ចាងហ្វាងរបស់សារព័ត៌មានមួយចំនួន អះអាងថា សមត្ថកិច្ចខណ្ឌមានជ័យ បានដោះលែងអ្នកសារព័ត៌មានចំនួន ១៣នាក់ឱ្យមានសេរីភាពវិញ ក្រោមលក្ខខណ្ឌឈប់ឱ្យទៅយកព័ត៌មាននៅកន្លែងខុសច្បាប់ ហើយអ្នកទាំងនោះប្រឈមនឹងអង្គភាពបញ្ឈប់ពីការងារជាដើម។
អ្នកសារព័ត៌មាន ១៣នាក់ មកពីស្ថាប័នសារព័ត៌មានចំនួន ១០ ត្រូវបានសមត្ថកិច្ចចាប់ខ្លួនកាលពីចុងសប្ដាហ៍មុន នៅក្នុងប្រតិបត្តិការបង្ក្រាបទីតាំងជល់មាន់មួយកន្លែង ស្ថិតនៅក្នុងសង្កាត់ស្ទឹងមានជ័យ ខណ្ឌមានជ័យ ជាយភាគខាងត្បូងរាជធានីភ្នំពេញ។ ពួកគេស្ថិតក្នុងចំណោមមនុស្សសរុប ២៧នាក់ ដែលត្រូវបានសមត្ថកិច្ចចាប់ខ្លួននាពេលនោះ។
អ្នកយកព័ត៌មាន ៣រូបនៃកាសែតផ្សះផ្សាជាតិ និងសារព័ត៌មានអនឡាញសេនាបតី ស្ថិតក្នុងចំណោមអ្នកយកព័ត៌មាន ១០នាក់ផ្សេងទៀត ដែលត្រូវបានចាប់ខ្លួននាពេលនោះ។
លោក សុខ ប៊ុនសំណាង និពន្ធនាយកកាសែតផ្សះផ្សាជាតិ និងគេហទំព័រព័ត៌មានសេនាបតី បានឱ្យដឹងថា សហការីទាំង ៣រូបរបស់លោក ត្រូវបានសមត្ថកិច្ចដោះលែងវិញហើយកាលពីថ្ងៃទី២៦ ខែឧសភា។ លោកបន្ថែមថា អ្នកកាសែតទាំងអស់ត្រូវបានដោះលែង ក្រោយពីផ្ដិតមេដៃលើកិច្ចសន្យាថា កុំចូលទៅយកព័ត៌មាននៅទីតាំងបែបនោះទៀត។
លោក សុខ ប៊ុនសំណាង ប្រាប់ថា៖ «និយាយរួម ពួកគាត់មានការដោះលែងហើយ ដោយសារនិយាយឱ្យចំទៅ គាត់ [អាជ្ញាធរ] ឱ្យយើងផ្តិតមេដៃ កែប្រែកុំឱ្យលើកក្រោយ យើងអ្នកព័ត៌មានយើងចូលទៅកន្លែងអ៊ីចឹង [កន្លែងលេងល្បែង កន្លែងជល់មាន់ កន្លែលេងអាប៉ោង] មានហានិភ័យច្រើន។ បើសិនជាអ្នកណាមិនធ្វើនីតិវិធីអញ្ចឹងទេ អ្នកព័ត៌មានយើងមួយចំនួន អ្នកខ្លះគាត់អត់មានវិជ្ជាជីវៈច្បាស់លាស់ អញ្ចឹងទេ គាត់ចេះតែដើរចូលផ្ទះគេ…កន្លងមក មានច្រើនណាស់បង»។
លោក សុខ ប៊ុនសំណាង បានឱ្យដឹងបន្ថែមថា លោកនឹងបញ្ឈប់សហការីទាំង ៣រូបនោះពីតួនាទីជាអ្នកយកព័ត៌មានរបស់ស្ថាប័នលោក ដោយលោកប្រាប់ថា ពួកគាត់ពុំធ្លាប់បានរាយការណ៍ព័ត៌មានមកស្ថាប័ននោះឡើយ។
