អាជ្ញាធរខេត្តបន្ទាយមានជ័យ បានប្រាប់ឱ្យដឹងថា យ៉ាងហោចណាស់មនុស្សម្នាក់របួសស្រាល និងផ្ទះជាង ៦០០ខ្នងរងការខូចខាត ដោយសារខ្យល់កន្ត្រាក់អំឡុងពេលប៉ុន្មានសប្ដាហ៍កន្លងមកនេះ។
អភិបាលខេត្តបន្ទាយមានជ័យ លោក អ៊ុំ រាត្រី ឱ្យដឹងថា ចាប់ពីថ្ងៃទី១២ ខែមេសា ដល់ថ្ងៃ២៦ ខែដដែលនេះ ខ្យល់កន្ត្រាក់បណ្តាលឱ្យពលរដ្ឋម្នាក់រងរបួសស្រាលត្រូវក្បាល និងខូចខាតផ្ទះប្រជាពលរដ្ឋជាង ៦០០ខ្នង។
លោកបន្ថែមថា ស្រុកដែលរងគ្រោះច្រើនជាងគេរួមមាន ស្រុកថ្មពួក ខូចខាតប្រហែល ២៣០ខ្នង និងស្រុកម៉ាឡៃ ប្រហែលជាង ២៦០ខ្នង រួមទាំងស្រុកផ្សេងៗទៀតជាដើម។
អភិបាលខេត្តរូបនេះ បញ្ជាក់ថា ផ្ទះដែលខូចខាតធ្ងន់ធ្ងរប្រហែលជា ១៥ភាគរយ ហើយភាគច្រើនខូចខាតដំបូលប្រក់ស័ង្កសី និងផ្ទះឈើ។
លោកថា រហូតមកដល់ថ្ងៃទី២៦ ខែមេសានេះ ក្រុមការងារជំនាញខេត្ត បានចុះជួយប្រជាពលរដ្ឋដែលរងបួសស្រាល និងជួសជុលផ្ទះប្រជាពលរដ្ឋទាំងនោះរួចរាល់ហើយ៕
