ក្រសួងសុខាភិបាល ប្រកាសថា រយៈពេលបីថ្ងៃនេះ មិនមានអ្នកឆ្លង និងមិនមានអ្នកជាសះស្បើយពីជំងឺកូវីដ១៩នោះទេ ដែលធ្វើឱ្យចំនួនអ្នកឆ្លង និងអ្នកជាសះស្បើយនៅថេរដដែល។
ក្នុងសេចក្ដីប្រកាសព័ត៌មានរបស់ក្រសួងសុខាភិបាលចុះថ្ងៃទី២៤ ខែមេសា ឆ្នាំ២០២០ ឱ្យដឹងថា ចាប់ពីថ្ងៃទី២០ ដល់ថ្ងៃ២៣ ខែមេសា កន្លងមកនេះ ចំនួនអ្នកឆ្លងជំងឺកូវីដ១៩ នៅត្រឹមតែ ១២២នាក់ដដែល ដោយមិនមានអ្នកឆ្លងថ្មីនោះទេ។ ដោយឡែក អ្នកជាសះស្បើយវិញ ក្រសួងថា នៅត្រឹមតែ ១១០នាក់ដដែល។
ក្រសួងសុខាភិបាល អះអាងថា គិតមកដល់ថ្ងៃនេះ កម្ពុជាមានអ្នកឆ្លងជំងឺកូវីដ១៩ សរុប ១២២នាក់។ ក្នុងចំណោមអ្នកឆ្លងជំងឺកូវីដ១៩ ទាំង ១២២នាក់ គឺព្យាបាលជាសះស្បើយបានចំនួន ១១០នាក់ ហើយនៅសល់ ១២នាក់ទៀត កំពុងសម្រាកព្យាបាលនៅមន្ទីរពេទ្យរាជធានីភ្នំពេញ និងខេត្ត។
បើទោះបីជាកម្ពុជារកមិនឃើញករណីឆ្លងជំងឺកូវីដ១៩ថ្មី ហើយអ្នកជាសះស្បើយជិតអស់ក្តី ប៉ុន្តែមន្ត្រីជាន់ខ្ពស់ក្រសួងសុខាភិបាល លោកស្រី ឱ វណ្ណឌីន អះអាងកាលពីថ្ងៃទី២០ ខែមេសា កន្លងមកថា កម្ពុជានៅតែស្ថិតក្នុងចំណុចផុយស្រួយនៃការឆ្លងរាលដាលជំងឺកូវីដ១៩ ពិសេសគឺការឆ្លងទៅក្នុងសហគមន៍៕
