នាយករដ្ឋមន្ត្រីកម្ពុជា និងរដ្ឋមន្ត្រីការបរទេសអាមេរិក បានថ្លែងអំណរគុណគ្នាទៅវិញទៅមកក្នុងជំនួបតាមខ្សែទូរសព្ទមួយនាព្រឹកនេះ។
ក្នុងសេចក្តីជូនដំណឹងចុះថ្ងៃទី៨ ខែមេសានេះ ក្រសួងការបរទេសកម្ពុជាឱ្យដឹងថា លោកនាយករដ្ឋមន្ត្រី ហ៊ុន សែន បានទទួលជួបសំណេះសំណាលតាមទូរសព្ទជាមួយរដ្ឋមន្ត្រីការបរទេសអាមេរិក លោក Mike Pompeo ដោយបានធ្វើអំណរគុណគ្នាទៅវិញទៅមក ចំពោះការជួយរបស់ប្រទេសទាំងពីរក្នុងពេលពិភពលោកមានវិបត្តិកូវីដ១៩។
សេចក្តីប្រកាសនោះលើកឡើងថា៖ «ឯកឧត្តម Pompeo អរគុណកម្ពុជាចំពោះការជួយសង្គ្រោះអ្នកធ្វើដំណើរលើនាវាកំសាន្ត Westerdam ហើយសម្តេចអរគុណអាមេរិកចំពោះជំនួយ និងកិច្ចសហការពីសំណាក់អ្នកជំនាញនៃមជ្ឈមណ្ឌលបង្ការ និងគ្រប់គ្រងជំងឺរាតត្បាតអាមេរិក ក៏ដូចជាចំពោះទឹកប្រាក់ ២លានដុល្លារសំរាប់ជួយដល់ការប្រឆាំងជំងឺរាតត្បាតនេះ»។
បើតាមក្រសួងការបរទេស លោក ហ៊ុន សែន ក៏បានអរគុណចំពោះក្រុមអ្នកស្ម័គ្រចិត្តអាមេរិក Peace Corps Volunteers ដែលបានផ្ដល់មកកម្ពុជា ហើយត្រូវបានលោក ហ៊ុន សែន ចាត់ទុកថា ជាការជំរុញទំនាក់ទំនងល្អរវាងប្រជាជននៃប្រទេសទាំងពីរផងដែរ៕
