ក្រសួងសុខាភិបាល ប្រកាសនៅព្រឹកថ្ងៃទី៧ ខែមិថុនានេះថា បានរកឃើញបុរសជនជាតិខ្មែរ-បារាំងម្នាក់ មានផ្ទុកមេរោគកូវីដ១៩ ដែលនាំឱ្យអ្នកឆ្លងមេរោគនេះ កើនដល់ ១២៦នាក់។
នៅក្នុងសេចក្តីប្រកាសព័ត៌មានដដែល ក្រសួងសុខាភិបាល ឱ្យដឹងថា បុរសជនជាតិខ្មែរ-បារាំងអាយុ ៣០ឆ្នាំ ធ្វើដំណើរមកពីប្រទេសបារាំងតាមជើងហោះហើរពីសាធារណរដ្ឋកូរ៉េ មកដល់កម្ពុជានៅថ្ងៃទី២៤ ខែឧសភា ឆ្នាំ២០២០ ស្នាក់នៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ត្រូវបានក្រុមគ្រូពេទ្យយកវត្ថុសំណាករបស់គាត់ទៅវិភាគនៅវិទ្យាស្ថានប៉ាស្ទ័រកម្ពុជានៅអំឡុងថ្ងៃទី១៣ ដែលទទួលបានផលវិជ្ជមានវីរុសកូវីដ១៩ នៅថ្ងៃទី៦ ខែមិថុនានេះ ខណៈបច្ចុប្បន្នកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
តាមរបាយការណ៍របស់ក្រសួងសុខាភិបាលបង្ហាញថា គិតមកថ្ងៃទី០៧ ខែមិថុនានេះ ចំនួនអ្នកមានមេរោគកូវីដ១៩ដែលរកឃើញនៅកម្ពុជា សរុប ១២៦នាក់ ក្នុងនោះព្យាបាលជាសះស្បើយបាន១២៣នាក់។
ចំណែក ៣នាក់ទៀត រួមមាន បុរសជនជាតិខ្មែរ ១នាក់ ដែលបានវិលត្រឡប់មកពីប្រទេសហ្វីលីពីន និងបុរសជនជាតិខ្មែរ-បារំាំង ដែលមានលទ្ធផលវិជ្ជមានវីរុសកូវីដ១៩ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ហើយបុរសជនជាតិខ្មែរម្នាក់ទៀត កំពុងសម្រាកព្យាបាលនៅមន្ទីរពេទ្យខេត្តមិត្តភាពកម្ពុជា-ជប៉ុនមង្គលបូរី នៃខេត្តបន្ទាយមានជ័យ៕