ក្រសួងសុខាភិបាលរកឃើញស្រ្តី និងបុរសចំនួន ២នាក់ដែលមានផ្ទុកកូវីដ១៩ បានឆ្លងពីគូសង្សារចិនវៀតណាមមួយគូដែលទើបរកឃើញមានផ្ទុកកូវីដ១៩នាដើមខែនេះ។
ក្នុងសេចក្តីប្រកាសព័ត៌មានចុះថ្ងៃទី៨ ខែមេសា ឆ្នាំ២០២០នេះ ក្រសួងសុខាភិបាលឱ្យដឹងថា អ្នកដែលរកឃើញពីរនាក់ថ្មីនេះជាប្ដីប្រពន្ធនឹងគ្នា ដែលរស់នៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។ បច្ចុប្បន្ន អ្នកទាំងពីរត្រូវបានដាក់ឱ្យសម្រាកព្យាបាលនៅមណ្ឌលសុខភាពចាក់អង្រែក្រោម រាជធានីភ្នំពេញ។
ក្រសួងក៏បានឱ្យដឹងផងដែរថា៖ «បុរស [ជាប្ដី] រូបនេះ ជាមិត្តភ័ក្របុរសជនជាតិចិនចូលមកកម្ពុជា នៅថ្ងៃទី២០ ខែមីនា ឆ្នាំ២០២០ ជាអ្នកឧស្សាហ៍ធ្វើដំណើរឡើងចុះ និងក្រោយពីបានចាកចេញពីកម្ពុជា នៅថ្ងៃទី០៣ មេសា ឆ្នាំ២០២០ ក៏បានរកឃើញមានវីរុសកូវីដ១៩ ដោយអាជ្ញាធរសុខាភិបាលនៅប្រទេសចិន»។
កាលពីម្សិលមិញ ក្រសួងសុខាភិបាលក៏បានឱ្យដឹងផងដែរថា ស្ត្រីជនជាតិវៀតណាមដែលជាមិត្តស្រីរបស់ជនជាតិចិនដែលមានផ្ទុកជំងឺកូវីដ១៩ ក៏ត្រូវបានធ្វើតេស្តឃើញវិជ្ជមានផងដែរ និងត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
បើតាមក្រសួង គូសង្សារទាំងពីរបានចូលមកកម្ពុជា ចាប់តាំងពីថ្ងៃទី២០ ខែមីនា មកម្ល៉េះ ទោះជាយ៉ាងណា ក្រសួងពុំបានបញ្ជាក់ប្រវត្តិធ្វើដំណើរ ឬប្រវត្តិទំនាក់ទំនងរបស់ជនជាតិចិន និងវៀតណាមទាំងពីរនាក់នោះទេ។
គិតត្រឹមថ្ងៃទី៨ ខែមេសានេះ ប្រទេសកម្ពុជារកឃើញអ្នកផ្ទុកជំងឺកូវីដ១៩ ចំនួន ១១៧នាក់ ក្នុងនោះស្រ្តីមាន ៣៤នាក់ និងទារកម្នាក់ ខណៈព្យាបាលជាសះស្បើយមាន ៦៣នាក់ ក្នុងនោះមានជនជាតិខ្មែរ ៣២នាក់៕