អ្នកសារព័ត៌មានកម្ពុជាម្នាក់ដែលត្រូវបានសមត្ថកិច្ចចាប់ខ្លួនក្រោយសម្រង់សម្ដីលោកនាយករដ្ឋមន្ត្រី ហ៊ុន សែន នោះ ត្រូវបានផ្ដល់ពាន «សេរីភាពបញ្ចេញមតិ» ដោយស្ថាប័នលើកស្ទួយប្រព័ន្ធផ្សព្វផ្សាយអាល្លឺម៉ង់។
និពន្ធនាយកសារព័ត៌មាន TVFB លោក សុវណ្ណ រិទ្ធី ត្រូវបានសមត្ថកិច្ចចាប់ខ្លួនកាលពីថ្ងៃទី៧ ខែមេសាកន្លងមក ហើយបញ្ជូនទៅឃុំខ្លួនបណ្ដោះអាសន្ន ក្រោយពីសាលាដំបូងរាជធានីភ្នំពេញសម្រេចចោទប្រកាន់ពីបទ «ញុះញង់ឱ្យប្រព្រឹត្តបទល្មើសជាអាទិ៍»។
សារព័ត៌មានអនឡាញរបស់លោក ក៏ត្រូវបានក្រសួងព័ត៌មានសម្រេចដកហូតអាជ្ញាប័ណ្ណភ្លាមៗផងដែរ ក្រោយពីលោកត្រូវបានចាប់ខ្លួន។
សារព័ត៌មាន Deutsche Welle (DW) របស់អាល្លឺម៉ង់ បានចុះផ្សាយថា លោក សុវណ្ណ រិទ្ធី គឺស្ថិតក្នុងចំណោមអ្នកសារព័ត៌មាន ១៧រូប នៅតាមបណ្ដាប្រទេសចំនួន ១៤ ដែលត្រូវបានជ្រើសរើសសម្រាប់ពាន «សេរីភាពបញ្ចេញមតិ»។
អគ្គនាយក DW លោក Peter Limbourg ត្រូវបានដកស្រង់សម្ដីចុះផ្សាយថា ពាន«សេរីភាពបញ្ចេញមតិ»ឆ្នាំ២០២០នេះ ត្រូវបានផ្ដល់ជូនទៅដល់អ្នកសារព័ត៌មានប្រកបដោយសេចក្ដីក្លាហានទាំងអស់នៅទូទាំងពិភពលោក ដែលពួកគេរងការបង្ក្រាបដោយសារតែបានធ្វើសេចក្ដីរាយការណ៍អំពីជំងឺរាតត្បាត។
ក្រៅពីលោក សុវណ្ណ រិទ្ធី អ្នកសារព័ត៌មានចំនួន ១៦នាក់ទៀត ក៏ត្រូវបានផ្ដល់ពាននេះផងដែរ ក្នុងនោះមានអ្នកសារព័ត៌មាន ១រូបនៅប្រទេសស៊ែប៊ី ស្លូវ៉ានី បេឡារុស រុស្ស៊ី វេណេហ៊្សុយអេឡា អ៊ីរ៉ង់ ហ្ស៊ីមបាវ៉េ អ៊ូហ្គាន់ដា ហ្សក់ដង់ ឥណ្ឌា ហ្វីលីពីន អ្នកសារព័ត៌មាន ២រូប នៅប្រទេសតួកគី និងអ្នកសារព័ត៌មាន ៣រូប នៅប្រទេសចិន។
DW គឺជាប្រព័ន្ធផ្សព្វផ្សាយរដ្ឋអាល្លឺម៉ង់ ដែលត្រូវបានផ្សាយទៅពិភពលោកចំនួន ៣០ភាសា និងផ្ដល់ការបណ្ដុះបណ្ដាលពីវិជ្ជាជីវៈសារព័ត៌មានដល់អ្នកសារព័ត៌មាននៅបណ្ដាប្រទេសជាច្រើន៕
