មន្ត្រីជាន់ខ្ពស់ក្រសួងសុខាភិបាល ឱ្យដឹងថា ក្រសួងកំពុងស្រាវជ្រាវទៅលើករណីបុរសវៀតណាមម្នាក់ ដែលត្រូវបានរាយការណ៍ថា ត្រូវបានរកឃើញឆ្លងវីរុសកូរ៉ូណា បន្ទាប់ពីវិលត្រឡប់ពីប្រទេសកម្ពុជា។
សារព័ត៌មាន VNExpress របស់វៀតណាម បានចុះផ្សាយកាលពីកាលពីថ្ងៃម្សិលមិញនេះថា បុរសវៀតណាមវ័យ ៣៩ឆ្នាំ នៅស្រុកតាន់ចូវ ខេត្តតាយនិញ ស្ថិតនៅជាប់ព្រំដែនកម្ពុជា ត្រូវបានរកឃើញឆ្លងមេរោគកូវីដ១៩ កាលពីថ្ងៃទី១៦ ខែឧសភា។
បើតាមសារព័ត៌មានដដែលនេះ បុរសរូបនោះ ត្រូវបានរកឃើញឆ្លងវីរុសកូរ៉ូណា បន្ទាប់ពីវិលធ្វើដំណើរត្រឡប់ពីប្រទេសកម្ពុជាវិញ។
ឆ្លើយតបនឹងសំនួរអ្នកសារព័ត៌មានតាមបណ្តាតេឡេក្រាម អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន បានឲ្យដឹងថា មកទល់ពេលនេះ កម្ពុជាមិនទាន់ទទួលបានព័ត៌មានផ្លូវការណាមួយពីភាគីវៀតណាមចំពោះករណីនេះនៅឡើយទេ។
អ្នកស្រីបញ្ជាក់ថា ក្រុមការងាររបស់ក្រសួងសុខាភិបាល ក៏កំពុងស្រាវជ្រាវដោយយកចិត្តទុកដាក់បំផុត ក៏ប៉ុន្តែ មិនទទួលបាននូវព័ត៌មានជាក់លាក់ណាមួយស្ដីអំពីករណីដូចការចុះផ្សាយនោះដែរ។
អ្នកស្រី ឱ វណ្ណឌីន និយាយថា៖«ខ្ញុំគ្រាន់តែសូមជម្រាបជូនថា ករណីនេះមិនមានភាពជាក់លាក់ ហើយក៏មិនអាចនឹងវាយតម្លៃថា ការចម្លងនេះ គឺកើតចេញពីព្រះរាជាណាចក្រកម្ពុជាយើងដែរ ដោយសារបុគ្គលនោះបានទៅដល់ប្រទេសវៀតណាម បើគិតទៅហួសពី ១៤ថ្ងៃទៅហើយមកទល់ពេលដែលចុះផ្សាយថា រកឃើញវិជ្ជមាននោះ»។
បុរសជនជាតិវៀតណាមរូបនោះ បានធ្វើដំណើរទៅខេត្តសៀមរាបកាលពីថ្ងៃទី១០ ខែមករា ហើយបានធ្វើដំណើរឆ្លងដែនដោយខុសច្បាប់ត្រឡប់ទៅវៀតណាមវិញកាលពីថ្ងៃទី២ ខែឧសភា មុននឹងត្រូវបានធ្វើតេស្តរកឃើញវីរុសនៅ ១៤ថ្ងៃក្រោយ។
បន្ថែមពីនេះ អ្នកស្រី វណ្ណឌីន អះអាងថា ក្រសួងសុខាភិបាល នៅតែប្រកាន់ជំហរសហប្រតិបត្តិការល្អ មានតម្លាភាពជានិច្ច និងបន្តការយកចិត្តទុកដាក់ស្រាវជ្រាវជាបន្តទៀត ខណៈដែលអ្នកស្រីថា កម្ពុជាពុំទាន់រកឃើញករណីឆ្លងថ្មីនោះឡើយគិតត្រឹមថ្ងៃទី១៧ ខែឧសភានេះ។
បើតាមសារព័ត៌មាននេះ បុរសវៀតណាមរូបនេះ បានធ្វើដំណើរតាមម៉ូតូឌុបដឹកដោយបុរសជនជាតិកម្ពុជា ទៅកាន់ផ្ទះម្ដាយមីងរបស់ខ្លួនស្ថិតនៅស្រុកតាន់ចូវ។ ក្រោយពីម្ដាយមីងរបស់គាត់ផ្ដល់យោបល់ បុរសរូបនេះបានរាយការណ៍ពីការវិលត្រឡប់របស់ខ្លួនទៅស្ថានីយ៍ប៉ូលិសក្បែរនោះ ហើយត្រូវបានដាក់ឱ្យស្ថិតនៅដាច់ដោយឡែកនៅថ្ងៃទី៣ ខែឧសភា។ សំណាកឈាមរបស់គាត់ ត្រូវបានក្រុមគ្រូពេទ្យយកទៅតេស្ត ហើយលទ្ធផលបង្ហាញថា គាត់មិនបានឆ្លងជំងឺកូវីដ១៩នោះឡើយ។
VNExpress រាយការណ៍បន្តថា ប៉ុន្តែ ការធ្វើតេស្តលើកទីពីរកាលពីថ្ងៃសុក្រកន្លងមកនេះ បង្ហាញថា លោកឆ្លងវីរុស ហើយត្រូវបានដាក់ឱ្យស្ថិតក្រោមការព្យាបាលនៅមន្ទីរពេទ្យទូទៅខេត្តតាយនិញ។
សារព័ត៌មាននេះរាយការណ៍បន្ថែមថា មនុស្ស ១៧នាក់ផ្សេងទៀត ដែលបានប្រាស្រ័យទាក់ទងជាមួយគាត់ ត្រូវបានមន្ត្រីសុខាភិបាលនាំយកទៅដាក់ក្នុងបន្ទប់ដាច់ដោយឡែកផងដែរ៕
