សមត្ថកិច្ចបានចាប់ខ្លួនអតីតសកម្មជនបក្សសង្គ្រោះជាតិខេត្តស្វាយរៀងម្នាក់ទៀតឈ្មោះ ញ៉ែម វាន ពាក់ព័ន្ធនឹងការញុះញង់ឱ្យប្រព្រឹត្តបទឧក្រិដ្ឋ។
អ្នកនាំពាក្យនគរបាលជាតិ លោក ឆាយ គឹមឃឿន បានឱ្យ VOD ដឹងថា កាលពីម្សិលមិញ សមត្ថកិច្ចខេត្តបន្ទាយមានជ័យ បានចាប់ខ្លួនលោក ញ៉ែម វាន តាមដីកាតុលាការរាជធានីភ្នំពេញ ពាក់ព័ន្ធបទញុះញង់ឱ្យមានអំពើឧក្រិដ្ឋជាអាទិ៍ ដោយមិនបានបញ្ជាក់លំអិតពីការចាប់ខ្លួននេះ ដោយសារគាត់ញុះញង់លើរឿងអ្វីនោះទេ។
លោកថា៖ «កាលណាចាប់តាមដីកា សមត្ថកិច្ចអត់អាចសម្រេចអីបានទេ យកទៅជូនតុលាការៗជាអ្នកសម្រេច។ យកទៅណាទៅណី ជារឿងរបស់តុលាការ»។
VOD មិនអាចទាក់ទងស្នងការនគរបាលខេត្តបន្ទាយមានជ័យ លោក អាត់ ខែម និងអ្នកនាំពាក្យអយ្យការក្រុងភ្នំពេញ លោក គុជ គឹមឡុង ដើម្បីសុំការបញ្ជាក់បន្ថែមបាននោះទេ។
អ្នកសម្របសម្រួលសមាគមអាដហុកប្រចាំខេត្តបន្ទាយមានជ័យ លោក ស៊ុំ ចាន់គា មានប្រសាសន៍ថា ពិតជាមានការចាប់ខ្លួនលោក ញ៉ែម វាន ក្នុងខេត្តពិតមែន ដោយលោកថា មានការសហការគ្នាចាប់ខ្លួនដោយកម្លាំងនគរបាលក្រសួងមហាផ្ទៃ និងនគរបាលខេត្ត។
ភរិយាលោក ញ៉ែម វាន គឺអ្នកស្រី ទុយ សារ៉ន មានប្រសាសន៍ថា ប្ដីរបស់អ្នកស្រីបានជូនឪពុកម្ដាយរបស់គាត់ទៅកាន់ខេត្តព្រះវិហារប្រមាណ ២សប្ដាហ៍មុន និងបាត់ដំណឹងរហូតដល់ថ្ងៃម្សិលមិញ ទើបមានគេទាក់ទងមកថា ប្ដីរបស់គាត់ត្រូវបានអាជ្ញាធរចាប់ខ្លួន។
អ្នកស្រីមានការបារម្ភចំពោះសុវត្ថិភាពប្ដីជាខ្លាំង ដោយសាររហូតមកដល់ពេលនេះ លោកស្រីមិនបានឮដំណឹងអ្វីសោះពីប្ដីរបស់គាត់។
អ្នកស្រី ទុយ សារ៉ន៖ «ខ្ញុំបារម្ភ ខ្ញុំភ័យណាស់! មិនដឹងថាយ៉ាងម៉េចយ៉ាងណាទេ? តាំងពីគេចាប់មក គ្មានដឹងដំណឹងអីបន្ដិចផង»។
លោក ញ៉ែម វាន ជាអតីតសមាជិកប្រតិបត្តិគណបក្សសង្គ្រោះជាតិខេត្តស្វាយរៀង កាលពីថ្ងៃទី២០ ខែកញ្ញា ឆ្នាំ២០១៩ កន្លង សារព័ត៌មានអាស៊ីសេរីបានចុះផ្សាយថា សមត្ថកិច្ចខេត្តស្វាយរៀងបានដាក់កម្លាំងព័ទ្ធរកចាប់ខ្លួនលោក ក្រោយពីលោកបានធ្វើបទសម្ភាសន៍ជាមួយសារព័ត៌មាននេះពីគម្រោងការពារលោក សម រង្ស៊ី ចូលស្រុកវិញ។ ទោះជាយ៉ាងណា ក្រោយការចុះផ្សាយ ស្នងការខេត្តស្វាយរៀងបានច្រានចោល និងថាការចុះរបស់សមត្ថកិច្ចនៅពេលនោះ គឺគ្រាន់តែសម្របសម្រួលករណីសហគមន៍ប្រជុំដោយពុំមានការអនុញ្ញាតប៉ុណ្ណោះ។
