មន្ត្រីជាន់ខ្ពស់ក្រសួងសុខាភិបាល អះអាងថា ក្រសួងបានយកសំណាកមនុស្សជាង ៤០នាក់ ដែលប៉ះពាល់ផ្ទាល់ និងប្រយោលជាមួយស្ត្រីជនជាតិវៀតណាម និងបុរសជនជាតិកាណាដា ទៅធ្វើតេស្តរកមេរោគកូវីដ១៩ នៅក្នុងខណ្ឌបឹងកេងកង ប៉ុន្តែ បើតាមលទ្ធផល គឺអវិជ្ជមានទាំងអស់គ្នា។
កាលពីថ្ងៃទី១២ ខែមេសា ឆ្នាំ២០២០ ក្រសួងសុខាភិបាលបានរកឃើញស្ត្រីជនជាតិវៀតណាម និងបុរសជនជាតិកាណាដា ស្នាក់នៅបន្ទប់មួយ នៅផ្លូវលេខ៣០២ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ ថាឆ្លងជំងឺកូវីដ១៩។ ក្រសួងសុខាភិបាលថា បុរសជនជាតិកាណាដាដែលជាស្វាមីស្ត្រីជនជាតិវៀតណាមខាងលើ ជាអ្នកបម្រើការងារនៅកាស៊ីណូមួយក្នុងរាជធានីភ្នំពេញ។
អ្នកនាំពាក្យក្រសួងសុខាភិបាល លោក លី សូវ៉ាន់ ប្រាប់វីអូឌីតាមប្រព័ន្ធតេឡេក្រាមនៅថ្ងៃនេះថា ស្ត្រីជនជាតិវៀតណាម និងបុរសជនជាតិកាណាដាដែលឆ្លងជំងឺកូវីដ១៩នោះ កំពុងសម្រាកព្យាបាលនៅមណ្ឌលសុខភាពចាក់អង្រែក្រោម។
ដោយឡែក មនុស្សជាង ៤០នាក់នោះ ដែលជាអ្នកប៉ះពាល់ផ្ទាល់ និងប្រយោលជាមួយស្ត្រីជនជាតិវៀតណាម និងបុរសជនជាតិកាណាដា លោកថា ត្រូវបានក្រសួងយកសំណាកទៅធ្វើតេស្តរកមេរោគកូវីដ១៩ តែលទ្ធផល គឺអវិជ្ជមាន។
លោកថា៖ «យើងនៅតែបន្តតាមដានសុខភាពគាត់ជានិច្ច ប៉ុន្តែ គ្រាន់តែពេលនេះ គាត់អវិជ្ជមានទាំងអស់ហើយ។ ដូច្នេះ នៅខុនដូហ្នឹង យើងបានសំអាតមេរោគ មេអីអស់ហើយ ហានិភ័យទាបណាស់។ ចំពោះនៅបឹងកេងកង គឺគ្មានអ្វីគួរឱ្យព្រួយបារម្ភនោះទេ ប៉ុន្តែ ទោះបីជាយ៉ាងណាក៏ដោយ ទាំងនៅបឹងកេងកង១ និងប្រជាពលរដ្ឋនៅទូទាំងប្រទេស គ្រប់តំបន់ទាំងអស់ ពិតមែនយើងអវិជ្ជមានរយៈពេល ៤ថ្ងៃជាប់គ្នា យើងមិនត្រូវភ្លេចខ្លួនទេ យើងនៅតែបន្តអនុវត្តការងារ តាមដាន ឆ្លើយតប ក៏ដូចជាការចូលរួមពីប្រជាពលរដ្ឋទាំងអស់ អនាម័យ បន្តលាងដៃសាប៊ូ ជែល អាល់កុល»។
លោក លី សូវ៉ាន់ បន្តថា មន្ត្រីជំនាញកំពុងបន្តអង្កេតស្រាវជ្រាវ ដើម្បីស្វែងរកប្រភពចម្លងទៅស្ត្រីជនជាតិវៀតណាម និងបុរសជនជាតិកាណាដា ដោយលោកបញ្ជាក់ថា ទទួលតម្រុយខ្លះៗហើយ។
