អ្នកឃ្លាំមើលសិទ្ធិមនុស្ស និងការអភិវឌ្ឍសង្គម បង្ហាញការព្រួយបារម្ភថា ករណីថៃកំណត់ថាកម្ពុជាជាប្រទេសមានហានិភ័យខ្ពស់នៃការឆ្លងមេរោគកូវីដ១៩នោះ នឹងធ្វើឱ្យការបិទព្រំដែនអូសបន្លាយយូរ បង្កការលំបាកដល់ពលរដ្ឋខ្មែរក្រីក្រដែលត្រូវស្វែងរកការងារធ្វើនៅក្នុងប្រទេសថៃ។
តាមសេចក្តីប្រកាស ចុះថ្ងៃទី២២ ខែមេសា ប្រទេស ៤ទៀតដែលថៃដាក់ក្នុងបញ្ជីហានិភ័យដែរនោះមាន ម៉ាឡេស៊ី ឡាវ ឥណ្ឌូនេស៊ី និងមីយ៉ាន់ម៉ា។
ក្រសួងសុខាភិបាលថៃ បានសំអាងក្នុងសេចក្តីប្រកាសនោះថា ការសម្រេចនេះដើម្បីការពារការឆ្លងរាលដាល និងគ្រប់គ្រងជំងឺកូវីដ១៩នេះក្នុងប្រទេសខ្លួនឱ្យមានប្រសិទ្ធភាព។
អ្នកនាំពាក្យក្រសួងការបរទេសកម្ពុជា លោក កុយ គួង ហៅការសម្រេចរបស់ថៃនេះ ជាវិធានផ្ទៃក្នុងនៃប្រទេសនីមួយៗ មិនប៉ះពាល់ទំនាក់ទំនងការទូតទេ។
លោកថា៖ «គេដាក់ គ្រាន់តែឱ្យអាជ្ញាធរនៅតាមបណ្តាខេត្តជាប់ព្រំដែនថៃ ត្រូវមានការប្រុងប្រយ័ត្នតែប៉ុណ្ណឹង។ អាហ្នឹងតាមការបកស្រាយរបស់គេ។ យើងមិនមានអីភ្ញាក់ផ្អើលទេ»។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី មានប្រសាសន៍ថា ការដែលថៃដាក់កម្ពុជាក្នុងបញ្ជីហានិភ័យនៃការឆ្លងជំងឺកូវីដ១៩នេះ អាចជាវិធានទប់ស្កាត់លំហូរចំណាកស្រុកចូលប្រទេសខ្លួនវិញផង និងមិនជឿលើវិស័យសុខាភិបាលរបស់ប្រទេសជិតខាងខ្លួនផង។
លោកថា៖ «កត្តាធំហ្នឹង អាចគេមើលឃើញថា ការចន្លោះប្រហោងនៃការទប់ទល់ជំងឺហ្នឹង […] ទោះបីយើងរកមិនទាន់ឃើញករណីច្រើនក៏ដោយ។ ពិសេសទៅទៀត សូម្បីតែក្រសួងរបស់យើងក៏នៅតែទទួលស្គាល់ថា ការឆ្លងនៃពួកកូវីដ១៩នេះ វានៅតែមានភាពផុយស្រួយនៅឡើយ បើយើងខ្វះការប្រុងប្រយ័ត្ននោះ»។
ប៉ុន្តែ អ្នកឃ្លាំមើលរូបនេះ ផ្តល់ជាយោបល់ថា ដើម្បីបញ្ចៀសកម្ពុជាពីហានិភ័យពីការគំរាមកំហែងកូវីដ១៩ រដ្ឋាភិបាលគួរពង្រឹងប្រសិទ្ធភាពទប់ស្កាត់ការឆ្លង និងដោះស្រាយបញ្ហាស្បៀងរបស់ពលរដ្ឋ។
នាយកប្រតិបត្តិសម្ព័ន្ធភាពការងារ និងសិទ្ធិមនុស្ស លោក មឿន តុលា បង្ហាញការព្រួយបារម្ភថា ពលរដ្ឋខ្មែរអាចនឹងប្រថុយគ្រោះថ្នាក់ចូលទៅរកការងារនៅប្រទេសថៃ បើការជួយរបស់រដ្ឋាភិបាលមិនឆ្លើយតបទៅនឹងទំហំនៃផលប៉ះពាល់របស់ពួកគេ។
