្រាប់បម្រើឱ្យការផលិត និងអាចប៉ះពាល់ដល់ការងារកម្មករ-កម្មការិនីប្រមាណ ១៦ម៉ឺននាក់ នៅត្រឹមខែមីនា និងមេសា។
កាលពីថ្ងៃទី២៤ ខែកុម្ភៈ លោក ហ៊ុន សែន ប្រកាសថា នៅពេលដែលរោងចក្រព្យួរការងារ កម្មករដែលត្រូវបានព្យួរការងារ នឹងទទួលបានប្រាក់ឈ្នួល ៦០ភាគរយនៃប្រាក់ខែគោលរបស់ពួកគេ ក្នុងនោះ ថៅកែរោងចក្រត្រូវទទួលបន្ទុកបើកឱ្យកម្មករ ៤០ភាគរយ និងរាជរដ្ឋាភិបាលចូលរួមចំណែក ២០ភាគរយ ប៉ុន្តែថា លុយ ២០ភាគរយនេះ កម្មករអាចទទួលបានលុះត្រាតែពួកគេចុះឈ្មោះ និងចូលរៀនវគ្គបណ្តុះបណ្តាលជំនាញ ដែលរៀបចំដោយក្រសួងការងារ។
កម្មករម្នាក់បម្រើការងារនៅរោងចក្រគ្រីស្តាល់ម៉ាទីន ស្ថិតក្នុងតំបន់សេដ្ឋកិច្ចពិសេស 7NG លោក សាក់ សំណាង ដែលត្រូវបានថៅកែព្យួរការងារពីរខែ ប្រាប់វីអូឌីថា ថៅកែរោចក្រគ្រីស្តាល់ម៉ាទីន បានព្យួរការងារលោក និងកម្មករជាង ៧០០នាក់ផ្សេងទៀតជិត១ខែហើយ គឺពួកគាត់ទទួលបានប្រាក់ឈ្នួលពីថៅកែតែ ៤០ភារយប៉ុណ្ណោះ។ ចំណែកប្រាក់ ២០ភាគដែលរដ្ឋាភិបាលប្រកាសផ្តល់ឱ្យនោះ គឺមិនទាន់ទទួលបានទេ ហើយថា លោកក៏មិនរំពឹងទទួលបានលុយនោះដែរ ដោយថា លោកមិនមានពេលគ្រប់គ្រាន់សម្រាប់ទៅរៀនវគ្គបណ្តុះបណ្តាលនោះទេ។
កម្មកររូបនេះ រៀបរាប់ថា ករណីរោងចក្រព្យួរការងារកម្មករនេះ បានធ្វើឱ្យលោកជួបការលំបាកច្រើនក្នុងជីវភាពគ្រួសារ ដោយថា ពុំមានលុយគ្រប់គ្រាន់សម្រាប់ការចំណាយប្រចាំថ្ងៃ ដូចជា កូនរៀន និងគ្មានលុយបង់សងធនាគារជាដើម។
លោកបន្ថែមថា៖ «យើងជួបការលំបាកច្រើន។ លំបាកត្រង់ថា ពេលយើងត្រូវការបង់ធនាគារ យើងអត់ការងារធ្វើ យើងអត់លុយបង់សងគេ។ ពីមុនយើងធ្វើការងារ ពេលយើងបើកលុយមក យើងបង់សងភ្លាម។ ម្សិលមិញនេះ ខាងក្រសួងការងារតេមកប្រាប់ខ្ញុំឱ្យរៀនជំនាញទន់។ គេថា លុយ២០ភាគរយដែលរដ្ឋាភិបាលប្រកាសឱ្យហ្នឹង ទាល់តែយើងទៅរៀន បានគេឱ្យ»។
ប្រធានសហភាពការងារកម្ពុជា លោក អាត់ ធន់ បានស្នើឱ្យរាជរដ្ឋាភិបាលពិចារណាឡើងវិញចំពោះនីតិវិធីដោះស្រាយសំណងជូនកម្មករនេះ។ លោកថា កម្មករប្រហែលជាមិនអាចទទួលបានប្រាក់ ៤០ភាគរយនោះទេ ប្រសិនបើរដ្ឋាភិបាលនៅតែតម្រូវឱ្យកម្មករចុះឈ្មោះរៀននោះ ដោយថា កម្មករមិនសូវមានពេលវេលាគ្រប់គ្រាន់ និងពុំមានលុយសម្រាប់ការចំណាយរយៈពេលកំពុងរៀន។
លោក អាត់ ធន់៖« ឧទាហរណ៍ថា ក្រុមហ៊ុនត្រូវព្យួរ១ខែ។ អីចឹង ខាងរដ្ឋាភិបាលត្រូវមានតារាងឈ្មោះច្បាស់លាស់នៅពេលកម្មករចូលធ្វើការងារវិញ។ ឧទាហរណ៍ នៅសប្តាហ៍ចុងក្រោយនៃ១ខែហ្នឹង គឺឱ្យកម្មករទៅរៀននៅសប្តាហ៍ចុងក្រោយហ្នឹង នៅរោងចក្ររបស់គាត់។ មានន័យថា ពេលគាត់ត្រឡប់មកពីស្រុក មកស្នាក់នៅផ្ទះមុន១សប្តាហ៍ហើយ គាត់ទទួលបានលុយ ២០ភាគរយហ្នឹងដើម្បីចំណាយ។ វីធីទី២ គឺរដ្ឋាភិបាលធ្វើយ៉ាងម៉េចឱ្យគាត់បានលុយប្រហែល ២០០ដុល្លារ ដើម្បីឱ្យគាត់អាចផ្គត់ផ្គង់បានរយៈពេលព្យួរការងារហ្នឹង»។
វីអូឌី បានសុំការបញ្ជាក់ពីអ្នកនាំពាក្យក្រសួងការងារ លោក ហេង សួរ ដែរថា តើរហូតមកដល់ពេលនេះមានកម្មករចំនួនប៉ុន្មាន អ្នកបានចុះឈ្មោះចូលរៀនវគ្គខ្លីក្រោយពីពួកគេព្យួរពីការងារនោះ ប៉ុន្តែ លោក ហេង សួរ មិនឆ្លើយប្រាប់នោះទេ។
ផ្អែកតាមទិន្នន័យដែលផ្តល់ដោយក្រសួងពាណិជ្ជកម្មកាលពីពាក់ខែកុម្ភៈនេះ ឱ្យដឹងថា គិតត្រឹមពាក់កណ្ដាលឆ្នាំ២០១៩ កម្ពុជាមានរោងចក្រសរុបប្រមាណជាង ១ ៥០០រោងចក្រនៅទូទាំងប្រទេស ដោយផ្ដល់ការងារដល់កម្មករជាង ៨០ម៉ឺននាក់ ដែលភាគច្រើនលើសលប់ជាស្ត្រី៕
