រដ្ឋាភិបាលកម្ពុជា បានសម្រេចបន្តផ្អាកមិនឱ្យជនបរទេសមកពីបណ្តាប្រទេសចំនួន៦ ចូលមកប្រទេសកម្ពុជាជាបណ្តោះអាសន្ន រហូតដល់ស្ថានភាពការរីករាលដាលនៃជំងឺកូវីដ១៩ ធូរស្បើយឡើងវិញ។
ការសម្រេចបន្តផ្អាកជនបរទេសមកពីប្រទេសទាំង៦នេះ ចូលមកកម្ពុជា ក្រោយពេលបំរាមដែលរដ្ឋាភិបាលចេញផ្អាកពួកគេមិនឱ្យចូលកម្ពុជាកាលពីពាក់កណ្តាលខែមីនា រយៈពេល ៣០ថ្ងៃនោះ ត្រូវអស់សុពលភាពត្រឹមថ្ងៃសុក្រនេះ។
លិខិតក្រសួងការបរទេសកម្ពុជា កាលពីថ្ងៃម្សិលមិញ ដែលមានប្រថាប់អក្សរក្រហមដាក់ថា ការប្រញាប់ បាន ផ្ញើជូនទៅឯកអគ្គរាជរដ្ឋទូត អគ្គកុងស៊ុល និងកុងស៊ុលកិត្តិយសរបស់កម្ពុជាប្រចាំនៅប្រទេស ៦នេះ ។
លិខិតនោះឱ្យដឹងថា ក្រសួងសុខាភិបាល បានសម្រេចពន្យារសុពលភាពនៃវិធានការក្នុងការបន្តផ្អាកមិនឱ្យជនបរទេសដែលមកពីប្រទេសបារាំង អាល្លឺម៉ង់ អ៊ីរ៉ង់ អ៊ីតាលី អេស្ប៉ាញ និងសហរដ្ឋអាមេរិក ចូលមកព្រះរាជាណាចក្រកម្ពុជាជាបណ្តោះអាសន្ន រហូតដល់ស្ថានភាពជំងឺកូវីដ១៩ បានធូរស្រាលឡើងវិញ ដោយមានការវាយតម្លៃពីក្រសួង និងអង្គការសុខភាពពិភពលោកផង។
លិខិតក្រសួងការបរទេសបន្តថា៖ «រាល់វិធានការរឹតបន្តឹងការធ្វើដំណើរទាំងអស់ខាងលើនេះ គឺមានលក្ខណៈជាបណ្តោះអាសន្ន នឹងត្រូវបន្តអនុវត្តរហូតដល់ស្ថានភាពជំងឺកូវីដ១៩ មានការធូរស្រាល ក្រោយពីមានការវាយតម្លៃរួមគ្នារវាងក្រសួងសុខាភិបាល និងអង្គការសុខភាពពិភពលោក»។
កាលពីពាក់កណ្តាលខែមីនា ក្រសួងសុខាភិបាល បានចេញសេចក្តីប្រកាសមួយ ដោយចាត់វិធានការដាក់បម្រាមផ្អាកមិនឱ្យជនបរទេសដែលមកពីបណ្តាប្រទេសទាំង៦ ចូលកម្ពុជាឡើយ រយៈពេល ៣០ថ្ងៃ ហើយបម្រាមនោះនឹងអនុវត្តពីថ្ងៃទី១៨ ខែមីនា។
ក្រសួងមួយនេះបញ្ជាក់ថា ការដាក់បម្រាមនោះ ក្រោយពេលរកឃើញជាបន្តបន្ទាប់វីរុសកូវីដ១៩ កើតឡើងទៅលើជនបរទេសដែលមានសញ្ជាតិផ្សេងៗ ដែលទាមទារឱ្យមានវិធានការការពារ និងទប់ស្កាត់ជាបន្ទាន់នូវការចម្លងជំងឺកូវីដ១៩ ចូលមកកម្ពុជាបន្ថែមទៀត។
គិតត្រឹមថ្ងៃសុក្រ ទី១៧ ខែមេសានេះ កម្ពុជាបានរកឃើញអ្នកឆ្លងជំងឺកូវីដ១៩ ចំនួន១២២ករណី ក្នុងនោះមាន ៩៨នាក់ បានព្យាបាលជាសះស្បើយ ស្មើនឹងជាង ៨០ភាគរយ ខណៈអ្នកជំងឺចំនួន ២៤នាក់ទៀត កំពុងសម្រាកព្យាបាលនៅតាមមន្ទីរពេទ្យរដ្ឋនៅឡើយ៕
