រដ្ឋមន្ត្រីសុខាភិបាល អះអាងថា ពលរដ្ឋកម្ពុជា ២នាក់ដែលបន្តស្ថិតនៅក្រោមការព្យាបាលវីរុសកូរ៉ូណានៅឡើយនោះ មានសុខភាពល្អធម្មតា ហើយលោករំពឹងថា អ្នកទាំងពីរនឹងអាចចាកចេញពីមន្ទីរពេទ្យក្នុងពេលឆាប់ៗខាងមុខនេះ ក្រោយពីត្រូវបានផ្ទេរមកព្យាបាលនៅភ្នំពេញ។
បុរសកម្ពុជាអាយុ ៧៥ឆ្នាំ ត្រូវបានរកឃើញឆ្លងវីរុសកូរ៉ូណានៅឯខេត្តកំពង់ឆ្នាំងកាលពីថ្ងៃទី១៧ ខែមីនាកន្លងមក បន្ទាប់ពីគាត់វិលត្រឡប់ពីការចូលរួមពិធីសាសនាមួយនៅឯប្រទេសម៉ាឡេស៊ី។ រីឯស្ត្រីម្នាក់អាយុ ៣៦ឆ្នាំ នៅខេត្តបន្ទាយមានជ័យ ត្រូវបានរកឃើញឆ្លងវីរុសកូរ៉ូណាកាលពីថ្ងៃទី២៩ ខែមីនាកន្លងមក។
អ្នកឆ្លងវីរុសកូរ៉ូណាទាំងពីររូបនេះ ត្រូវបានក្រសួងសុខាភិបាលសម្រេចផ្ទេរពីមន្ទីរពេទ្យនៅតាមខេត្ត មកទទួលការព្យបាលនៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី៨ ខែឧសភាសប្ដាហ៍មុននេះ។
រដ្ឋមន្ត្រីសុខាភិបាល លោក ម៉ម ប៊ុនហេង ថ្លែងប្រាប់អ្នកសារព័ត៌មានក្នុងសន្និសីទកាសែតនៅព្រឹកថ្ងៃនេះថា អ្នកទាំងពីរត្រូវបានផ្ទេរមកទទួលការព្យាបាលនៅក្នុងមន្ទីរពេទ្យនៅរាជធានីភ្នំពេញ ជាទីដែលលោកថា មានវេជ្ជបណ្ឌិតឯកទេសច្រើន ដែលអាចផ្ដល់ការពិគ្រោះយោបល់ និងផ្ដល់ការព្យាបាលជូនពួកគាត់ឱ្យឆាប់ជាសះស្បើយ។
លោក ម៉ម ប៊ុនហេង ថ្លែងថា៖ «[ក្រុមគ្រូពេទ្យ] ពិនិត្យឃើញថា សុខភាពពួកគាត់ថ្ងៃនេះល្អ ហើយយើងសង្ឃឹមថា គាត់នឹងអាចជាសះស្បើយ និងចេញ [ពីមន្ទីរពេទ្យ] នាពេលថ្ងៃមុននេះ»។
រដ្ឋមន្ត្រីសុខាភិបាលបានថ្លែងបន្តថា អ្នកទាំងពីរត្រូវការពេលវេលាសម្រាប់ការព្យាបាល ក៏ព្រោះតែពួកគាត់មានជំងឺប្រចាំកាយផងដែរ។
លោក ម៉ម ប៊ុនហេង ថ្លែងបន្តថា៖ «មានបញ្ហាមួយចំនួនដោយសារតែមីងមួយ[ស្ត្រីវ័យ ៣៦ឆ្នាំមកពីខេត្តកំពង់ឆ្នាំង] មានជំងឺទឹកនោមផ្អែម។ ដូច្នេះ យូរណាស់ ទឹកនោមផ្អែមនេះ។ ដូច្នេះ ត្រូវការព្យាបាលពីអ្នកឯកទេសជំងឺទឹមនោមផ្អែមផង និងជំងឺឆ្លងផងរួមគ្នា។ ហើយនៅបន្ទាយមានជ័យ ដោយសារគាត់មានបញ្ហាផ្លូវចិត្ត។ ដូច្នេះ គាត់មកពេទ្យមជ្ឈឹមមក គាត់នឹងនរ គាត់សប្បាយចិត្ត»។
កម្ពុជាបានរកឃើញករណីឆ្លងវីរុសកូរ៉ូណាទៅលើមនុស្សសរុប ១២២នាក់ ចាប់តាំងពីចុងខែមករាមក ក្នុងនោះបានកើតឡើងលើពលរដ្ឋកម្ពុជា ៥១នាក់ និងជនបរទេស ៧១នាក់។ ប៉ុន្តែ ក្រសួងសុខាភិបាលបានប្រកាសថា អ្នកឆ្លងវីរុសកូរ៉ូណាដល់ទៅ ១២០នាក់ហើយ ត្រូវបានព្យាបាលជាសះស្បើយ និងត្រូវបានអនុញ្ញាតឱ្យចាកចេញពីមន្ទីរពេទ្យ ខណៈនៅសល់តែ ២នាក់ទៀតប៉ុណ្ណោះ ដែលស្ថិតក្រោមការព្យាបាលដាច់ដោយឡែកនៅឡើយ៕