ភាគីម្ចាស់សណ្ឋាគារ The Great Duke ជាសណ្ឋាគារលំដាប់ផ្កាយនៅក្នុងរាជធានីភ្នំពេញ នៅថ្ងៃទី១៥ ខែឧសភានេះ មិនចូលរួមប្រជុំដោះស្រាយបញ្ហាសំណងឱ្យអតីតបុគ្គលិកតាមការកោះហៅរបស់ក្រសួងការងារ និងបណ្ដុះបណ្ដាលវិជ្ជាជីវៈនោះទេ។
ក្រោយពីបញ្ចប់កិច្ចប្រជុំរយៈពេលជាងមួយម៉ោងនៅក្នុងក្រសួងការងាររួចមក ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជាប្រចាំនៅសណ្ឋាគារ The Great Duke គឺលោក ទូច កុសល បានឱ្យអ្នកសារព័ត៌មានដឹងថា កិច្ចប្រជុំនេះធ្វើឡើងដើម្បីឱ្យម្ចាស់សណ្ឋាគារគោរពទៅតាមសេចក្តីបង្គាប់របស់ក្រុមប្រឹក្សាអាជ្ញាកណ្តាល ដោយទូទាត់សំណងដល់បុគ្គលិកកម្មករនិយោជិត ខណៈពេលដែល The Great Duke អតីតសណ្ឋាគារអាំងទែកង់ទីណង់តាល់ភ្នំពេញ បានបិទទ្វារឈប់ធ្វើអាជីវកម្ម ហើយមិនព្រមទូទាត់សំណងដល់បុគ្គលិកកម្មករនិយោជិត។
លោក ទូច កុសល បន្តថា កន្លងមក ក៏មានកិច្ចប្រជុំជាបន្តបន្ទាប់ជាមួយគ្នាផងដែរ តែភាគីសណ្ឋាគារបានត្រឹមឆ្លើយបតថា មិនមានថវិកាសម្រាប់ដោះស្រាយ។ លោកឱ្យដឹងថា តាមដែលអ្វីដែលក្រុមប្រឹក្សាអាជ្ញាកណ្ដាលបានសម្រេច គឺភាគីសណ្ឋាគារត្រូវចំណាយថវិកាជាង ៣២ម៉ឺនដុល្លារដើម្បីដោះស្រាយបញ្ហានេះ។
លោក ទូច កុសល៖ «យើងខ្ញុំនិយាយតាមត្រង់ទៅ បើសិនជាម្ចាស់សណ្ឋាគារហ្នឹងចេញមុខចេញមាត់ មកជជែកគ្នាថា ឥឡូវគាត់ពិបាកយ៉ាងម៉េច ឱ្យពួកយើងបានដឹង ហើយជជែកទល់មុខគ្នាថា អ្វីដែលយើងអាចជួយបាន អាហ្នឹងយើងចង់បានអញ្ចឹង តែផ្ទុយទៅវិញ គាត់បែរជាព្យាយាមគេចវេស។»
លោក អ៊ូ រតនា អនុប្រធានផ្នែកអន្តរាគមន៍ និងដោះស្រាយបាតុកម្មកូដកម្មគ្រប់មុខសញ្ញានៃក្រសួងការងារ បានឱ្យដឹងថា ក្រោយពីភាគីសណ្ឋាគារមិនព្រមចូលរួមប្រជុំដោះស្រាយបញ្ហានេះ ក្រសួងនឹងមានវិធានការផ្សេងទៀតដើម្បីអន្តរាគមន៍ករណីនេះ តែទោះជាយ៉ាងណា វិធានការនោះជាអ្វី លោក អ៊ូ រតនា មិនបានឱ្យដឹងនោះទេ។
លោកបន្តថា ប្រសិនបើភាគីទាំងពីរ ទាំងអតីតបុគ្គលិក និងភាគីម្ចាស់សណ្ឋាគារបន្ទន់ចិត្តបន្តិចហើយងាកមកចរចាគ្នានោះ គឺពិតជាប្រសើរជាងអ្វីដែលក្រុមប្រឹក្សាអាជ្ញាកណ្ដាលសម្រេចទៅទៀត។
