កម្ពុជា អំពាវនាវទៅ«ភាគីមិត្តវៀតណាម»ឱ្យគោរពបទដ្ឋានបច្ចេកទេស និងគោលការណ៍អន្តរជាតិ ដោយថា ការចុះផ្សាយកន្លងទៅលើករណីអ្នកផ្ទុកកូវីដ១៩ ដោយមិនបានស្រាវជ្រាវឱ្យបានច្បាស់លាស់ត្រឹមត្រូវ ធ្វើឱ្យប៉ះពាល់ធ្ងន់ធ្ងរដល់មុខមាត់កម្ពុជា។
សេចក្តីថ្លែងការណ៍ចុះផ្សាយកាលពីថ្ងៃព្រហស្បតិ៍ម្សិលមិញ ក្រសួងសុខាភិបាលកម្ពុជា បានច្រានចោលការចុះផ្សាយរបស់សារព័ត៌មានវៀតណាមមួយ ដែលថា ករណីជនជាតិវៀតណាមអាយុ ១៨ឆ្នាំ ធ្វើតេស្តវិជ្ជមានកូវីដ១៩ ចេញពីកម្ពុជា។
ថ្មីៗនេះ សារព័ត៌មានវៀតណាមឈ្មោះ លុយអាតវៀតណាម (Luatvetnam.vn) ចុះផ្សាយថា បុរសជនជាតិវៀតណាមម្នាក់ អាយុ ១៨ឆ្នាំ ជាអ្នកជំងឺកូវីដ១៩ ធ្វើដំណើរពីកម្ពុជាចូលវៀតណាម តាមច្រកទ្វារព្រំដែន ថុងហ្វើក (Thuong Phuon) នៅថ្ងៃទី២៥ ខែឧសភា ឆ្នាំ២០២០ ដែលត្រូវបានធ្វើតេស្តរកឃើញវិជ្ជមានវីរុសកូវីដ១៩។
សារព័ត៌មានវៀតណាមដដែលឱ្យដឹងដែរថា បុរសនោះ ត្រូវបញ្ជូនទៅព្យាបាលនៅមណ្ឌលសុខភាព ង្វានហុងងី ប្រទេសវៀតណាម នៅថ្ងៃទី៧ ខែមិថុនា ឆ្នាំ២០២០។
ក្រសួងសុខាភិបាលកម្ពុជា ចាត់ទុកការចុះផ្សាយនេះថា «ប៉ះពាល់ធ្ងន់ធ្ងរដល់កិច្ចខំប្រឹងប្រែងរបស់កម្ពុជា» និងអំពាវនាវឱ្យវៀតណាមគោរពតាមបទដ្ឋានបច្ចេកទេស និងគោលការណ៍និយ័តកម្ម (បញ្ញត្តិ) អន្តរជាតិ លើករណីជំងឺឆ្លង មុននឹងធ្វើការសន្និដ្ឋាន ឬចុះផ្សាយ ដើម្បីផលប្រយោជន៍ប្រជាជនទាំងពីរប្រទេស។
បើតាមក្រសួង បុរសជនជាតិវៀតណាមដែលអះអាងថាផ្ទុកកូវីដ១៩ពីកម្ពុជានោះ រស់នៅក្នុងប្រទេសវៀតណាម ស្ថិតក្នុងឃុំថុងហ្វុក ស្រុកហ្វៀនហុងងី ខេត្តដុងថាប់ ហើយថា «ការដែលចម្លងនេះ គឺមានការឆ្លងនៅប្រទេសវៀតណាមនេះតែម្តង»៕
