លោកនាយករដ្ឋមន្ត្រី ហ៊ុន សែន ព្រមានចំៗពីលទ្ធភាពចាប់ខ្លួននាយករងអង្គការលីកាដូ លោក អំ សំអាត បើនៅតែបន្តរិះគន់ទៅលើវិធានការចាប់ឃុំខ្លួនមនុស្សមួយចំនួន ថាបានបំពានទៅនឹងសេរីភាពបញ្ចេញមតិនោះ។
ពីមន្ទីររដ្ឋសភាក្នុងកិច្ចប្រជុំនាថ្ងៃនេះ លោក ហ៊ុន សែន ថ្លែងថា នៅយប់ម៉ិញនេះ លោក អំ សំអាត បាននិយាយជាមួយវិទ្យុនៅក្រៅស្រុកមួយ គាំទ្រមនុស្សដែលអាជ្ញាធរចាប់ខ្លួន ពាក់ព័ន្ធទៅនឹងការប្រើប្រាស់បណ្តាញសង្គមផ្សព្វផ្សាយមិនពិតពីការឆ្លងរាលដាលនៃកូវីដ១៩នៅកម្ពុជា។
លោកថា៖ «ខ្ញុំសូមព្រមានទុកជាមុន នរណាចង់ថាអីថាទៅ! ខ្ញុំព្រមានលោកឯងទុកជាមុន។ ខ្ញុំព្រមានលោក អ៊ុំ[អំ] សំអាត នៃអង្គការលីកាដូ លោកឯងត្រូវប្រុងប្រយ័ត្នក្នុងកាលៈទេសៈនេះ បើទោះច្បាប់ដាក់ប្រទេសក្នុងគ្រាមានអាសន្នមិនទាន់ចូលជាធរមាន ក៏ខ្ញុំអាចចាប់លោកឯងបានដែរ»។
លោក ហ៊ុន សែន ថ្លែងទៀតថា អ្នកនិយាយគាំទ្រ អ្នកប្រព្រឹតបទល្មើស ក៏ជាប់ក្នុងបទល្មើសដូចគ្នា។
បើទោះបីលោកនាយករដ្ឋមន្ត្រី ហ៊ុន សែន ថ្លែងពេលនេះមិនបញ្ចេញឈ្មោះថា មន្ត្រីជាន់ខ្ពស់អង្គការលីកាដូរូបនេះនិយាយជាមួយវិទ្យុណាក៏ដោយ ប៉ុន្តែ នៅយប់មិញនេះ វិទ្យុអាស៊ីសេរីបានដកស្រង់សម្តីលោក អំ សំអាត មកចុះផ្សាយ ពាក់ព័ន្ធទៅនឹងការចាប់ខ្លួនមនុស្សសរុប២៤នាក់ ប្រើប្រាស់បណ្តាញសង្គមផ្សព្វផ្សាយពីការរីករាលដាលនៃមេរោគរលាកផ្លូវដង្ហើមថ្មី ឬ កូវីដ១៩ នេះ ដែលការឃុំខ្លួននោះ មានទាំងអតីតសកម្មជនបក្សប្រឆាំងផងដែរ។
បើតាមការចុះផ្សាយ លោក អំ សំអាត បានលើកឡើងថា៖ «ប្រសិនជាយើងធ្វើការឃុំខ្លួនដោយមិនបានពិចារណាឱ្យត្រឹមត្រូវថា អ្វីជាសេរីភាពបញ្ចេញមតិ អ្វីជាបទល្មើសនោះទេ អាហ្នឹងធ្វើឱ្យប៉ះពាល់ដែរសម្រាប់សេរីភាពបញ្ចេញមតិរបស់ពលរដ្ឋ»។
លោក អំ សំអាត នៅថ្ងៃនេះបានចេញមុខបកស្រាយលើបណ្តាញសង្គមថា ការផ្សព្វផ្សាយនោះ បានកាត់សំឡេងខ្លី ដែលលោកថា ខុសពីន័យដើមរបស់លោក។ នាយករងអង្គការលីកាដូរូបនេះ អះអាងថា សម្រាប់រូបលោក ព្រមទាំងអង្គការលីកាដូ គាំទ្រការអនុវត្តច្បាប់ត្រឹមត្រូវ។
លោកថា៖ «គោលបំណងរបស់ខ្ញុំបាទ និងអង្គការលីកាដូ ធ្វើយ៉ាងណាជំរុញឱ្យមានការអនុវត្តច្បាប់ គោរពសិទ្ធិគ្នាទៅវិញទៅមក ដើម្បីឱ្យប្រទេសយើងរស់នៅក្នុងសុខសន្តិភាព រស់នៅក្នុងភាពសុខដុមរមនា ហើយរូបខ្ញុំ ក៏ដូចអង្គការលីកាដូ គាំទ្រវិធានការអនុវត្តច្បាប់»។
