លោកនាយករដ្ឋមន្ត្រី ហ៊ុន សែន បានអំពាវនាវទៅពលករ-ពលការិនី ដែលកំពុងរស់នៅ និងធ្វើការក្រៅប្រទេស ជាពិសេសនៅប្រទេសថៃ ឱ្យគោរពតាមច្បាប់ និងបទបញ្ញត្តិទាំងឡាយដែលប្រទេសគេបានដាក់ចេញ រួមទាំងច្បាប់បម្រាមគោលចរ និងបម្រាមជួបជុំគ្នាជាក្រុម ឬជប់លៀងជាក្រុម ដែលពេលនេះប្រទេសគេកំពុងមានការហាមឃាត់តឹងរ៉ឹងបំផុតក្នុងការទប់ស្កាត់ការចម្លងមេរោគកូវីដ-១៩។
សារជូនពរទៅពលរដ្ឋនៅលើហ្វេសប៊ុករបស់លោកនាយករដ្ឋមន្ត្រីនៅថ្ងៃនេះ លោកបានអរគុណពលរដ្ឋចំពោះការយកចិត្តទុកដាក់ធ្វើតាមការណែនាំរបស់រាជរដ្ឋាភិបាល ក៏ដូចជាការណែនាំរបស់ក្រសួងសុខាភិបាល ដើម្បីចូលរួមទប់ស្កាត់ហានិភ័យនៃការឆ្លងរាលដាលជំងឺកូវីដ-១៩ នៅក្នុងប្រទេសយើង។
បន្ថែមពីនេះ លោកក៏បានអំពាវនាវឱ្យពលរដ្ឋដែលកំពុងរស់នៅ និងធ្វើការងារនៅក្រៅប្រទេស កុំធ្វើអ្វីដែលខុសច្បាប់នៅក្នុងប្រទេសគេដែលកំពុងដាក់ក្នុងគ្រាអាសន្នឱ្យសោះ។
ហ្វេសប៊ុកលោក ហ៊ុន សែន បន្តថា៖ «សំខាន់ណាស់នៅពេលនេះ គឺសុវត្ថិភាពសុខភាពអាយុជីវិតបងប្អូនកូនក្មួយពលករពលការិនីផ្ទាល់។ សូមបងប្អូនយោគយល់ និងគោរពច្បាប់ ទាំងក្នុងប្រទេស និងក្រៅប្រទេស ជាពិសេសនៅក្នុងស្ថានភាពដែលប្រទេសភាគច្រើនបានដាក់ចេញនូវបទបញ្ញត្តិ និងបម្រាមដ៏តឹងរ៉ឹងក្នុងការទប់ស្កាត់ការឆ្លងរាលដាលជំងឺកូវីដ-១៩»។
ការអំពាវនាវរបស់ប្រមុខរដ្ឋាភិបាលនេះ ក្រោយពេលសារព័ត៌មានថៃឈ្មោះ ប៉ាធុមថានី (Pathumthani News) បានចុះផ្សាយថា សមត្ថកិច្ចថៃបានឃាត់ខ្លួនពលករខ្មែរប្រុសស្រីចំនួន ១៧នាក់ កាលពីល្ងាចថ្ងៃម្សិលមិញ ដោយសារពួកគេប្រមូលផ្តុំគ្នាផឹកគ្រឿងស្រវឹងនៅមុខបន្ទប់ជួល។
សមត្ថកិច្ចថៃបញ្ជាក់ថា ការឃាត់ខ្លួនពលរដ្ឋខ្មែរនេះ ដោយសារពួកគេបានបំពានបម្រាមរបស់រដ្ឋាភិបាលថៃដែលហាមមិនឱ្យមានការជួបជុំសេពគ្រឿងស្រវឹងអំឡុងពេលចូលឆ្នាំ ដើម្បីទប់ស្កាត់ការរីករាលដាលនៃជំងឺកូវីដ១៩។
កាលពីថ្ងៃទី១២ ខែមេសា រដ្ឋាភិបាលថៃបានដាក់បម្រាមលើការលក់គ្រឿងស្រវឹង ព្រមទាំងបញ្ជាឱ្យបិទហាង ឬដេប៉ូលក់ស្រា និងស្រាបៀរនៅទូទាំង ៧៧ខេត្ត-រាជធានី ទូទាំងប្រទេសថៃ ក្នុងអំឡុងរដូវបុណ្យចូលឆ្នាំថ្មី ដើម្បីបញ្ចៀសការជួបជុំ និងប្រមូលផ្តុំគ្នាផឹកគ្រឿងស្រវឹងដែលនាំឱ្យមានការរីករាលដាលនៃកូវីដ១៩៕