លោកថា៖ «មនុស្សកាលណាធ្លាក់ដល់រឿងក្រពះ ប្រហែលជាទុករឿងក្រពះជារឿងទី១ ហើយរឿងសុវត្ថិភាពសុខភាពជារឿងទី២ ឬទី៣។ ដូចនេះ មនុស្សអាចប្រថុយចេញពីផ្ទះ ដើម្បីទៅរកការងារ ឬមុខរបរអី។ អ៊ីចឹង យើងឃើញថា [ពលករ] អាចប្រថុយទៅធ្វើការនៅប្រទេសថៃវិញហើយ»។
គិតត្រឹមថ្ងៃសុក្រនេះ កម្ពុជា-ថៃ មិនទាន់ឯកភាពគ្នា ដើម្បីបើកច្រកព្រំដែនឱ្យដំណើរការឡើងវិញនៅឡើយទេ ក្រោយពីប្រកាសបិទកាលពីជិត ១ខែមុន។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានអះអាងក្នុងសន្និសីទសារព័ត៌មានកាលពីថ្ងៃចន្ទថា ពលករខ្មែរជិត ៩ម៉ឺននាក់ ដែលធ្វើការនៅប្រទេសថៃ បានមកស្រុកកំណើតក្នុងពិធីចូលឆ្នាំខ្មែរ។ ប៉ុន្តែថា ពួកគេទាំងនោះគ្មាននរណាម្នាក់រកឃើញឆ្លងកូវីដ១៩ទេ។
រដ្ឋមន្ត្រីក្រសួងមហាផ្ទៃ លោក ស ខេង អះអាងក្នុងពិធីមួយកាលពីថ្ងៃពុធថា ពលករខ្មែរភាគច្រើនមកពីប្រទេសថៃ មានគម្រោងត្រឡប់ទៅវិញ ដើម្បីដោះស្រាយបញ្ហាជីវភាពរបស់ពួកគេ ខណៈកូវីដ១៩ នៅគំរាមកំហែងនៅឡើយ។
សាស្ត្រាចារ្យផ្នែកការទូត និងកិច្ចការពិភពលោកនៅសាកលវិទ្យាល័យ Occidental College សហរដ្ឋអាមេរិក លោកបណ្ឌិត អៀ សុផល មានប្រសាសន៍ថា នៅកម្ពុជា បានតេស្តត្រឹមតែ ៥៧៨៦វត្ថុសំណាកប៉ុណ្ណោះ បើធៀបទីក្រុង Los Angeles កន្លែងលោករស់នៅ គេធ្វើតេស្តរកមេរោគលើវត្ថុសំណាកមនុស្ស ៥៥០០នាក់ក្នុង១ថ្ងៃ ។
លោកបណ្ឌិត អៀ សុផល យល់ថា ការដែលថៃដាក់កម្ពុជាក្នុងបញ្ជីហានិភ័យ អាចមកពីថៃមិនទុកចិត្តពីចំណាត់ការប្រយុទ្ធប្រឆាំងជំងឺកូវីដ១៩នេះ។
លោកថា៖ «ប្រព័ន្ធគាំពារសុខភាពរបស់កម្ពុជាខ្សោយខ្លាំងណាស់ បើធៀបជាមួយប្រទេសសិង្ហបុរី ហ្វីលីពីន និងវៀតណាម ដែលយើងដឹងថា កម្ពុជានឹងមិនរកឃើញនរណាម្នាក់នោះទេ»។
ប្រទេសថៃ កាលពីដើមខែមីនា បានប្រកាសដាក់ប្រទេស៤ ក្នុងបញ្ជីហានិភ័យនៃការឆ្លងជំងឺកូវីដ១៩ដែរ មាន ប្រទេសចិន (រួមបញ្ចូលហុងកុង និងម៉ាកាវផងដែរ) កូរ៉េខាងត្បូង អ៊ីតាលី និងអ៊ីរ៉ាក់។
យ៉ាងនេះក្តី គិតត្រឹមថៃសុក្រនេះ ប្រទេសថៃត្រូវបានគេកត់ត្រាថា មានអ្នកឆ្លងជំងឺកូវីដ១៩ ខ្ពស់លំដាប់ទី៥ នៃបណ្ដាប្រទេសអាស៊ានទាំង ១០ មានន័យថា ខ្ពស់ជាងកម្ពុជា។
បើតាមកំនត់ត្រា ថៃមានអ្នកឆ្លង ២៨២៦នាក់ ជាសះស្បើយ ២៣៥២នាក់ និងអ្នកស្លាប់ចំនួន ៥០នាក់ ខណៈប្រទេសកម្ពុជាស្ថិតក្នុងលំដាប់ទី៨ មានអ្នកឆ្លង ១២២នាក់ ព្យាបាលជា ១១០នាក់ និងគ្មានអ្នកស្លាប់៕
