ថៅកែ​រោង​ចក្រ​មិន​មាន​លទ្ធភាព​បើក​ប្រាក់​៤០​%​ឱ្យ​កម្មករ​ពេល​ព្យួរ​ការងារ​

កម្មករ-កម្មការិនីបម្រើការងារនៅរោងចក្រមួយក្នុងស្រុកសំរោងទង ខេត្តកំពង់ស្ពឺ បានផ្ទុះការតវ៉ា ដោយចោទថៅកែថា ព្យួរការងារពួកគេដោយមិនបានដោះស្រាយសំណងត្រឹមត្រូវ នៅថ្ងៃទី២៦ ខែមីនា ឆ្នាំ២០២០។ (ផ្ដល់ឱ្យដោយកម្មកររោងចក្រ)

អគ្គលេខាធិការសមាគមរោងចក្រកាត់ដេរនៅកម្ពុជា (GMAC) អះអាងថា ថៅកែរោងចក្រគ្មានលទ្ធភាពបើកប្រាក់៤០ភាគរយឱ្យកម្មករពេលព្យួរការងារតាមការណែនាំរបស់លោកនាយករដ្ឋមន្ត្រីទេ បន្ទាប់ពីអ្នកបញ្ជាទិញមួយចំនួនផ្អាកទទួលទំនិញពីកម្ពុជា ។

អគ្គលេខាធិការសមាគមរោងចក្រកាត់ដេរនៅកម្ពុជា (GMAC) លោក ខេន លូ ប្រាប់វីអូឌីនៅថ្ងៃនេះថា ប្រសិនបើរដ្ឋាភិបាលតម្រូវឱ្យថៅកែរោងចក្របើកប្រាក់៤០ភាគរយដល់កម្មករ ក្នុងអំឡុងពេលព្យួរការងារនោះ។ លោកថា ថៅកែរោងចក្រគ្មានលទ្ធភាពឡើយ ដោយសារ បច្ចុប្បន្ន អ្នកបញ្ជាទិញមួយចំនួនបានផ្អាកទទួលទំនិញពីរោងចក្រ។ លោកបន្តថា អ្នកបញ្ជាទិញផ្អាកមិនឱ្យនាំទំនិញទៅ គឺចាប់តាំងមានផ្ទុះជំងឺកូវីដ១៩។

លោកថា៖ «អីវ៉ាន់ដែលធ្វើហើយ អត់ឱ្យយកនាំចេញ ​អីវ៉ាន់ដែលផលិត គេឱ្យយើងឈប់ភ្លាម​។ អ៊ីចឹង ពេលដែលមិនបានប្រគល់អីវ៉ាន់​ឱ្យអ្នកបញ្ជាទិញ គឺអ្នកបញ្ជា​ទិញ​អត់​ឱ្យ​លុយ​យើងទេ។ អ៊ីចឹង រយៈពេល១ ទៅ២ ខែទៅមុខ ​​រោងចក្រភាគច្រើននឹងអត់​មាន​លុយ​ហូរចូលទេ»។​

លោកស្នើទៅអ្នកបញ្ជាទិញឱ្យទទួលទំនិញដែលបានផលិតរួចពីកម្ពុជា ដើម្បីឱ្យថៅកែរោងចក្រមានប្រាក់បើកឱ្យកម្មករ។ ក្រៅពីទទូច​ឱ្យអ្នកបញ្ជាទិញទទួលទំនិញផលិតរួច លោក ខេន លូ ក៏ស្នើទៅរដ្ឋាភិបាលឱ្យជួយអន្តរាគមន៍ ដោយចេញប្រាក់មួយចំណែកនៃប្រាក់ ៤០ភាគរយ ដែលនិយោជកបើកឱ្យកម្មករអំឡុងពេលរោងចក្រព្យួរការងារកម្មករ។

