ក្រសួងសុខាភិបាលកម្ពុជា អះអាងថា អ្នកប្រាស្រ័យទាក់ទងជាមួយស្ត្រីកម្ពុជាម្នាក់ ដែលត្រូវបានរកឃើញឆ្លងវីរុសកូវីដ១៩នាពេលថ្មីៗនេះ មិនមានបញ្ហាសុខភាពនោះឡើយ។
ស្ត្រីកម្ពុជាម្នាក់វ័យ ៣៩ឆ្នាំ ត្រូវបានធ្វើតេស្តរកឃើញឆ្លងជំងឺកូវីដ១៩កាលពីថ្ងៃទី២៣ ខែឧសភា បន្ទាប់ពីគាត់បានធ្វើដំណើរត្រឡប់ពីសហរដ្ឋអាមេរិក ឆ្លងកាត់កូរ៉េខាងត្បូង មុននឹងមកដល់កម្ពុជាកាលពីថ្ងៃទី៨ ខែឧសភានេះ។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន មានបកស្រាយប្រាប់អ្នកសារព័ត៌មានតាមតេឡេក្រាមនាថ្ងៃនេះថា គិតត្រឹមម៉ោង ៧ព្រឹកថ្ងៃទី២៤ ខែឧសភានេះ លទ្ធផលដែលទទួលបានពីវិទ្យាស្ថានប៉ាស្ទ័រកម្ពុជានៅម៉ោង ២២៖៣០នាទី នាថ្ងៃទី២៣ ខែឧសភា បង្ហាញថា ក្នុងចំណោមមនុស្ស ៦៨នាក់ ដែលធ្វើដំណើរតាមយន្តហោះហើរត្រឡប់ពីអាមេរិកឆ្លងកាត់កូរ៉េត្រឡប់មកកម្ពុជា មានជនជាតិខ្មែរម្នាក់ មានវីរុសកូវីដ១៩។
ចំណែក មនុស្ស៦៧នាក់ផ្សេងទៀត ក្នុងនោះខ្មែរ ៣០នាក់ កូរ៉េ ៣៣នាក់ និងជនជាតិរុស្ស៊ី ស្វីស និងអូទ្រីស រួមទាំងស្វាមីស្ត្រីកម្ពុជាដែលឆ្លងកូវីដ១៩ផងនោះ ក្រសួងសុខាភិបាលអះអាងថា គិតត្រឹមថ្ងៃទី២៤ ខែឧសភានេះ មិនមានអ្នកឆ្លងកូវីដ១៩នោះទេ ពោលពួកគេមានសុខភាពល្អធម្មតា។
អ្នកស្រីមានប្រសាសន៍ថា៖ «ពួកគេទាំងអស់គ្នាមិនមានបញ្ហាសុខភាព ហើយផុតកំណត់ ១៤ថ្ងៃហើយ»។
នៅពេលសាកសួរថា តើអ្នកដំណើរទាំងអស់នោះ ស្នាក់នៅទីណា និងមានលិខិតបញ្ជាក់សុខភាពដែរឬយ៉ាងណានោះ អ្នកស្រី ឱ វណ្ណឌីន មិនបានឆ្លើយតបនោះឡើយ។
សេចក្តីប្រកាសព័ត៌មានរបស់ក្រសួងសុខាភិបាល កាលពីថ្ងៃទី២៣ ខែឧសភានេះ បញ្ជាក់ថា អ្នកដែលទើបរកឃើញមានផ្ទុកមេរោគកូវីដ១៩នេះ ជាស្ត្រីជនជាតិខ្មែរអាយុ ៣៩ឆ្នាំ រស់នៅសង្កាត់ទឹកថ្លា ខណ្ឌសែនសុខ រាជធានីភ្នំពេញ។
អ្នកមានកូវីដ១៩ គិតមកត្រឹមថ្ងៃទី២៤ ខែឧសភាឆ្នាំ២០២០នេះ មានចំនួន ១២៤នាក់ក្នុងនោះ ស្រ្តី៣៨នាក់។ ក្នុងចំណោមអ្នកដែលមានកូវីដ១៩ទាំងនេះ ក្រសួងព្យាបាលជាសះស្បើយចំនួន ១២២នាក់ និងនៅសល់ ២នាក់(ស្ត្រីម្នាក់) ជាករណីទើបរកឃើញថ្មី ដែលស្ថិតក្រោមការព្យាបាលនៅមន្ទីរពេទ្យមិត្តភាព-សូវៀត៕