អ្នករាយការណ៍ព័ត៌មានម្នាក់ដែលយកព័ត៌មានឱ្យគេហទំព័រព្រះចន្ទកម្ពុជា (PCK-News) ក៏ស្ថិតក្នុងចំណោមអ្នករាយការណ៍ព័ត៌មានដែលត្រូវសមត្ថកិច្ចចាប់ខ្លួនផងដែរ។
លោក ប៉ាត សុខ ជាចាងហ្វាងសារព័ត៌មានព្រះច័ន្ទកម្ពុជា ដែលមានការិយាល័យកណ្ដាលនៅខេត្តសៀមរាប និយាយថា លោកនឹងហៅបុគ្គលិករបស់ខ្លួនប្រាប់ពីចំណុចខ្វះខាតរបស់ខ្លួនក្នុងការបំពេញការងារផលិតព័ត៌មានឱ្យអង្គភាពនៅក្នុងសប្តាហ៍នេះ។ លោកបញ្ជាក់ថា បុគ្គលិករបស់គាត់ អាចប្រឈមនឹងបញ្ឈប់ពីការងារ ដោយសារតែបុគ្គលិករូបនោះចូលធ្វើការងាររយៈពេលចន្លោះ ៥ ទៅ ៦ខែ ប៉ុន្តែ មិនដែលផលិតព័ត៌មានឱ្យអង្គភាពយកទៅផ្សព្វផ្សាយនោះទេ។
លោក ប៉ាត សុខ ប្រាប់ថា៖ «វាចូលប្រហែលជា ៥ ទៅ ៦ខែ មិនដែលផលិតព័ត៌មានមកអង្គភាពសោះ។ ខ្ញុំខលទៅរកព័ត៌មានអ្វី គាត់ថា មិនដែលដើរ នៅតែផ្ទះកូនឈឺ ដល់ពេលបែកការណ៍សមត្ថកិច្ចចាប់។ ពេលរួចរាល់ការងារនេះហើយ ខ្ញុំផ្អាកមិនអាចឱ្យបន្តការងារនេះបន្តទៀតទេ»។
វីអូឌី មិនអាចសុំការបំភ្លឺពីអធិការខណ្ឌមានជ័យ លោក ម៉េង វិមានតារា និងស្នងការរាជធានីភ្នំពេញ លោក ស ថេត បានទេនៅថ្ងៃនេះ។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី មានប្រសាសន៍ថា លោកគាំទ្រការដោះលែងអ្នកសារព័ត៌មានទាំង ១៣នាក់ឱ្យមានសេរីភាពវិញ ប៉ុន្តែ លោកមិនយល់ស្របត្រង់ចំណុចដែលសមត្ថកិច្ចដាក់លក្ខខណ្ឌមិនឱ្យអ្នកសារព័ត៌មានចុះទៅយកព័ត៌មាន នៅទីកន្លែងដែលខុសច្បាប់ ដោយលោកចាត់ទុកថា ជាការការរឹតត្បិតសេរីភាពសារព័ត៌មានទៅវិញ។
លោក ណុប វី ប្រាប់ថា៖ «បើសិនជាទីតាំង ឬទីកន្លែងដែលមានការបើកប្រតិបត្តិការទៅទៀត វាកាន់តែជាចំណុចសំខាន់ ឬមួយជាទីតាំងដែលគាត់គួរតែសរសេររឿង គាត់គួរតែបកអាក្រាតរឿងមិនស្របច្បាប់ទាំងអស់ ឱ្យសាធារណជនបានដឹង ហើយឱ្យមានវិធានការពីសមត្ថកិច្ចពាក់ព័ន្ធ។ ដូច្នេះ ការហាមប្រាមមិនឱ្យអ្នកសារព័ត៌មានឱ្យគាត់ទៅទីតាំងហ្នឹងទៀត ឬក៏គាត់ទៅយកព័ត៌មាននៅកន្លែងខុសច្បាប់ហ្នឹង មិនត្រឹមត្រូវទេ»៕
