ក្រុមសហជីពបានស្នើទៅក្រសួងការងារ និងបណ្តុះបណ្តាលវិជ្ជាជីវៈ ពិចារណាលុបចោលការពន្យាពេលបើកប្រាក់អតីតភាពការងារជូនកម្មករជូនកម្មករ។
កាលពីថ្ងៃទី២ ខែមិថុនា ក្រសួងការងារបានចេញសេចក្តីជូនដំណឹងមួយ ប្រាប់ដល់ម្ចាស់រោងចក្រ សហគ្រាសនានា និងកម្មករទាំងអស់ ដែលប្រើប្រាស់កិច្ចសន្យាការងារមុនឆ្នាំ២០១៩ សម្រាប់ផ្នែកវាយនភណ្ឌ កាត់ដេរ និងផលិតស្បែកជើង និងប្រាក់បំណាច់អតីតភាពការងារថ្មីក្នុងឆ្នាំ២០២០ សម្រាប់គ្រប់វិស័យ ត្រូវពន្យាពេលបើកប្រាក់អតីតភាពការងារដល់ឆ្នាំ២០២១។
ក្នុងញត្តិមួយចុះថ្ងៃទី២២ ខែមិថុនានេះ ដែលត្រូវបានដាក់ទៅក្រសួងការងារ ក្រុមសហជីពបានលើកឡើងថា ខ្លឹមសារនៃសេចក្តីប្រកាសព័ត៌មានរបស់ក្រសួងការងារនោះ បានបន្តផ្តល់សិទ្ធិស្របច្បាប់ឲ្យថៅកែកាត់អត្ថប្រយោជន៍បន្ថែមទៀតពីកម្មករ ខណៈកម្មកររាប់ម៉ឺននាក់ត្រូវបានព្យួការងារ ហើយកំពុងជួបទុក្ខលំបាកផ្នែកសេដ្ឋកិច្ចយ៉ាងធ្ងន់ធ្ងរ។
ញត្តិដដែលនេះ បានស្នើទៅក្រសួងការងារឲ្យជំរុញទៅថៅកែត្រូវបន្តបើកប្រាក់រំលឹកអតីតភាពការងារមានមុនឆ្នាំ២០១៩ និងប្រាក់បំណាច់អតីភាពថ្មីឆ្នាំ២០២០ជូនកម្មករ ដែលស្របទៅតាមមាត្រា៨៩នៃច្បាប់ស្តីពីការងារ និងប្រកាសលេខ៤៤៣របស់ក្រសួង ដើម្បីឲ្យកម្មករទទួលបានចំណូលខ្លះសម្រាប់ផ្គត់ផ្គង់គ្រសារដែលកំពុងជួបទុកលំបាក៕
