ក្រសួងសុខាភិបាល ប្រកាសរកឃើញអ្នកឆ្លងជំងឺកូវីដ-១៩ លើជនជាតិខ្មែរ ៤ ករណីទៀត ដែលចំនួនអ្នកឆ្លងជំងឺកូវីដ១៩ កើនដល់ ១០២ ករណី។
ក្នុងសេចក្តីប្រកាសព័ត៌មានចុះថ្ងៃទី២៨ ខែមីនា ឆ្នាំ២០២០ ក្រសួងសុខាភិបាលឱ្យដឹងថា ក្រុមគ្រួសារជនជាតិខ្មែរ ៤នាក់ ដែលឆ្លងជំងឺកូវីដ១៩ នេះ បន្ទាប់ពីពួកគេត្រឡប់មកពីដើរលេងនៅប្រទេសបារាំងវិញកាលពីពាក់កណ្ដាលខែមីនាកន្លងមក។
ក្រសួងដដែលថា បច្ចុប្បន្ន ទាំង៤នាក់ កំពុងសម្រាកព្យាបាលនៅមណ្ឌលសុខភាពចាក់អង្រែក្រោម រាជធានីភ្នំពេញ។
បើតាមសេចក្ដីប្រកាសរបស់ក្រសួងសុខាភិបាល អះអាងថា គិតត្រឹមថ្ងៃនេះ កម្ពុជារកឃើញអ្នកឆ្លងកូវីដ១៩ សរុបចំនួន ១០២នាក់ហើយ ដោយក្នុងចំណោម ១០២នោះ គឺមានមនុស្ស ១៣នាក់ ត្រូវបានក្រុមគ្រូពេទ្យកម្ពុជាព្យាបាលជាសះស្បើយ៕
