កម្ពុជាបានប្រកាសពីការរកមិនឃើញករណីថ្មីនៃការឆ្លងវីរុសកូរ៉ូណានោះឡើយនៅរយៈពេល ១៨ថ្ងៃជាប់ៗគ្នាមកហើយ ខណៈដែលអ្នកឆ្លងវីរុសកូវីដ១៩ ចំនួន ៣នាក់ប៉ុណ្ណោះកំពុងស្ថិតក្រោមការព្យាបាលនៅឡើយ។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបានបញ្ជាក់ថា មិនមានករណីព្យាបាលជាសះស្បើយថ្មី ហើយក៏មិនមានករណីវិជ្ជមានកូវីដ១៩ថ្មី ត្រូវបានរកឃើញនោះឡើយកាលពីថ្ងៃម្សិលមិញនេះ។
កម្ពុជាមិនបានរកឃើញករណីឆ្លងថ្មីអស់រយៈពេល ១៨ថ្ងៃជាប់ៗគ្នារួចមកហើយ ខណៈដែលអ្នកផ្ទុកវីរុសនេះ ៣នាក់ទៀត កំពុងស្ថិតនៅក្រោមការព្យាបាលដាច់ដោយឡែកនៅឡើយ។
កម្ពុជាបានប្រកាសពីរកឃើញករណីឆ្លងចុងក្រោយបំផុតកាលពីថ្ងៃទី១២ ខែមេសា ដែលបានកើតឡើងលើបុរសសញ្ជាតិកាណាដាដើមកំណើតចិន អាយុ ៥០ឆ្នាំ និងនារីជនជាតិវៀតណាម អាយុ ២៤ឆ្នាំ នៅក្នុងសង្កាត់បឹងកេងកង រាជធានីភ្នំពេញ។
កម្ពុជាបានប្រកាសពីការរកឃើញករណីឆ្លងវីរុសកូរ៉ូណាចំនួន ១២២នាក់ ចាប់តាំងពីថ្ងៃទី២៧ ខែមករាមក ក្នុងនោះបានរកឃើញឆ្លងលើពលរដ្ឋកម្ពុជា ៥១នាក់ និងជនបរទេស ៧១នាក់។ ប៉ុន្តែ ក្រសួងសុខាភិបាលប្រកាសថា អ្នកឆ្លងវីរុសកូរ៉ូណា ១១៩នាក់ហើយ ត្រូវបានព្យាបាលជាសះស្បើយ និងត្រូវបានអនុញ្ញាតឱ្យចាកចេញពីមន្ទីរពេទ្យ៕