លោកថា៖ «ប្រសិនបើខែហ្នឹង ​​អត់ទទួលទំនិញ រោងចក្រអត់មានលុយហូរចូល ​អ៊ីចឹងបើសិនត្រូវទូទាត់៤០ ភាគរយ​នៃប្រាក់ខែកម្មករ រោងចក្រភាគច្រើនអត់មានលទ្ធភាព​ទូទាត់ទេ។ អ៊ីចឹង ក៏ស្នើសុំទៅរដ្ឋាភិបាលឱ្យជួយខ្លះដែរ។ បាទ! [អ្នកបញ្ជាទិញ] អត់មានទូទាត់ប្រាក់មកឱ្យ ​ធម្មតាយើងផលិតអីវ៉ាន់ ​ប្រគល់អីវ៉ាន់ ហើយកាត់ទូទាត់លុយឱ្យយើង។ ឥឡូវគេអត់ទទួលអីវ៉ានផង អ៊ីចឹងសួរមានលុយពីណា»។

អគ្គលេខាធិការសមាគមរោងចក្រកាត់ដេរនៅកម្ពុជា (GMAC) រូបនេះ បន្តថា គិតត្រឹមថ្ងៃទី៣១ ខែមីនានេះ មានរោងចក្រជាង ៧០ បានស្នើសុំព្យួរការងារ ដែលប៉ះពាល់កម្មករប្រហែល ៣ម៉ឺននាក់។ លោកបន្តថា ការព្យួរការងារកម្មករនេះ ដោយសារ រោងចក្រគ្មានវត្ថុធាតុដើមសម្រាប់ផលិតផងដែរ។

កាលពីថ្ងៃទី២៤ ខែកុម្ភៈ លោក ហ៊ុន សែន ប្រកាសថា នៅពេលរោងចក្រព្យួរការងារ​កម្មករនោះ លោកថា កម្មករនឹងទទួលបានប្រាក់ឈ្នួល ៦០ភាគរយនៃប្រាក់ខែគោលរបស់ពួកគេ​ ក្នុង​នោះ​ ថៅកែរោងចក្រត្រូវទទួល​បន្ទុក​បើក​ឱ្យកម្មករ ៤០ភាគរយ និងរាជរដ្ឋាភិបាលចូល​រួម​ចំណែក ២០ភាគរយ។

ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ប្រសិនថៅកែរោងចក្រមិនផ្ដល់ ៤០ ភាគរយ​ឱ្យកម្មករទេ លោកថា កម្មករនឹងជួបការលំបាកខ្លាំង ដោយពួកគេគ្មានប្រាក់សម្រាប់ដោះស្រាយបញ្ហាជីវភាពក្នុងគ្រួសារ។ លោកស្នើទៅថៅកែរោងចក្រឱ្យពិចារណាចំពោះឡើងវិញ។

លោកថា៖ «និយោជកគួរតែពិចារណាឡើងវិញ ចំពោះការផ្ដល់ ៤០ភាគរយហ្នឹង​បន្តទៀត រយៈពេលពីរ ទៅបីខែខាងមុខ ខ្ញុំគិតថា មិនអីប៉ុន្មានទេ ដោយសារ និយោជករកស៊ី៤ ទៅ១០ឆ្នាំ​​ មានលុយគួរសម ហើយកម្មករយើងពិបាកណាស់។ ចំពោះ ២០ភាគរយ រដ្ឋាភិបាលគួរតែផ្ដល់ឱ្យកម្មករដដែល ដោយមិនចាំបាច់មានលក្ខខណ្ឌទៅរៀនទៅសូត្រ​អ្វីទេ ព្រោះឥឡូវដោយសារជំងឺក៏ពិបាកទៅរៀនដែរ»។ ​

ផ្អែកតាមទិន្នន័យដែលផ្តល់ដោយក្រសួងពាណិជ្ជកម្ម​កាល​ពី​ពាក់កណ្តាល​ខែ​កុម្ភៈ​នេះ ឱ្យដឹងថា គិតត្រឹមពាក់កណ្ដាល​ឆ្នាំ២០១៩ កម្ពុជាមានរោងចក្រ​សរុបប្រមាណជាង ១៥០០រោងចក្រនៅទូទាំងប្រទេស ដោយ​ផ្ដល់​ការងារ​ដល់​កម្មករ​ជាង ៨០ម៉ឺននាក់ ដែលភាគច្រើនលើស​លប់​ជាស្ត្រី៕​

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered