កម្ពុជារកពុំឃើញអ្នកឆ្លងវីរុសកូរ៉ូណាថ្មីអស់រយៈពេលជិត ១ខែហើយ ខណៈអ្នកឆ្លងវីរុសនេះតែ ២នាក់ប៉ុណ្ណោះ បន្តស្ថិតនៅក្រោមការព្យាបាលដាច់ដោយឡែកនៅឡើយ។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបានប្រកាសពីការរកមិនឃើញនូវករណីអ្នកឆ្លង និងអ្នកជាសះស្បើយជំងឺកូវីដ-១៩នោះទេនៅព្រឹកថ្ងៃអាទិត្យនេះ។
ក្រសួងសុខាភិបាល បានប្រកាសថា គិតត្រឹមម៉ោង ៧ព្រឹកថ្ងៃទី១០ ខែឧសភានេះ ក្រសួងរកមិនឃើញអ្នកឆ្លង និងអ្នកជាសះស្បើយជំងឺកូវីដ១៩នោះទេ ខណៈបច្ចុប្បន្នអ្នកជាសះស្បើយសរុបចំនួន១២០នាក់។
កម្ពុជាបានប្រកាសពីការរកឃើញអ្នកឆ្លងវីរុសកូរ៉ូណាចុងក្រោយបំផុតនៅថ្ងៃទី១២ ខែមេសាកន្លងមក ហើយគិតចាប់ពីថ្ងៃនោះរហូតដល់ថ្ងៃនេះ កម្ពុជារកមិនឃើញអ្នកឆ្លងថ្មីអស់រយៈពេល ២៨ថ្ងៃមកហើយ។
កម្ពុជាបានប្រកាសពីការរកឃើញអ្នកឆ្លងវីរុសកូរ៉ូណាចំនួន ១២២នាក់ចាប់តាំងពីចុងខែមករាមក ក្នុងនោះមានពលរដ្ឋកម្ពុជា ៥១នាក់ និងជនបរទេស ៧១នាក់។ ក្នុងចំណោមអ្នកឆ្លង ១២២នាក់ ត្រូវបានគ្រូពេទ្យព្យាបាលជាសះស្បើយចំនួន ១២០នាក់ ហើយនៅសល់ ២នាក់(បុរសម្នាក់ និងស្ត្រីម្នាក់)ទៀតប៉ុណ្ណោះ ដែលរដ្ឋមន្ត្រីក្រសួងសុខាភិបាល លោក ម៉ម ប៊ុនហេង បញ្ជូនមកព្យាបាលនៅតាមមន្ទីរពេទ្យមិត្តភាពខែ្មរ-សូវៀត កាលពីថ្ងៃទី៨ ខែឧសភា៕