លោកថា៖ «កំពុងបន្តអង្កេតស្រាវជ្រាវ និងរកឃើញពន្លឺខ្លះៗហើយ គាត់មានពាក់ព័ន្ធនឹងករណីវិជ្ជមានរកឃើញកន្លងមក»។
លោក លី សូវ៉ាន់ អំពាវនាវទៅប្រជាពលរដ្ឋទាំងអស់ឱ្យបន្តអនុវត្តតាមសេចក្ដីណែនាំរបស់ក្រសួង និងរដ្ឋាភិបាល ដូចជា នៅឃ្លាតឆ្ងាយពីគ្នាពី១ម៉ែត្រកន្លះ ទៅ ២ម៉ែត្រ មិនត្រូវជួបគ្នា ហើយបើមិនចាំបាច់ទេ លោកថាកុំចេញក្រៅផ្ទះ។
ស្នងការដ្ឋាននគរបាលរាជធានីភ្នំពេញ នៅថ្ងៃទី១៧ ខែមេសានេះ បានច្រានចោលព័ត៌មានដែលបាននិយាយថា សង្កាត់បឹងកេងកងទី១ ត្រូវបានបិទ។ បើតាមទំព័រហ្វេសប៊ុករបស់ស្នងការដ្ឋាននគរបាលរាជធានីភ្នំពេញ ឱ្យដឹងថា មិនមានករណីបិទសង្កាត់បឹងកេងកងដូចការចុះផ្សាយរបស់ព័ត៌មានមួយចំនួនឡើយ។
យោងតាមទំព័រហ្វសប៊ុកស្នងការដ្ឋាននគរបាលរាជធានីភ្នំពេញ៖ «សេចក្តីបដិសេធរបស់អធិការដ្ឋាននគរបាលខណ្ឌបឹងកេងកង។ លោកវរសេនីយ៍ទោ ស៊ឹម ពិសិដ្ឋ អធិការនគរបាលខណ្ឌបឹងកេងកង សូមធ្វើការបដិសេធចំពោះព័ត៌មានក្លែងក្លាយមួយចំនួនដែលបាននិយាយថា សង្កាត់បឹងកេងកងទី១ ត្រូវបានបិទ ជាក់ស្តែងមិនមានការបិទអ្វីនោះទេ»។
កាលពីថ្ងៃទី១៣ ខែមេសា ឆ្នាំ២០២០ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បង្ហាញការព្រួយបារម្ភពីលទ្ធភាពនៃការឆ្លងជំងឺកូវីដ១៩ ក្នុងសហគមន៍ ប្រសិនបើប្រជាពលរដ្ឋមិនធ្វើតាមការណែនាំរបស់រដ្ឋាភិបាល និងក្រសួងសុខាភិបាល ដោយត្រូវអនាម័យ នៅឆ្ងាយពីគ្នា ឬផ្អាកការជួបជុំធំតូចជាបណ្តោះអាសន្ន ជាដើម។
លោកបន្តថា បើសិនពលរដ្ឋមិនធ្វើតាមសេចក្ដីណែនាំក្រសួងសុខាភិបាល និងរដ្ឋាភិបាល នឹងនាំហានិភ័យខ្ពស់ដល់ពលរដ្ឋតាមមូលដ្ឋាន ហើយសេចក្តីស្លាប់ដោយសារជំងឺឆ្លងនេះនឹងអាចកើតមានផងដែរ។
ក្រសួងសុខាភិបាល ឱ្យដឹងថា គិតមកត្រឹមថ្ងៃនេះ អ្នកឆ្លងជំងឺកូវីដ១៩ មានចំនួនសរុប ១២២នាក់។ ក្នុងចំណោម ១២២នាក់នោះ ព្យាបាលជាសះស្បើយបានចំនួន ៩៨នាក់ ហើយនៅសល់ ២៤នាក់ទៀត កំពុងសម្រាកព្យាបាលនៅតាមមន្ទីរពេទ្យរដ្ឋរាជធានីភ្នំពេញ និងខេត្ត៕
