មន្ត្រីជាន់ខ្ពស់ក្រសួងសុខាភិបាល លើកឡើងថា ទោះបីជាកម្ពុជារកមិនឃើញករណីឆ្លងជំងឺកូវីដ១៩ថ្មី ក្នុងរយៈពេលប្រមាណ ១សប្តាហ៍នេះ ព្រមទាំងបានព្យាបាលអ្នកឆ្លងជំងឺនេះ ជាសះស្បើយជិតអស់ទៅហើយក្តី ប៉ុន្តែ កម្ពុជានៅតែស្ថិតក្នុងចំណុចផុយស្រួយនៃការឆ្លងរាលដាលពិសេសគឺការឆ្លងទៅក្នុងសហគមន៍។
ថ្លែងក្នុងសន្និសីទកាសែតនៅព្រឹកថ្ងៃច័ន្ទនេះ អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន មានប្រសាសន៍ថា ដរាបណាស្ថានភាពជំងឺកូវីដ១៩ នៅតែបន្តរីករាលដាលខ្លាំងនៅលើពិភពលោកដូចពេលបច្ចុប្បន្ន ពលរដ្ឋកម្ពុជាមិនត្រូវធ្វេសប្រហែសនោះឡើយ។
លោកស្រីបន្ថែមថា ស្ថិតនៅក្នុងចំណុចផុយស្រួយនេះ កម្ពុជានឹងអាចរីករាលដាលជំងឺកូវីដ១៩ ចូលទៅក្នុងសហគមន៍ ប្រសិនបើពលរដ្ឋមានការធ្វេសប្រហែស ឬភ្លេចខ្លួននោះ។
លោកស្រីមានប្រសាសន៍បន្ថែមថា៖ «អីចឹង ខ្ញុំចង់ជម្រាបជូនថា នៅពេលខាងមុខនេះ យើងមិនត្រូវប្រហែសទេ។ យើងនឹងអាច ខ្ញុំប្រើពាក្យអីចេះថា យើងនឹងអាច ប្រសិនបើបុគ្គលគ្រប់រូបភ្លេចខ្លួនហើយ គាត់បែរជាគិតថា យើងអស់មានបញ្ហាកូវីដ១៩ហើយ ហើយវិធានការការពារខ្លួនរបស់យើងនេះ យើងមិនបន្តអនុវត្តឱ្យបានខ្ជាប់ខ្ជួនទេនោះ។ អីចឹង ការរាតត្បាត ឬយើងអាចនិយាយមួយបែបទៀតនោះ ថាការវាយលុកវីរុសកូវីដ១៩ហ្នឹង នឹងអាចកើតមានឡើង។ អីចឹង ដូច្នេះហើយនៅក្នុងដំណាក់កាលផុយស្រួយនេះ យើងមិនចង់ឃើញ យើងមិនចង់ឱ្យកើតមាននូវការចម្លងចូលទៅក្នុងសហគមន៍យើងនោះទេ»។
ក្រសួងសុខាភិបាលនៅថ្ងៃនេះ បានបញ្ជាក់ថា ក្នុងចំណោមអ្នកជំងឺកូវីដ១៩ ចំនួន ១២២នាក់ គឺមានអ្នកជំងឺ ១០៧នាក់ ឬស្មើជាង ៨៧ភាគរយហើយ ដែលត្រូវបានព្យាបាលឱ្យជាសះស្បើយ នៅឡើយតែ ១៥នាក់ទៀតប៉ុណ្ណោះ ដែលកំពុងសម្រាកនៅតាមមន្ទីរពេទ្យរដ្ឋ។ ក្រសួងបញ្ជាក់ទៀតថា រយៈពេល ១សប្តាហ៍ហើយដែលរកមិនឃើញមានអ្នកឆ្លងជំងឺកូវីដ១៩ ថ្មីនោះ។
ប្រធានអង្គការសុខភាពពិភពលោកប្រចាំកម្ពុជា លោកស្រី លី អៃឡាន (Li Ailan) បានឱ្យដឹងតាមរយៈអ្នកបកប្រែនៅក្នុងសន្និសីទកាសែតនោះថា ការផ្ទុះជំងឺកូវីដ១៩ជាសកល អាចបញ្ចប់ទៅបាននៅពេលប្រទេសនៅលើពិភពលោកលែងមានបញ្ហាដោយសារជំងឺនេះបន្តទៀត ឬជំងឺនេះបានបាត់ពីលើភពផែនដីតែម្តង។
