កូនប្រុសសកម្មជនបរិស្ថាន ចោទអាជ្ញាធរស្រុករវៀង ខេត្តព្រះវិហារ រារាំងពួកគេមិនឱ្យប្រារព្ធខួប ៨ឆ្នាំនៃការបាញ់សម្លាប់សកម្មជនបរិស្ថានដ៏ល្បីឈ្មោះ លោក ឈុត វុទ្ធី ជាការរឹតត្បិតសេរីភាព។
កូនប្រុសបង្កើតលោក ឈុត វុទ្ធី និងជាប្រធានអង្គការការពារធនធានធម្មជាតិ លោក ឆឺយ ឧត្តមរស្មី បានប្រាប់វីអូឌីនៅថ្ងៃនេះថា អភិបាលរងស្រុករវៀង និងកងប្រដាប់អាវុធខេត្តព្រះវិហារ បានចុះរារាំង និងគំរាមយកពួកគេប្រមាណជាង ២០នាក់ ទៅឃុំទុក ១៤ថ្ងៃ បើនៅតែរៀបចំពីធីបង្សុកូលរំលឹកខួបលោក ឈុត វុទ្ធី នៅក្នុងព្រៃឡង់ កាលពីវេលាម៉ោង ៧យប់ម្សិលមិញ ក្រោមហេតុផលទប់ស្កាត់ការឆ្លងកូវីដ១៩។
លោក ឧត្តមរស្មី ហៅការរាំងរបស់អាជ្ញាធរថា ជាការរឹតត្បិតសេរីភាពជួបជុំ និងការធ្វើពិធីបែបសាសនា។
លោក ឧត្ដមរស្មី ប្រាប់ថា៖ «ខ្ញុំយល់ថា រាល់ដងហើយ គេរកលេសនេះលេសនោះមិនឱ្យយើងធ្វើ [ពិធីរំលឹកខួបលោក ឈុត វុទ្ធី]។ ឥឡូវថ្មីៗនេះ គេយកលេសជំងឺកូវីដ កុំឱ្យយើងប្រមូលផ្តុំគ្នា ទាមទារយុត្តិធម៌ជូនគាត់ ដើម្បីកុំឱ្យពួកយើងចូលព្រៃឡង់ប្រារព្ធពីធីហ្នឹងទេ»។
បន្ថែមពីនេះ លោក ឧត្តមរស្មី បង្ហាញការងឿងឆ្ងល់ថា ហេតុអ្វីមន្ត្រីរដ្ឋាភិបាលនៅតែរារាំងមិនឱ្យពួកគាត់ និងអ្នកគាំទ្រស្រលាញ់លោក ឈុត វុទ្ធី ដើម្បីប្រារព្ធខួបនោះ។ លោកថា ប្រហែលជាមន្ត្រីរដ្ឋាភិបាលមួយចំនួន អាចជាប់ពាក់ព័ន្ធនឹងអំពើឃាតកម្មលើឪពុករបស់លោក ទើបខ្លាចស្រមោលអ្នកស្លាប់ រហូតមិនឱ្យប្រារព្ធពិធីរំលឹកខួប។
វីអូឌីមិនអាចសុំការបំភ្លឺពីអភិបាលរងស្រុករវៀង លោក មួយ វ៉ុន បានទេនៅរសៀលថ្ងៃនេះ។
ចំណែក អភិបាលស្រុករវៀង ខេត្តព្រះវិហារ លោក ហោ ប៊ុនហួរ មានប្រសាសន៍ថា ដើមចមដែលនាំក្រុមការងាររបស់លោក សហការជាមួយសមត្ថកិច្ចចុះប្រាប់សកម្មជនបរិស្ថានមិនឱ្យធ្វើពិធីសាសនាប្រារព្ធខួបលោក ឈុត វុទ្ធី គឺធ្វើតាមការណែនាំរបស់រដ្ឋាភិបាល ដើម្បីទប់ស្កាត់ជំងឺកូវីដ១៩ មិនមែនរឹតត្បិតសេរីភាពនៃការជួបជុំនោះទេ។
លោក ហោ ប៊ុនហួរ មានប្រសាសន៍ថា៖ «រដ្ឋាភិបាលចេញសេចក្តីណែនាំ [ស.ជ.ណ] ពាក់ព័ន្ធការប្រមូលផ្តុំ ការពារកូវីដ១៩ ហើយកូវីដ១៩ មិនត្រូវរលត់ទេ ធ្វើម៉េចឱ្យគាត់បំបែកហ្វូង។ គ្នាសួរនាំគាត់មកពីណា ខេត្តណាខ្លះ»។
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ដំណាក់កាលរួមគ្នាទប់ស្កាត់កូវីដ១៩ មន្ត្រីរដ្ឋាភិបាលត្រូវមានការប្រុងប្រយ័ត្នក្នុងការបំពេញបេសកកម្មរបស់ខ្លួន លោកថា អាជ្ញាធរពាក់ព័ន្ធគួរតែមានការចរចាគ្នាឱ្យធ្វើដោយមានការប្រុងប្រយ័ត្ន ប្រសើរជាងហាមមិនឱ្យធ្វើ ដើម្បីចៀសវាងការរិះគន់ពីមហាជន។
លោក អំ សំអាត មានប្រសសន៍ថា៖ «និយាយពីគម្លាតនៃសង្គម និយាយពីគម្លាតនៃការជួបជុំគ្នាក្នុងសម័យកូវីដ១៩ ហើយការចរចាជាការល្អដែរ ជាជាងការហាមឃាត់ដាច់ណាត់។ វាអាចមានការរិះគន់មួយផ្សេងៗ»។
អតីតប្រធានអង្គការការពារធនធានធម្មជាតិ លោក ឈុត វុទ្ធី ត្រូវបានគេបាញ់សម្លាប់នៅជិតតំបន់ព្រៃការពារមួយកន្លែង ត្រង់ចំណុចវាលបី ក្នុងឃុំបាក់ខ្លង ស្រុកមណ្ឌលសីមា ខេត្តកោះកុង កាលពីថ្ងៃទី២៦ ខែមេសា ឆ្នាំ២០១២ (មានរយៈពេល ៨ឆ្នាំហើយ) ខណៈលោកបាននាំអ្នកកាសែត ឌឹ ខេមបូឌា ដេលី ពីររូបចុះទៅយកព័ត៌មានអំពីបទល្មើសព្រៃឈើនៅតំបន់នោះ។
សំណុំរឿងឃាតកម្មមួយនេះ ត្រូវបានតុលាការបិទបញ្ចប់ ដោយអះអាងថា អ្នកដែលបាញ់សម្លាប់លោក ឈុត វុទ្ធី ពេលនោះជាមន្ត្រីកងរាជអាវុធហត្ថខេត្តកោះកុងម្នាក់ឈ្មោះ អ៊ិន រតនា បន្ទាប់ពីគណៈកម្មការចំពោះកិច្ចរបស់រដ្ឋាភិបាលចុះស៊ើបអង្កេតករណីនេះ អះអាងថា លោក អ៊ិន រតនា បានបាញ់សម្លាប់ខ្លួនឯង ក្រោយពីបាញ់សម្លាប់លោក ឈុត វុទ្ធី រួច។ ប៉ុន្តែ ក្រុមគ្រួសារសាច់ញាតិជនរងគ្រោះនៅតែអះអាង យុត្តិធម៌ពិតមិនទាន់ទទួលបាននៅឡើយ៕