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា ហៅសារព្រមានរបស់រដ្ឋាភិបាល ក្នុងការប៉ុនប៉ងចាប់ខ្លួនមេអង្គការលីកាដូនេះ វាបានដើរឆ្ងាយពីស្មារតីរដ្ឋធម្មនុញ្ញ និងច្បាប់អន្តរជាតិ ស្តីពីសិទ្ធិពលរដ្ឋ និងសិទ្ធិនយោបាយ ដែលរដ្ឋាភិបាលបានផ្តល់សច្ចាប័ន ខណៈកម្ពុជាមិនទាន់ប្រកាសឱ្យប្រើច្បាប់ដាក់ប្រទេសក្នុងគ្រាមានអាសន្ននៅឡើយនោះ។
លោកថា៖ «ប្រទេសយើង […] មិនទាន់មានច្បាប់ណាហាមនុស្សមិនឱ្យបញ្ចេញមតិយោបល់នៅឡើយទេ ពីព្រោះរដ្ឋធម្មនុញ្ញយើងក៏នៅជាធរមានដែរអំពីសេរីភាពបញ្ចេញមតិហ្នឹង»។
ទោះជាយ៉ាងណា លោកនាយករដ្ឋមន្ត្រី អះអាងថា ច្បាប់ដាក់ប្រទេសក្នុងគ្រាមានអាសន្ននឹងត្រូវព្រះមហាក្សត្រប្រកាសឱ្យប្រើប្រាស់ក្នុងស្ថានភាពប្រញាប់ក្នុងពេលដ៏ឆាប់តាមសំណើរបស់រដ្ឋាភិបាល ក្រោយពីមានការយល់ព្រមពីរដ្ឋសភា និងព្រឹទ្ធសភា។
ក្រៅពីព្រមានចាប់ខ្លួនមន្ត្រីជាន់ខ្ពស់ឃ្លាំមើលសិទ្ធិមនុស្សនៅអង្គការលីកាដូ លោកនាយករដ្ឋមន្ត្រី ក៏បានចេញបញ្ជាផ្ទាល់មាត់ទៅសមត្ថកិច្ច ឱ្យបន្តតាមចាប់ខ្លួនអ្នកលក់តាមអនឡាញ ដែលផ្សព្វផ្សាយថា មានថ្នាំព្យាបាលជំងឺកូវីដ១៩ និងអ្នកផ្សព្វផ្សាយលក់ឧបករណ៍ធ្វើតេស្តរកមេរោគកូវីដ១៩ ដោយមិនចាំបាច់ឆ្លងកាត់ក្រសួងសុខាភិបាលផងដែរ។
របាយការណ៍មួយចំនួនរបស់អ្នកឃ្លាំមើល បានកត់សម្គាល់ថា សិទ្ធិពលរដ្ឋ និងសិទ្ធិនយោបាយដែលធានាដោយច្បាប់ជាតិ និងអន្តរជាតិ ត្រូវបានធ្លាក់ចុះនៅអាណត្តិទី៦ ក្រោយបោះឆ្នោតឆ្នាំ២០១៨ ក្រោមការដឹកនាំរបស់រដ្ឋាភិបាលឯកបក្ស ។
មជ្ឈមណ្ឌលសិទ្ធិមនុស្សកម្ពុជា (CCHR) បានចេញរបាយការណ៍មួយវាយតម្លៃថា ស្ថានភាពសិទ្ធិមនុស្សនៅកម្ពុជា នាឆ្នាំ២០១៨ បានធ្លាក់ដុនដាបខ្លាំង។
របាយការណ៍ដដែលលើកឡើងទៀតថា នៅមុនការបោះឆ្នោតជ្រើសតាំងតំណាងរាស្ត្រ មានការអនុម័តច្បាប់មួយចំនួនដែលមានលក្ខណៈរឹតត្បិតក្នុងគោលបំណងបំបិទសំឡេងជំទាស់។ ក្នុងពេលជាមួយគ្នានេះ លំហសម្រាប់អង្គការសង្គមស៊ីវិលក៏ត្រូវបានបំបិទ ចំពេលមានការចោទប្រកាន់នានាជុំវិញ“បដិវត្តន៍ពណ៌”។
CCHR អះអាងទៀតថា៖ «ការជំនុំជម្រះ និងការកាត់ទោសតក់ក្រហល់ទៅលើបុគ្គលដែលរិះគន់រដ្ឋាភិបាល ព្រមទាំងបរិយាកាសអាប់អួនៅជុំវិញការបោះឆ្នោតជ្រើសតាំងតំណាងរាស្ត្រ បាននាំឱ្យការចូលរួមរបស់សាធារណជនក្នុងដំណើរការលទ្ធិប្រជាធិបតេយ្យធ្លាក់ចុះ»។
គម្រោងយុត្តិធម៌ពិភពលោក World Justice Project បានចេញរបាយការណ៍កាលពីឆ្នាំ២០១៩ ដែលវាយតម្លៃថា ប្រទេសកម្ពុជាមាននីតិរដ្ឋទាប ដោយឱ្យតម្លៃប្រព័ន្ធយុត្តិធម៌កម្ពុជា ស្ថិតនៅជិតបាតតារាងក្នុងចំណោម១១៣ប្រទេស កម្ពុជាជាប់លំដាប់ប្រទេស១១២។
