អ្នកនាំពាក្យក្រសួងការងារ លោក ហេង សួរ បានថ្លែងថា ទំហំនៃការនាំចេញផលិតផលកាត់ដេរកម្ពុជា អាចនឹងធ្លាក់ចុះចន្លោះពី ៥០ ទៅ ៦០ភាគរយ នៅត្រីមាសទី២ នៃឆ្នាំ២០២០នេះ បន្ទាប់ពីការនាំចេញនៅក្នុងត្រីមាសទី១កន្លងមកនេះ មានទំហំត្រឹមតែ ៨០ភាគរយប៉ុណ្ណោះ បើធៀបនឹងតួលេខនាំចេញក្នុងរយៈពេលដូចគ្នាកាលពីឆ្នាំមុន។
លោក ហេង សួរ បានថ្លែងបែបនេះនៅក្នុងសន្និសីទកាសែតទៅកាន់អ្នកសារព័ត៌មាននៅឯទីស្ដីការគណៈរដ្ឋមន្ត្រីកាលពីរសៀលថ្ងៃម្សិលមិញនេះ។
លោកបន្តថា គិតត្រឹមថ្ងៃទី២៧ ខែមេសា កម្ពុជាមិនទាន់ទទួលបានការបញ្ជាទិញពីអ្នកបញ្ជាទិញនៅឡើយទេ ហើយខែបន្ទាប់ក៏អាចការប៉ះពាល់ខ្លាំងផងដែរ ដោយលោកប៉ាន់ប្រមាណថា ការនាំចេញក្នុងត្រីមាសទី២ អាចមានទំហំចន្លោះពី ៥០ ទៅ៦០ភាគរយ នៃទំហំនាំចេញផលិតផលកាត់ដេរនៅត្រីមាសទី២ ឆ្នាំ២០១៩។
លោក ហេង សួរ ថ្លែងថា៖ «អ្នកបញ្ជាទិញខ្លះគាត់សុខចិត្តបន្តបង់នូវអ្វីដែលបានដេររួចហើយ ទោះបីគាត់មិនទាន់ឱ្យនាំចេញ ប៉ុន្តែ គាត់សុខចិត្តបង់។ ប៉ុន្តែ គាត់មិនឱ្យបន្ថែមវត្ថុធាតុដើម ឬមួយដាក់ការបញ្ជាទិញបន្ថែមនោះទេ។ អ៊ីចឹងហើយបានជាធ្វើឱ្យខែ៤ ខែ៥ និងខែ៦ តាមការទំនាក់ទំនងជាមួយអ្នកបញ្ជាទិញ គឺគាត់អត់ទាន់ហ៊ានកំណត់ និងដាក់តួលេខនៃការបញ្ជាទិញណាមួយទេ»។
បើតាមមន្ត្រីនាំពាក្យរូបនេះ ទំហំនៃការនាំចេញបាននិងកំពុងធ្លាក់ចុះក៏ព្រោះតែការផ្ទុះឡើង និងការឆ្លងរីករាលដាលនៃមេរោគកូវីដ១៩ ទាំងនៅប្រទេសកម្ពុជា និងនៅទូទាំងពិភពលោក។
ក្រសួងសុខាភិបាលកម្ពុជា បានប្រកាសអំពីការរកឃើញអ្នកឆ្លងមេរោគកូវីដ១៩ ចំនួន ១២២នាក់ នៅទូទាំងប្រទេសចាប់តាំងពីថ្ងៃទី២៧ ខែមករា រហូតមកដល់ថ្ងៃនេះ ក្នុងនោះពលរដ្ឋកម្ពុជាដល់ទៅ ៥១នាក់ ក៏ត្រូវបានរកឃើញឆ្លងវីរុសនេះផងដែរ ហើយអ្នកឆ្លងវីរុសនេះផ្សេងទៀត គឺជាជនបរទេស។ ទោះជាយ៉ាងណា កម្ពុជាប្រកាសថា អ្នកឆ្លងវីរុសកូរ៉ូណាដល់ទៅ ១១៩នាក់ហើយ ត្រូវបានព្យាបាលជាសះស្បើយ និងត្រូវបានអនុញ្ញាតឱ្យចាកចេញពីមន្ទីរពេទ្យ។
