លោកនាយករដ្ឋមន្រ្តី ហ៊ុន សែន បានប្រកាសសម្រេចផ្អាកការធ្វើពិធីបុណ្យចូលឆ្នាំខ្មែរ ដោយតម្រូវឱ្យមន្រ្តីរាជការ និងបុគ្គលិកឯកជនធ្វើការតាមធម្មតា ដើម្បីទប់ស្កាត់ការរីករាលដាលនៃកូវីដ១៩។
លោកនាយករដ្ឋមន្រ្តីកម្ពុជា បានបញ្ជាក់បែបនេះក្នុងសន្និសីទសារព័ត៌មានពាក់ព័ន្ធបច្ចុប្បន្នភាពនៃជំងឺកូវីដ១៩ ដែលធ្វើឡើងនៅវិមានសន្តិភាពនាព្រឹកនេះ។
លោក លើកឡើងថា៖ «ចឹងកន្លែងដែលមានសុវត្ថិភាពបំផុតនៅពេលនេះ នៅតាមរោងចក្រ នៅតាមក្រុមហ៊ុន នៅតាមស្ថាប័ន គឺជាជម្រើសសុវត្ថិភាពបំផុតហើយ។ បើទុកបណ្តោយឱ្យដើរលេង សភាពការណ៍នេះក្រោយចូលឆ្នាំខ្មែរហើយអាចនឹងមានហានិភ័យខ្ពស់បំផុត។ អីចឹងទេ សូមបងប្អូន មន្រ្តីរាជការរបស់យើង ក៏ដូចជាកម្មករកម្មការិនីរបស់យើង មេត្តាយោគយល់ចំពោះការលំបាករបស់ប្រទេសជាតិ។»
បើតាមលោកនាយករដ្ឋមន្រ្តី ហ៊ុន សែន រដ្ឋាភិបាលនឹងសងថ្ងៃឈប់សម្រាកចំនួន ៥ថ្ងៃវិញនៅពេលដែលកូវីដ១៩ បាត់ទៅវិញ៕