ក្រសួងអប់រំបានសម្រេចពន្យារពេលប្រលងថ្នាក់ជាតិចំនួន២ ដែលក្នុងនោះមានការប្រលងមធ្យមសិក្សាបឋមភូមិ (ឌីប្លូម) និងមធ្យមសិក្សាទុតិយភូមិ (បាក់ឌុប) ដោយថា ដើម្បីបង្ការ និងទប់ស្កាត់ការរីករាលដាលនៃជំងឺកូវីដ១៩។
ក្នុងសេចក្តីណែនាំចុះថ្ងៃ៨ ខែមេសា រដ្ឋមន្ត្រីក្រសួងអប់រំ លោក ហង់ជួន ណារ៉ុន បានសម្រេចពន្យារការប្រលងទាំងពីរនេះ ដែលគ្រោងនឹងធ្វើក្នុងខែសីហា និងកញ្ញាខាងមុខ ដោយមិនទាន់កំណត់ថ្ងៃប្រលងជាក់លាក់នៅឡើយទេ ដោយថា នឹងជម្រាបជូនពីកាលបរិច្ឆេទនៃសម័យប្រឡងនៅពេលក្រោយ។
បើតាមក្រសួងអប់រំ ការប្រឡងសញ្ញាបត្រមធ្យមសិក្សាបឋមភូមិ ឬឌីប្លូម នៅឆ្នាំនេះ គ្រោងធ្វើចាប់ពីថ្ងៃទី៣ ខែសីហា ដល់ថ្ងៃទី២០ ខែសីហា ខណៈការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប គ្រោងធ្វើចាប់ពីថ្ងៃទី១៧ ខែសីហា ដល់ថ្ងៃទី៩ ខែកញ្ញា ឆ្នាំ២០២០។
ក្រសួងក៏ជំរុញដល់សិស្សានុសិស្សត្រូវធ្វើស្វ័យសិក្សានៅតាមផ្ទះរៀងខ្លួនផងដែរ ក្នុងពេលដែលឈប់សម្រាកដោយសារបញ្ហាកូវីដ១៩នេះ៕