សមត្ថកិច្ចខេត្តកំពត បានអះអាងថា អ្នកកាសែតម្នាក់ឈ្មោះ ហង្ស សុភាព ត្រូវបានចាប់ខ្លួននៅព្រឹកថ្ងៃព្រហស្បតិ៍នេះ ដោយចោទពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទបរិហារបង្កាច់កេរ្តិ៍ ដែលប្រព្រឹត្តកាលពីថ្ងៃទី២៦ ខែមីនា ឆ្នាំ២០២០ រហូតដល់បច្ចុប្បន្ន។
លិខិតបំភ្លឺរបស់ស្នងការដ្ឋាននគរបាលខេត្តកំពតនៅថ្ងៃព្រហស្បតិ៍នេះ បានឱ្យដឹងថា លោក ហង្ស សុភាព ជាអ្នកកាសែតនៅស្ថាប័នសារព័ត៌មានចំនួន ៣ រួមមាន គេហទំព័រ វីឌីសេវេនញ៉ូវ (VD7 NEWS), FK NEWS និង CTV8។
ស្នងការដ្ឋាននគរបាលខេត្តកំពត បញ្ជាក់ថា មូលហេតុឈានទៅចាប់ខ្លួនអ្នកកាសែតរូបនេះ ដោយសារ លោក ហង្ស សុភាព បានចុះផ្សាយវាយប្រហារលើសមត្ថកិច្ចខេត្តនេះ ដោយថា សមត្ថកិច្ចខេត្តនេះ បានដោះលែងជនសង្ស័យឈ្មោះ នាយ សំណាង ដែលចោទថា បានកាប់លើស្ត្រីមេម៉ាយ និងកូនស្រី ០២នាក់ នៅភូមិតាឡង់ ឃុំត្នោតចុងស្រង់ ស្រុកបន្ទាយមាស ខេត្តកំពត ដោយមិនបានជូនដំណឹងទៅក្រុមគ្រួសារជនរងគ្រោះ។
សេចក្តីបំភ្លឺរបស់ស្នងការដ្ឋាននគរបាលខេត្តនេះ ឱ្យដឹងទៀតថា សមត្ថកិច្ចធ្លាប់បានបញ្ជាក់ប្រាប់ទៅលោក ហង្ស សុភាព ម្តងជាពីរដងថា លោក នាយ សំណាង មិនពាក់ព័ន្ធនឹងសំណុំរឿងនេះឡើយ។
ស្នងការដ្ឋាននេះ លើកឡើងថា ជនល្មើសជាអ្នកផ្សេង ហើយសមត្ថកិច្ចកំពុងស្រាវជ្រាវ និងបានហាមមិនឱ្យផ្សាយព័ត៌មានដែលគ្មានមូលដ្ឋានច្បាស់លាស់ ដែលបណ្តាលឱ្យប៉ះពាល់ដល់នីតិវិធីក្នុងការស៊ើបអង្កេត និងសិទ្ធិអ្នកដទៃ ប៉ុន្តែ លោក សុភាព មិនព្រមស្តាប់ និងបានញុះញង់ជនរងគ្រោះឱ្យប្តឹងមកលើសមត្ថកិច្ច ព្រមទាំងថ្នាក់ដឹកនាំថែមទៀតផង។
ប្រភពដដែលបន្ថែមថា រហូតដល់សមត្ថកិច្ចចាប់ខ្លួនជនល្មើសពិតប្រាកដក្នុងសំណុំរឿងហិង្សាលើស្ត្រីមេម៉ាយបាន កាលពីថ្ងៃម្សិលមិញ ហើយសមត្ថកិច្ចក៏សម្រេចចាប់ខ្លួនលោក ហង្ស សុភាព នៅថ្ងៃនេះ ដើម្បីចាត់ការតាមច្បាប់។
លិខិតបំភ្លឺបន្តថា៖ «បច្ចុប្បន្ន ជនសង្ស័យឈ្មោះ ហង្ស សុភាព ភេទប្រុស កើតឆ្នាំ១៩៧៩ លំនៅអចិន្ត្រៃយ៍ភូមិ ចំការបី ឃុំពងទឹក ស្រុកដំណាក់ចង្អើរ ខេត្តកែប ជាអ្នកកាសែត VD7, FK NEWS, TV8 ដែលចុះផ្សាយ បង្កាច់បង្ខូចកិត្តិយសសមត្ថកិច្ចយ៉ាងចាស់ដៃ គឺជាការញុះញង់ឱ្យប្រព្រឹត្តបទឧក្រិដ្ឋជាអាទិ៍ ដែលមានចែងក្នុងមាត្រា ៤៩៥ និងបរិហារបង្កាច់កេរ្តិ៍ ដែលមានចែងក្នុងមាត្រា ៣១១ នៃក្រមព្រហ្មទណ្ឌ»។
ចាងហ្វាយគេហទំព័រវីឌីសេវេនញ៉ូវ លោក អ៊ិន សារុន មានប្រសាសន៍ថា ការចាប់ខ្លួនលោក ហង្ស សុភាព ដែលជាអ្នករាយការណ៍ព័ត៌មានរបស់ខ្លួនប្រចាំខេត្តកំពត និងខេត្តកែបនោះ គឺជាការរំលោភទៅនឹងច្បាប់ស្ដីពីរបបសារព័ត៌មានកម្ពុជា ដោយតម្រូវឱ្យមានការកែតម្រូវ ប្រសិនបើអ្នកសារព័ត៌មានផ្សាយខុស។
លោកមានប្រសាសន៍ថា៖ «ចំពោះការឃាត់ខ្លួនភ្នាក់ងារសារព័ត៌មានរបស់ខ្ញុំប្រចាំការនៅខេត្តកំពត និងកែប ហ្នឹង ខ្ញុំយល់ថា វាមានការខុសពីរបបច្បាប់សារព័ត៌មានកម្ពុជា បាទ! ទាក់ទងរបបច្បាប់សារព័ត៌មាន ប្រសិនជាសារព័ត៌មានណាមួយផ្សាយខុសពីការពិត សាម៉ីជន ឬក៏អ្នកពាក់ព័ន្ធនឹងការផ្សាយហ្នឹង អាចសុំបំភ្លឺ ឬក៏អាចឱ្យសុំបកស្រាយ សារព័ត៌មាននឹងបកស្រាយ។ ប៉ុន្តែ ចំពោះបញ្ហានេះ អត់ដែលមានដំណឹងខាងណា ឱ្យអង្គភាពយើងខ្ញុំបកស្រាយទេ»។
លោក អ៊ិន សារុន បញ្ជាក់ថា លោកនឹងស្វែងរកកិច្ចអន្តរាគមន៍ទៅក្លឹបអ្នកកាសែតកម្ពុជា ដើម្បីជួយដោះស្រាយបញ្ហានេះ។
របាយការណ៍សេរីភាពសារព័ត៌មានពិភពលោកកាលពីឆ្នាំ២០១៩ ដែលចេញដោយអង្គការអ្នកកាសែតគ្មានព្រំដែន បានចាត់ចំណាត់ថ្នាក់សេរីភាពសារព័ត៌មានកម្ពុជា ១៤៣ លើ ១៨០ ដោយបានធ្លាក់ចុះជាបន្តបន្ទាប់ចាប់តាំងពីឆ្នាំ២០១៧មក៕
