ក្រសួងសុខាភិបាលបញ្ជាក់ថា គិតត្រឹមព្រឹកថ្ងៃទី១៧ ខែមិថុនានេះ អ្នកផ្ទុកមេរោគកូវីដ១៩ ម្នាក់ទៀត បានជាសះស្បើយ នាំឱ្យអ្នកដែលព្យាបាលជាពីមេរោគនេះកើនដល់ ១២៦នាក់ និង ២នាក់ទៀតកំពុងបន្តសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
តាមសេចក្តីប្រកាសព័ត៌មានរបស់ក្រសួងសុខាភិបាលនៅថ្ងៃនេះ បញ្ជាក់ថា បុរសដែលជាសះស្បើយពីមេរោគកូវីដ១៩នេះ មានអាយុ ២៦ឆ្នាំ រស់នៅក្នុងឃុំកំពង់ត្រាច ខេត្តកំពត។ បុរសម្នាក់នេះ ត្រូវបានរកឃើញផ្ទុកកូវីដ១៩ បន្ទាប់ពីវិលត្រឡប់ពីប្រទេសហ្វីលីពីន។
របាយការណ៍ក្រសួងសុខាភិបាល បង្ហាញថា គិតត្រឹមថ្ងៃទី១៧ ខែមិថុនា នៅកម្ពុជា អ្នកផ្ទុកមេរោគកូវីដ១៩ មានចំនួន ១២៨នាក់ មានប្រុស ៣៩នាក់ និងប្រុស ៨៩នាក់។ ក្នុងចំណោមនេះ ព្យាបាលជាសះស្បើយបាន ១២៦នាក់ ស្មើនឹង ៩៨,៤៤ភាគរយនៃអ្នកជំងឺសរុប៕