លោកស្រីបន្តថា មានបណ្តាប្រទេសអភិវឌ្ឍន៍ជាច្រើន បានឆ្លងរាលដាលជំងឺនេះ ហើយករណីស្លាប់ក៏កាន់តែច្រើនផងដែរ ដោយសារប្រទេសទាំងនោះចូលដល់កម្រិតឆ្លងរាលដាលខ្លាំងទៅក្នុងសហគមន៍ពួកគេ។
លោកស្រីឱ្យដឹងតាមរយៈអ្នកបកប្រែថា៖ «នាងខ្ញុំចង់ជម្រាបថា ជំងឺកូវីដ១៩នេះ ជាជំងឺថ្មីនៅឡើយ ហើយនៅមានកត្តាច្រើនណាស់ដែលយើងនៅមិនទាន់ដឹងអំពីវីរុសនេះ។ ប៉ុន្តែ អ្វីដែលសំខាន់នោះ សម្រាប់ប្រទេសដែលយើងឃើញមានស្លាប់ច្រើន គឺយើងសង្កេតឃើញថា ប្រទេសមួយចំនួនហ្នឹងគឺស្ថិតនៅក្នុងដំណាក់កាលទី៣ ដែលមានការរាតត្បាតទៅក្នុងសហគមន៍រួចបាត់ទៅហើយ»។
លោកស្រី លី អៃឡាន បានលើកឡើងកាលពីសប្តាហ៍មុនដោយសម្តែងក្តីបារម្ភថា ប្រសិនបើការឆ្លងរីករាលដាលជំងឺកូវីដ១៩ មានកាន់តែច្រើន ពិសេសរាលដាលក្នុងសហគមន៍ កម្ពុជាអាចជួបបញ្ហាប្រឈមជាច្រើន ដូចជា បញ្ហាខ្វះមន្ត្រីជំនាញ ខ្វះសម្ភារបច្ចេកទេសវេជ្ជសាស្ត្រ និងខ្វះសមត្ថភាពគ្រប់គ្រង ជាដើម។
កាលពីថ្ងៃម្សិលមិញ លោកនាយករដ្ឋមន្ត្រី ហ៊ុន សែន បានផ្ញើសារក្រើនរំលឹកពលរដ្ឋជាថ្មីទៀត ឱ្យមានការប្រុងប្រយ័ត្ន ដោយយកចិត្តទុកដាក់ចំពោះសុវត្ថិភាពសុខភាពជាប្រចាំ ហើយត្រូវចងចាំគ្រប់ពេលថា ជំងឺឆ្លងកូវីដ-១៩ គឺជាជំងឺឆ្លងរាតត្បាតដ៏កាចសាហាវបំផុត។
លោកថា ក្នុងពេលតែមួយពព្រិចភ្នែកប៉ុណ្ណោះ ជំងឺនេះអាចបង្កវិនាសកម្មបានយ៉ាងឆាប់រហ័សបំផុត ហើយមកទល់ពេលនេះ គ្មានថ្នាំលេប ឬចាក់ព្យាបាលនៅឡើយទេ។ លោកក៏ប្រាប់ឱ្យពលរដ្ឋយកជាប់ជាមួយនូវម៉ាស ទឹកអាល់កុល ឬជែលសម្លាប់មេរោគ និងបាក់តេរី ហើយឧស្សាហ៍លាងសម្អាតដៃជាប្រចាំ។ លោកថា សូមកុំឱ្យមានការសោកស្តាយធ្លាក់មកលើខ្លួនយើង និងក្រុមគ្រួសារយើងឱ្យសោះ ដោយសារតែការធ្វេសប្រហែស និងមើលស្រាលជំងឺឆ្លងកូវីដ-១៩នោះ។
ក្រសួងសុខាភិបាលអះអាងថា ចាប់តាំងពីខែមករា រហូតដល់ថ្ងៃទី១៩ ខែមេសា ឆ្នាំ២០២០នេះ ក្រសួងបានធ្វើតេស្ត ឬវិភាគសំណាកពលរដ្ឋចំនួនជិត ១ម៉ឺននាក់ (៩៧៩២) ដោយក្នុងចំណោមពលរដ្ឋ ១លាននាក់ កម្ពុជាបានធ្វើវិភាគសំណាកពលរដ្ឋចំនួន ៦១២នាក់។
ដោយឡែក អ្នកនាំពាក្យក្រសួងសុខាភិបាលមួយរូបទៀត លោកស្រី យក់ សម្បត្តិ បញ្ជាក់ថា គ្រូពេទ្យជួរមុខដែលនៅព្យាបាលអ្នកជំងឺ ឬធ្វើការងារប្រយុទ្ធប្រឆាំងជំងឺកូវីដ១៩ផ្ទាល់ មានចំនួន ៣ ពាន់នាក់ ប៉ុន្តែ មិនមានគ្រូពេទ្យណាម្នាក់រកឃើញវិជ្ជមានជំងឺកូវីដ១៩ នោះឡើយ៕
