មន្ត្រីការទូតវៀតណាមប្រចាំកម្ពុជា និយាយថា អាជ្ញាធរវៀតណាមនៅមិនទាន់អាចបញ្ជាក់បានទេថា បុរសវៀតណាមម្នាក់ដែលត្រូវបានរកឃើញឆ្លងវីរុសកូរ៉ូណានោះ បានឆ្លងវីរុសនេះពីប្រទេសកម្ពុជា ឬក៏ឆ្លងនៅវៀតណាមដោយផ្ទាល់នោះ។
សេចក្ដីរាយការណ៍សារព័ត៌មាន VNExpress បានចុះផ្សាយថា បុរសវៀតណាមវ័យ ៣៩ឆ្នាំ រស់នៅស្រុកតាន់ចូវ ខេត្តតាយនិញ ត្រូវបានរកឃើញឆ្លងវីរុសកូរ៉ូណាកាលពីថ្ងៃទី១៥ ខែឧសភា។ សារព័ត៌មានបន្តថា បុរសវៀតណាមរូបនេះ ត្រូវបានរកឃើញឆ្លងវីរុសនេះ បន្ទាប់ពីបានធ្វើដំណើរដោយខុសច្បាប់ត្រឡប់ពីកម្ពុជាចូលទៅវៀតណាមវិញនៅថ្ងៃទី២ ខែឧសភា។
វៀតណាម បានសម្រេចបិទទ្វារព្រំដែនជាមួយកម្ពុជា និងផ្អាកការឆ្លងកាត់ព្រំដែនទៅមកចាប់តាំងពីខែមេសាកន្លងមក ហើយកម្ពុជាបានសម្រេចបែបនេះតាមក្រោយវៀតណាមផងដែរ។
អ្នកនាំពាក្យក្រសួងសុខាភិបាលកម្ពុជា អ្នកស្រី ឱ វណ្ណឌីន អះអាងកាលពីថ្ងៃម្សិលមិញថា ក្រសួងបានស្នើទៅភាគីវៀតណាមបកស្រាយចំពោះករណីនេះ។
ក្នុងសេចក្ដីរាយការណ៍របស់ទីភ្នាក់ងារព័ត៌មានវៀតណាម VNA អគ្គរដ្ឋទូតវៀតណាមប្រចាំកម្ពុជា លោក វ៉ូ ក្វាង មិញ ត្រូវបានដកស្រង់សម្ដីដែលនិយាយថា ភាគីវៀតណាមមិនទាន់អាចបញ្ជាក់បានអំពីប្រភព និងទីកន្លែងនៃការឆ្លងវីរុសកូរ៉ូណាទៅលើបុរសវៀតណាមនោះនៅឡើយទេ។
បើតាមសេចក្ដីរាយការណ៍របស់ VNExpress មន្ត្រីសុខាភិបាលវៀតណាម បានប្រមូលយកមនុស្ស ១៧នាក់ផ្សេងទៀតដែលបានប្រាស្រ័យទាក់ទងនឹងបុរសវ័យ ៣៩ឆ្នាំនោះ យកទៅដាក់ឱ្យនៅដាច់ដោយឡែក និងស្ថិតក្រោមការត្រួតពិនិត្យសុខភាព៕