ទន្ទឹមនឹងនេះ តួលេខធ្វើបច្ចុប្បន្នភាពដោយអង្គការសុខភាពពិភពលោក បង្ហាញថា មនុស្សដល់ទៅ ៣លាន ៦ម៉ឺននាក់ហើយ បានឆ្លងវីរុសដ៏រាតត្បាតនេះ ក្នុងនោះមនុស្សដល់ទៅជាង ២១ម៉ឺន ២ពាន់នាក់ បានស្លាប់ គិតត្រឹមថ្ងៃទី២៨ ខែមេសានេះ។
អគ្គលេខាធិការរងសមាគមរោងចក្រកាត់ដេរនៅកម្ពុជា លោក កាំង ម៉ូនីកា មានប្រសាសន៍ថា បញ្ហាធំដែលកើតមានចំពោះការបញ្ជាទិញនេះ គឺនៅអឺរ៉ុប និងអាមេរិកតែម្ដង។ តែទោះយ៉ាងណា លោកថា ការធ្លាក់ចុះនេះ គឺមិនមែនមានតែកម្ពុជានោះទេ គឺមានគ្រប់ប្រទេសដែលផលិតទាំងអស់ ព្រោះជំងឺកូវីដ១៩នេះ បានធ្វើឱ្យប៉ះពាល់ជាសកលជាពិសេសប្រទេសដែលបញ្ជាទិញ។
លោក កាំង ម៉ូនីកា៖ «យើងក៏យល់ស្របដែរថា ខែ៤ និងខែ៥នេះ វាប្រាកដណាស់នឹងធ្លាក់ ហើយនៅក្នុងខែ១ ខែ២ ខែ៣ ក៏នៅយើងក៏មិនទាន់មានវិធានការធ្ងន់ធ្ងរដែលឧទាហរណ៍ដូចជាបិទចរាចរណ៍ ឬ Lockdown អីដែរណា»។
ក្នុងសន្និសីទកាសែតដដែល លោក ហេង សួរ ឱ្យដឹងថា មានរោងចក្រជាង ១៣០ បានដាក់ពាក្យព្យួរការងាររហូតដល់ពេលនេះ ដោយសារកូវីដ១៩ ហើយបានធ្វើឱ្យប៉ះពាល់ដល់កម្មករនិយោជិតជិត ១០ម៉ឺននាក់។
ប្រធានសហភាពការងារកម្ពុជា (CLC) លោក អាត់ ធន់ មានប្រសាសន៍ថា ការធ្លាក់ចុះនៃការបញ្ជាទិញនេះ គឺជានិន្នាការសកល ប៉ុន្តែ លោកស្នើទៅភាគីពាក់ព័ន្ធឱ្យជួយសម្របសម្រួល ដើម្បីធានាសុខភាព និងសុវត្ថិភាពរបស់កម្មករនិយោជិតទាំងអស់។
មួយវិញទៀត លោក អាត់ ធន់ ក៏អំពាវនាវទៅភាគីទាំងអស់ឱ្យគោរពតាមច្បាប់ដូចជា ការបិទរោងចក្រ ហើយមិនផ្តល់ប្រាក់ឱ្យកម្មករតាមផ្លូវច្បាប់ ដើម្បីកេងចំណេញពីពេលដែលកំពុងផ្ទុះកូវីដ១៩នេះជាដើម។
លោក អាត់ ធន់ មានប្រសាសន៍ថា៖ «ជាទូទៅ រដ្ឋាភិបាលក៏អាចប៉ះពាល់ដែរ ព្រោះបាត់បង់ចំណូលសេដ្ឋកិច្ចមួយដែរ។ អ៊ីចឹងអ្វីដែលខ្ញុំគិត ខ្ញុំមើលឃើញ គឺយើងត្រូវពិនិត្យមើលអ្វីដែលយើងអាចធ្វើបាន។ ឧទាហរណ៍ ការប្រឈមរយៈពេលខ្លី ឧទាហរណ៍ កម្មករគាត់នឹងបាត់បង់ការងារ ២ខែ ឬក៏៣ខែ។ អ៊ីចឹងភាគីទាំងអស់ត្រូវតែរកយុទ្ធសាស្រ្តដើម្បីឆ្លើយតបការប្រឈមរយៈពេលខ្លីហ្នឹង»៕