លោក អ៊ូ រតនា៖ «អានេះវាជាសិទ្ធិសម្រេចរបស់គូភាគីទាំងពីរ ប្រសិនបើភាគីទាំងពីរចូលរួមដោះស្រាយ ហើយគាត់ថា ពុំមានលទ្ធភាព គាត់ប្រជុំការចរចាផ្ទៃក្នុងរវាងកម្មករនិយោជិត និងភាគីថៅកែ បើសិនជាគាត់ឯកភាពដែរ គឺជាសិទ្ធិរបស់គាត់។»
កាលពីថ្ងៃទី១១ ខែឧសភា អតីតបុគ្គលិកជាង ១០០នាក់ ដែលបម្រើការងារនៅសណ្ឋាគារ The Great Duke បានប្រមូលផ្តុំគ្នាតវ៉ា និងបិទផ្លូវជិត ១ម៉ោង នៅមុខសណ្ឋាគារផ្ទាល់ ដើម្បីទាមទារការទូទាត់ប្រាក់សំណងពីថៅកែសណ្ឋាគារនេះផងដែរ។ ក្នុងឱកាសនោះ លោក អ៊ូ រតនា មានប្រសាសន៍ថា ភាគីទាំងសងខាងព្រមអនុវត្តទៅតាមក្រុមប្រឹក្សាអាជ្ញាកណ្តាល ហើយឯកភាពអនុវត្តទៅតាមសេចក្តីបង្គាប់របស់អាជ្ញាកណ្តាល ហើយខាងក្រសួងការងារក៏បានចុះដាក់កំហិតដែរ បើសិនមិនអនុវត្តតាម គឺក្រសួងនឹងចាត់វិធានការទៅតាមផ្លូវច្បាប់។
VOD មិនទាន់អាចសុំការបំភ្លឺពីភាគីម្ចាស់សណ្ឋាគារ The Great Duke បាននៅឡើយទេ នៅពេលនេះ។
ជាមួយគ្នានេះ មេធាវីការពារក្តីឱ្យថៅកែម្ចាស់សណ្ឋាគារ The Great Duke គឺលោក លី តៃសេង ក៏បដិសេធការនិយាយទាក់ទងនឹងបញ្ហានេះផងដែរ។
សណ្ឋាគារ The Great Duke ឬអតីតសណ្ឋាគារអាំងទែកុងទីណង់តាល់ (InterContinental) បានប្រកាសបិទប្រតិបត្តិការអាជីវកម្មរបស់ខ្លួន កាលពីថ្ងៃទី៣១ ខែធ្នូ កាលពីឆ្នាំមុន បន្ទាប់ពីប្រតិបត្តិការអាជីវកម្មរបស់ខ្លួនអស់រយៈពេល ២៣ឆ្នាំ។
ក្រោយពីបិទទ្វារ មិនទាន់ទូទាត់ប្រាក់អតីតភាពការងារ ធ្វើឱ្យអតីតបុគ្គលិកនៅសណ្ឋាគារនេះ នាំគ្នាធ្វើញត្តិដាក់ទៅស្ថាប័នរដ្ឋ ដូចជា ក្រសួងការងារ ខុទ្ទកាល័យរដ្ឋាភិបាល និងដាក់ទៅក្រុមប្រឹក្សាអាជ្ញាកណ្តាល ដើម្បីជួយអន្តរាគមន៍ផងដែរ។
កាលពីថ្ងៃទី២០ ខែកុម្ភៈ ឆ្នាំ២០២០ ប្រធានលេខាធិការដ្ឋានក្រុមប្រឹក្សាកណ្តាល បានចេញសេចក្តីសម្រេចជូនដំណឹងទៅភាគីកម្មករនិយោជិត និងភាគីនិយោជក ដើម្បីឱ្យនិយោជកផ្តល់សំណងដល់កម្មករនូវប្រាក់ដំណាច់ទូទាត់ជួសការជូនដំណឹងមុន និងប្រាក់រំលឹកអតីតភាពការងារមុនឆ្នាំ២០១៩ ដោយយកប្រាក់ឈ្នួលគោល និងប្រាក់បន្ទាប់បន្សំមកគណនាផងដែរ៕