ចាប់តាំងពីផ្ទុះជំងឺកូវីដ១៩ ក្នុងប្រទេសកាលពីខែមករាកន្លងទៅរហូតមកដល់ពេលនេះ សមត្ថកិច្ចបានចាប់ឃាត់ខ្លួនមនុស្សមិនតិចជាង ៤០នាក់នោះទេ ពាក់ព័ន្ធនឹងការផ្សព្វផ្សាយព័ត៌មានមិនពិតនេះ។
យោងតាមអ្នកនាំពាក្យនគរបាលជាតិ លោក ឆាយ គឹមឃឿន ប្រាប់VOD គិតត្រឹមថ្ងៃម្សិលមិញ មានមនុស្សចំនួន ៤២នាក់ហើយត្រូវបានចាប់ខ្លួន និងណែនាំ ក្នុងនោះមនុស្សចំនួន ២២នាក់ ត្រូវបានបញ្ជូនសំណុំរឿងបន្តទៅតុលាការ។
អនុប្រធានប្រចាំតំបន់អាស៊ីនៃអង្គការសិទ្ធិមនុស្ស (Human Right watch) លោក Phil Robertson បានប្រាប់VOD តាមសារអេឡិចត្រូនិចអ៊ីម៉ែលកាលពីម្សិលមិញថា កម្ពុជាបានធ្វើជាគំរូនូវអ្វីដែលមិនគួរធ្វើក្នុងពេលប្រយុទ្ធប្រឆាំងនឹងជំងឺកូវីដ១៩។ លោកបន្ថែមថា មនុស្សជាច្រើនត្រូវបានចាប់ខ្លួនពាក់ព័ន្ធនឹងសាររិះគន់របស់ពួកគេចំពោះការឆ្លើយតបរបស់រដ្ឋាភិបាលលើជំងឺកូវីដ១៩ ហើយជាពិសេសគឺសកម្មជនអតីតបក្សប្រឆាំងតែម្ដងដែលជាមុខសញ្ញា។
លោកសរសេរថា៖ «រដ្ឋាភិបាលកម្ពុជាមានទាំងអំណាច និងទំនោរគ្រប់គ្រងសិទ្ធិមនុស្ស ប៉ុន្តែ ជាក់ស្តែង វាមិនគ្រប់គ្រាន់ទេសម្រាប់លោកនាយករដ្ឋមន្រ្តី ហ៊ុន សែន ដែលពេលនេះកំពុងទាមទារអំណាចដែលគ្មានដែនកំណត់បន្ថែមទៀត តាមរយៈច្បាប់ដាក់ប្រទេសក្នុងគ្រាអាសន្ន»។
កាលពីថ្ងៃទី៩ ខែមេសា កន្លងទៅ ឧត្តមស្នងការ អ.ស.ប ទទួលបន្ទុកសិទ្ធិមនុស្ស លោកស្រី មីស្យែល បាស្យេឡេត បានលើកឡើងពីក្ដីបារម្ភរបស់លោកស្រីចំពោះសិទ្ធិសារព័ត៌មាន និងសិទ្ធិបញ្ចេញមតិរបស់ប្រជាជនក្នុងពេលដែលប្រទេសនីមួយៗប្រឈមនឹងបញ្ហាវិបត្តិកូវីដ១៩ ខណៈលោកស្រីថា លោកស្រីបានទទួលព័ត៌មានជាបន្តបន្ទាប់ពីការចាប់ឃុំខ្លួន ការដាក់ទណ្ឌកម្ម និងការចាប់ខ្លួនអ្នកសារព័ត៌មាន និងប្រជាជន ដោយគ្រាន់តែពួកគេរាយការណ៍ និងបញ្ចេញយោបល់នៅលើបណ្ដាញសង្គម ដោយលោកស្រីបានបញ្ជាក់ក្នុងសេចក្តីថ្លែងការណ៍នោះថា «មតិរិះគន់ មិនមែនជាបទល្មើសនោះទេ» ៕
